HEBRU 7 - Khasi CL Bible (BSI)

U Melkhisedek u lyngdoh

¹ Une u Melkhisedek u la long u syiem jong ka Salem bad u lyngdoh jong U Blei Bahakhlieh Tam Eh. Katba u Abraham u dang wan phai na ka thma ha kaba u la jop ïa ki saw ngut ki syiem, u Melkhisedek u la ïakynduh ïa u bad u la kyrkhu ïa u,

² bad u Abraham u la ai ïa u kawei-na-kaba-shiphew na baroh kaba u la lum, (ka jingmut kaba nyngkong jong ka kyrteng u Melkhisedek ka long “U syiem jong ka hok;” bad namar ba u la long u syiem jong ka Salem, ka kyrteng jong u ruh ka mut “U syiem jong ka Jingsuk.”)

³ Ym shym la don jingthoh shaphang u kpa lane ka kmie lane jong kino kino ki kpa tymmen jong u Melkhisedek; ym shym la don jingthoh shaphang ka jingkha lane ka jingïap jong u. U syriem ïa U Khun U Blei, u ïaisah u lyngdoh junom.

⁴ Te, phi ïohi, katno u la long uba khraw. U Abraham u kpa tymmen ba-donnam jong ngi, u la ai ha u kawei-na-kaba-shiphew na baroh kaba u la ïoh ha ka thma.

⁵ Bad ïa kito kiba hiarpateng na u Lebi kiba long ki lyngdoh la ai ïa ki da ka Hukum ba kin lum kawei-na-kaba-shiphew na ki paid Israel, kata ka long, na la ki briew, wat haba ki briew jong ki ruh ki hiarpateng na u Abraham.

⁶ U Melkhisedek um shym la hiarpateng na u Lebi, hynrei u la lum ïa kawei-na-kaba-shiphew na u Abraham bad u la kyrkhu ïa u, u briew uba la ïohpdiang ïa ki jingkular jong U Blei.

⁷ Ym don jingartatien ba uta uba kyrkhu u kham khraw ban ïa uta uba shah kyrkhu.

⁸ Ha kaba ïadei bad ki lyngdoh ïa kawei-na-kaba-shiphew la lum da ki briew kiba dei ban ïap; hynrei ïa u Melkhisedek ïa kawei-na-kaba-shiphew la lum da uta uba im, kumba ka Jingthoh Bakhuid ka ong.

⁹ Bad kum ban shu ong, haba u Abraham u la siew ïa kawei-na-kaba-shiphew, u Lebi (kiba hiarpateng na u ki lum ïa kawei-na-kaba-shiphew) ruh u la siew ïa ka.

¹⁰ Haba ïa u Lebi ym pat shym la kha, hynrei u la long, kum ban shu ong, ha ka met u kpa tymmen jong u, u Abraham haba u Melkhisedek u la ïakynduh ïa u.

¹¹ Dei ha ka nongrim jong ka jinglong lyngdoh ki Lebi ba la ai ïa ka Hukum ha ki paid Israel. Mynta, lada ka kam lyngdoh jong ki Lebi ka la long kaba janai, yn ym donkam shuh ïa uwei pat u lyngdoh ban mih, uwei uba na ka jinglong lyngdoh u Melkhisedek, ym jong u Aaron.

¹² Namar haba ka jinglong lyngdoh ka la kylla, ka dei ban don ruh ka jingkylla ha ka hukum.

¹³ Bad U Trai jong ngi, ïa uba kine kiei kiei ki kren, u wan na kawei pat ka jait, bad ym don uno uno u dkhot na ka jait jong u, uba la shakri kum u lyngdoh.

¹⁴ Ka long kaba la tip bha ba ïa u la kha kum u dkhot jong ka jait Judah; bad u Moses um shym kdew ïa kane ka jait haba u la kren shaphang ki lyngdoh.

Uwei pat u Lyngdoh, uba syriem ïa u Melkhisedek

¹⁵ Kane ka bynta ka la kham shai shuh shuh, ba uwei pat u lyngdoh uba pher u la paw, uba syriem ïa u Melkhisedek.

¹⁶ U la long u lyngdoh, ym da ki jingbuhbeit ryntih bad jingpynïaid ba kynja briew, hynrei lyngba ka bor jong ka jingim kaba ym don jingkut.

¹⁷ Naba ka Jingthoh Bakhuid ka ong, “Men long u lyngdoh shi junom, ha ka rukom long lyngdoh u Melkhisedek.”

¹⁸ Te ïa ka hukum kaba mynshuwa la buh sharud, namar ba ka long kaba tlot bad ka bymmyntoi.

¹⁹ Naba ka Hukum u Moses kam lah ban pynlong janai ïa kano kano. Bad mynta la ai ïa ka jingkyrmen kaba kham bha da kaba ngi lah ban wan sha jan U Blei.

²⁰ Nalor katei, ka don ruh ka jingsmai ka jong U Blei. Ym shym la don ka jingsmai kaba kum kata haba la pynlong lyngdoh ïa kita kiwei pat.

²¹ Hynrei U Jisu u la long u lyngdoh da ka jingsmai haba U Blei u la ong ha u, “U Trai u la pynlong ka jingsmai bakyntang bad un ym kylla shuh: ‘Me, me long u lyngdoh junom.’ ”

²² Te, kane ka jingïapher, ka pynlong ruh ïa U Jisu u nongbahkhlieh ïa ka jutang kaba kham bha.

²³ Ka don sa kawei pat ka jingïapher: ki la don bun na kito kiwei pat ki lyngdoh, namar ki la ïap bad kim shym lah shuh ban bteng ïa la ka kam.

²⁴ Hynrei U Jisu u im junom, bad ka kam jong u kum u lyngdoh kam shym la hiarpateng sha uno uno uwei pat.

²⁵ Bad kumta u long uba lah, mynta bad borabor, ban pynim ïa kita kiba wan sha U Blei da u, namar u im junom ban ïasaid bad U Blei na ka bynta jong ki.

²⁶ U Jisu, te, u long U Rangbah Lyngdoh uba pynbiang ïa ki jingdonkam jong ngi. U long uba khuid; um shym don kano kano kaba bakla lane ka pop ha u; la pynkyrpang ïa u na ki nongpop bad la kyntiew ïa u sha ki bneng.

²⁷ Um long kum kiwei pat ki rangbah lyngdoh; um da donkam ban da ai jingkñia man ka sngi na ka bynta ki pop jong u hi nyngkong ïa lade bad nangta na ka bynta ki pop jong ki briew. U ai kawei ka jingkñia, tang shisien hi, haba u la kñia noh ïa lade.

²⁸ Ka Hukum u Moses ka thung ïa ki briew ki bymjanai ban long ki rangbah lyngdoh; hynrei ka kular U Blei ba la pynlong da ka jingsmai, kaba wan hadien ka hukum, ka thung ïa U Khun, ïa uba la pynjanai junom.