HEBRU 5 - Khasi CL Bible (BSI)

¹ Ïa uno uno u rangbah lyngdoh la jied napdeng ki parabriew, bad la thung ban shakri ïa U Blei na ka bynta jong ki, ban ai ïa ki jingkñia bad ka jingainguh na ka bynta ki pop.

² Namar u hi u long uba tlot ha kiba bun rukom, u lah ban long uba jemnud bad kito ki bym don ka jingtip bad kiba leh bakla.

³ Bad namar ma u hi u long uba tlot, u dei ban ai ïa ki jingkñia ym tang na ka bynta ki pop jong ki briew hynrei namar ki pop jong u ruh.

⁴ Ym don uno uno ruh uba shim ha lade ïa ka burom ka jinglong rangbah lyngdoh. Ka dei tang lyngba ka jingkhot U Blei, ba u briew u lah ban long u rangbah lyngdoh — kumba u Aaron u la long.

⁵ Ha kajuh ka rukom, U Khrist um shym la shim ha lade ïa kane ka burom ka jinglong Rangbah Lyngdoh. Pynban, U Blei u la ong ha u, “Me, me long U Khun jong nga; ha kane ka sngi nga la long U Kpa jong me.”

⁶ U la ong ruh ha kawei pat ka jaka, “Men long u lyngdoh junom, ha ka rukom long lyngdoh jong u Melkhisedek.”

⁷ Ha ka jingim jong u ha kane ka pyrthei, U Jisu u la duwai bad khot kyrpad da kaba pyrta jam bad ïam ha khmat U Blei, uba lah ban pyllait ïa u na ka jingïap. Namar ba u long uba sngewrit bad aiti lut, U Blei u la shahshkor ïa u.

⁸ Hynrei wat la u la long U Khun U Blei, u la nang ban kohnguh da kaba u la shahshitom.

⁹ Haba la pynlong janai ïa u, u la jia long ka tynrai jong ka jingim bymjukut na ka bynta kito baroh kiba kohnguh ïa u,

¹⁰ bad U Blei u la pynbna ba u long U Rangbah Lyngdoh ha ka rukom long lyngdoh jong u Melkhisedek.

Ka jingmaham pyrshah ïa ka jingiehnoh ïa ka jingngeit

¹¹ Don shibun kiei kiei ba ngi hap ban ong shaphang kane ka bynta, hynrei ka long kaba eh ban batai ïa phi, namar phi long kiba suki katta katta ïa ka ban sngewthuh.

¹² Ka la dei ka por kaba la biang bha ïa phi ban long ki nonghikai — pynban, phi dang donkam ïa uwei pat ban hikai ïa phi ïa ki jinghikai banyngkong jong ka khubor U Blei. Ha ka jaka ban bam ïa ka jingbam kaba eh, phi dang ïai donkam ban dih da ka dud.

¹³ Uno uno uba dang dih dud u dang long u khynnah, khlem pat don kano kano ka jingshemphang ïa kaei kaba dei bad ka bymdei.

¹⁴ Ka jingbam kaba eh, ha kawei pat ka liang, ka long ïa kiba la rangbah, kiba lyngba ka jingpynmlien ki lah ban pynïapher ïa kaba bha na kaba sniew.