HEBRU 4 - Khasi CL Bible (BSI)

¹ Mynta, U Blei u la tyrwa ha ngi ïa ka jingkular ba ngi lah ban pdiang ïa ka jingjahthait ïa kaba u la kren. Te, to ngin da sumar, ba yn ym shem ïa uno uno na phi u bym kot ban ïohpdiang ïa kata ka jingjahthait ba la kular.

² Naba ngi la ïohsngew ïa ka Khubor Babha, kumba ma ki ruh ki la ïohsngew. Ki la ïohsngew ïa ka khubor, hynrei kam shym la myntoi ei ei ruh ïa ki, namar haba ki la ïohsngew ïa ka, kim shym la pdiang ïa ka da ka jingngeit.

³ Ngi kiba ngeit, te, ngi ïohpdiang ïa kata ka jingjahthait ïa kaba U Blei u la kular. Ka la long kumba u la ong, “Nga la bitar bad pynlong ka jingkular kyntang: ‘Kin ym ïohrung da lei lei sha ka ri ha kaba ngan ai ha ki ka jingjahthait!’ ” U la kren ïa kane wat haba la pyndep ïa ka kam jong u naduh ka por ba u la thaw ïa ka pyrthei.

⁴ Naba don ha Jingthoh Bakhuid la ong ïa kane shaphang ka sngi kaba hynñiew: “U Blei u la shongthait ha ka sngi kaba hynñiew na ka kam jong u baroh.”

⁵ Ïa kane kajuh ka bynta la kren biang, “Kin ym ïohrung da lei lei sha kata ka ri ha kaba ngan ai ha ki ïa ka jingjahthait.”

⁶ Kito kiba la ïohsngew nyngkong ïa ka Khubor Babha kim shym ïohpdiang ïa kata ka jingjahthait, namar ba kim shym la ngeit. Ki don, te, kiwei pat ïa kiba la shah ban ïohpdiang ïa ka.

⁷ Ïa kane la pyn-i lyngba ka jingshisha ba U Blei u la buh ïa kawei pat ka sngi, ïa kaba la khot “Ha kane ka sngi.” Bun snem hadien u la kren lyngba u Dabid ha ka Jingthoh Bakhuid ïa kaba la lah kdew: “Lada phin ïohsngew ïa ka sur jong U Blei ha kane ka sngi, wat pyneh ïa la ki dohnud.”

⁸ Lada u Joshua u la ai ha ki briew ïa ka jingjahthait kaba U Blei u la kular, U Blei un ym kren hadien shaphang kata kawei pat ka sngi.

⁹ Pynban, kumba ka long, ka dang ïaisah hi ka jingjahthait ïa ki briew jong U Blei kumba U Blei u shongthait ha ka sngi kaba hynñiew.

¹⁰ Naba uno uno uba ïohpdiang ïa ka jingjahthait ïa kaba U Blei u la kular, un shongthait na ka kam jong u hi, kumba U Blei u la shongthait na ka kam jong u.

¹¹ Te, to ngin ïaleh shitom ban ïohpdiang ïa kata ka jingjahthait, kumta ba yn ym don uwei ruh na ngi u ban duh noh kum ma ki namar ba kim don ka jingngeit.

¹² Ka ktien U Blei ka long kaba im bad kaba donbor, kaba kham nep ban ïa kano kano ka waitlam arliang syrti. Ka pei lyngba shaduh kaba ka jingim bad ka mynsiem ki ïakynduh, shaduh kaba ki mat bad ki khleiñ shyieng ki ïakynduh lang. Ka bishar ïa ki jingkwah bad ïa ki jingpyrkhat jong ka dohnud u briew.

¹³ Ym don kaei kaei ïa kaba lah ban buhrieh na U Blei; ïa kiei kiei kiba don ha ki jingthaw baroh la pynpaw bad pyn-i shynna ha ki khmat jong u. Bad ka dei sha u ba ngi dei ban ai jingkheiñ ïa lade.

U Jisu U Rangbah Lyngdoh uba khraw

¹⁴ Te, to ngin batskhem ïa ka jingngeit ïa kaba ngi phla. Naba ngi don U Rangbah Lyngdoh uba khraw uba la leit haduh ka jingdon ryngkat U Blei — U Jisu, U Khun U Blei.

¹⁵ U Rangbah Lyngdoh jong ngi um long uta u bym lah ban sngewlem ïa ki jingtlot jong ngi. Pynban, ngi don U Rangbah Lyngdoh uba la shah pynshoi ha kiei kiei baroh kum ma ngi, hynrei u bym shym la leh pop.

¹⁶ To ngin sngewskhem, te, bad leit sha ka khet U Blei, ha kaba don ka jingaiei. Hangta ngin ïohpdiang ïa ka jingisynei bad ngin shem ïa ka jingaiei ka ban ïarap ïa ngi ha ka por ba ngi donkam ïa ka.