HEBRU 6 - Khasi CL Bible (BSI)

¹ Te, to ngin ïaid shaphrang, sha ka jinghikai ïa kiba ïadei bad kiba la san bad ieh shadien jong ngi ïa ki jinghikai banyngkong ka khubor jong ka jingngeit. Ngim dei ban neh sah ha ka nongrim jong ka jingphai noh na ki kam bymseisoh bad ka jingngeit ha U Blei;

² ha kaba hikai shaphang ki jingpynbaptis, bad kaba buh ïa ki kti; shaphang ka jingmihpat jong kiba ïap bad shaphang ka jingbishar bymjukut.

³ To ngin ïa-ïaid shaphrang! Bad kane ka long kaei kaba ngin leh, lada U Blei u shah.

⁴ Naba da kumno lah ban ïalam pat ïa kito kiba la iehnoh ïa la ka jingngeit ba kin kylla-kaba-mut biang? Ki la don shisien ha ka jingshai U Blei; ki la ïohmad ïa ka jingai ba kynja bneng, bad ïohpdiang ïa la ka bynta na U Mynsiem Bakhuid;

⁵ ki la tip naba ki la ïohmad ba ka Ktien U Blei ka long kaba bha, bad ki la ïohmad ruh ïa ki bor jong ka por ka ban sa wan.

⁶ Bad hadien kata ki la iehnoh ïa la ka jingngeit! Ka long ka bym lah long ban ïalam pat ïa ki ban kylla-kaba-mut biang, namar ki la sahnarphna biang ïa U Khun U Blei bad pynlehrain ïa u ha khmat ka pyrthei.

⁷ U Blei u kyrkhu ïa ka khyndew kaba kjit noh ïa u slap uba hap bunsien ha ka bad kaba pynmih ïa ki jingthung kiba ai jingmyntoi na ka bynta kita kiba rep ha ka.

⁸ Hynrei lada ka pynmih ïa ki shiah bad ïa ki ñiut, kam dondor ei ei; ka don ha ka, ka jingma naba U Blei un tim bad pynjot da ka ding.

⁹ Hynrei wat lada ngi kren kumne, ko paralok ba-ieit, ngi sngewskhem shaphang jong phi. Ngi tip ba phi ïoh ïa ki jingkyrkhu kiba kham bha kiba ïadei bad ka jingpynim jong phi.

¹⁰ U Blei um dei uba bishar bymhok. Un ym klet ïa ka kam kaba phi la leh lane ïa ka jingieit kaba phi la pynpaw na ka bynta jong u da ka jingïarap kaba phi la ai bad dang ïai ïarap ïa ki parabangeit.

¹¹ Ka jingangnud kaba khraw tam jong ngi ka long ba uwei pa uwei na phi un don ka jingthrang kaba ïaineh haduh kaba kut, kumta ba kiei kiei kiba phi kyrmen kin wan urlong.

¹² Ngim kwah ïa phi ba phin long kiba alhia, hynrei ban long kum kita kiba ngeit bad ban long kiba ïaishah, bad kumta ban ïohpdiang ïa kaei kaba U Blei u la kular.

Ka jingkular bathikna U Blei

¹³ Haba U Blei u la pynlong ka jingkular ha u Abraham, u la smai ban leh ïa kaei kaba u la kular. Namar ym don uwei ruh u ban kham khraw ban ïa u, u la pyndonkam ïa la ka jong ka kyrteng haba u la pynlong ïa la ka jingsmai.

¹⁴ U la ong, “Nga kular ba ngan kyrkhu ïa me bad ngan pynroi ïa me pateng la pateng.”

¹⁵ U Abraham u la ïaishah slem, bad kumta u la ïohpdiang ïa kaei kaba U Blei u la kular.

¹⁶ Haba u briew u smai, u pyndonkam ïa ka kyrteng jong uno uno uba kham khraw ban ïa u, bad ka jingsmai ka pynbeit ïa baroh ki jingïatainia.

¹⁷ Ha kito kiba dei ban ïohpdiang ïa kaei kaba u kular, U Blei u kwah ban pyn-i shai ba un ym pynkylla ïa ki jingthmu jong u; kumta u wanrah de ïa ka jingsmai ha ka jingkular.

¹⁸ Te, don kine ar tylli kiei kiei ki bym lah ban kylla bad ïa kiba U Blei um lah ban lamler. Kumta ïa ngi kiba la shem ka jingshngain ha u la nang pynshlur shuh shuh ban batskhem ïa kata ka jingkyrmen ïa kaba la buh ha khmat jong ngi.

¹⁹ Ngi don kane ka jingkyrmen kum u angkor ïa ki jingim jong ngi. Ka long kaba skhem bad kaba thikna, bad ka ïaid lyngba ka jingkah jong ka Templ ba kynja bneng shaduh ka kamra kaba kham shapoh.

²⁰ Na ka bynta jong ngi U Jisu u la rung hapoh hangta shuwa jong ngi, bad u la jia long U Rangbah Lyngdoh junom, ha ka rukom long lyngdoh u Melkhisedek.