HEBRU 8 - Khasi CL Bible (BSI)

U Jisu U Rangbah Lyngdoh jong ngi

¹ Ka bynta kaba kongsan na kine kiei kiei ïa kiba ngi kren ka long ba ngi don kum uta U Rangbah Lyngdoh, uba shong ha ka liang kamon jong ka khet ba kynja blei kaba ha bneng.

² U shakri kum U Rangbah Lyngdoh ha ka Jaka kaba Kyntang Tam, kata ka long, ha ka ïingjaiñ kaba shisha ïa kaba U Trai u la pynïeng, ym da u briew.

³ Ïa uno uno u rangbah lyngdoh la thung ban ai ki jingainguh bad ki jingkñia da ki mrad sha U Blei, bad kumta U Rangbah Lyngdoh jong ngi u dei ruh ban don ei ei ban ainguh.

⁴ Lada u don ha ka pyrthei, un ym long satia u lyngdoh, namar don ki lyngdoh kiba ai ïa ki jingainguh katba kum ka Hukum ki Jiw.

⁵ Ka kam kaba ki leh kum ki lyngdoh ka long shisha tang kum ka dur bad ka syrngiew ïa kaei kaba don ha bneng. Ka la long kajuh kumba ka la long bad u Moses. Haba u la dei ban thaw ïa kata ka Ïingjaiñ ka Jutang, U Blei u la ong ha u, “Pynthikna ban thaw ïa kiei kiei baroh kat kum kata ka nongmuna ïa kaba la pyn-i ha me halor uta u lum.”

⁶ Hynrei mynta, ha U Jisu u la ai ïa ka kam lyngdoh kaba kham halor ban ïa ka jong ki, kumba ka jutang ïa kaba u la pynbeit hapdeng U Blei bad la ki briew ka long kaba kham bha, namar la seng nongrim ïa ka ha ki jingkular ïa kiei kiei kiba kham bha.

⁷ Lada kam shym la don kano kano kaba duna bad ka jutang kaba nyngkong, yn ym donkam ïa kaba ar.

⁸ Hynrei U Blei u shem jingduna bad ki briew jong u haba u ong, “Ki sngi ki wan, ong U Trai, haba ngan pynlong ïa ka jutang kaba thymmai bad ki paid Israel bad ki paid Judah ruh.

⁹ Kan ym long kum ka jutang ïa kaba nga la pynlong bad ki kpa tymmen jong ki ha kata ka sngi ha kaba nga la btin ïa ki bad la ïalam noh ïa ki na ka ri Ijipt. Kim shym ïaineh ha kata ka jutang kaba nga la pynlong bad ki, bad kumta ngam shym shahshkor shuh ïa ki.

¹⁰ Mynta, kane ka long ka jutang ïa kaba ngan pynlong bad ki paid Israel ha ki sngi ki ban wan, ong U Trai: Ngan buh ïa ki hukum jong nga ha ki jingmut jong ki, bad ngan thoh ïa ki ha ki dohnud jong ki; ngan long U Blei jong ki, bad ki kin long u paidlang jong nga.

¹¹ Yn ym don na ki u ban hikai ïa la u para shnong lane ong ïa la u para ri, ‘To tip ïa U Trai.’ Namar baroh kin tip ïa nga, naduh uba rit tam haduh uba khraw tam.

¹² Ngan map ïa ki pop jong ki bad ngan ym kynmaw shuh ïa ki jingleh bymdei jong ki.”

¹³ Da kaba ong ka jutang bathymmai, U Blei u la pynlong rim ïa kata kaba nyngkong; bad kano kano kaba kylla rim bad nang tymmen kan sa jah noh shen.