HEBRU 3 - Khasi CL Bible (BSI)

U Jisu u long kham khraw ban ïa u Moses

¹ Ko parabangeit jong nga ïa kiba U Blei u la khot! To pyrkhat ïa U Jisu, ïa uba U Blei u la phah ban long U Rangbah Lyngdoh jong ka jingngeit kaba ngi ïaphla.

² U long uba shaniah ha U Blei, uba la jied ïa u ban leh ïa kane ka kam, kumba u Moses u la long uba lah ban shaniah ha ka kam jong u ha ka ïing U Blei.

³ U briew uba tei ïa ka ïing u ïoh kham bun ka burom ban ïa ka ïing hi. Ha kajuh ka rukom U Jisu u long uba dei hok ban ïoh ïa ka jingpyndonburom kaba kham khraw ban ïa u Moses.

⁴ Man la ka ïing, ha ka jingshisha, la tei da uno uno — Bad uta uba la thaw ïa kiei kiei baroh long U Blei keiñ.

⁵ U Moses u long uba lah ban shaniah ha ka ïing U Blei kum u shakri, bad u kren ïa kiei kiei kiba U Blei un sa kren ha ki por ki ban sa wan.

⁶ Hynrei, U Khrist u long uba lah ban shaniah kum U Khun uba dei peit ïa ka ïing U Blei. Ngi long ka ïing jong u lada ngi ïaineh ha ka jingshlur bad ngi long skhem ha kaei kaba ngi kyrmen.

Ka jingjahthait ïa ki briew jong U Blei

⁷ Kumta te, kumba U Mynsiem Bakhuid u ong; “Lada phi ïohsngew ïa ka sur ka jong U Blei ha kane ka sngi,

⁸ wat pyneh ïa la ka dohnud, kumba ki kpa tymmen jong phi ki la long haba ki la ïaleh pyrshah ïa U Blei, kumba ki la long ha kata ka sngi ha ka ri shyiap haba ki la tynjuh ïa U.

⁹ Hangta ki la tynjuh bad ïaleh pyrshah ïa nga, ong U Blei, wat la ki la ïohi ïa kaei kaba nga la leh ha ki sawphew snem.

¹⁰ Bad kumta nga la bitar ïa kita ki briew bad nga la ong, ‘Ki la iehnoh ïa nga borabor bad ki la kyntait ban kohnguh ïa ki hukum jong nga.’

¹¹ Nga la bitar bad nga la pynlong ka jingkular bakyntang: ‘Kin ym ïohrung da lei lei sha ka ri ha kaba ngan ai ha ki ïa ka jingjahthait!’ ”

¹² Ko parabangeit jong nga, to sumar ïoh ba uno uno na phi u don ka dohnud kaba sniew eh bad bymngeit kat haduh ba un da phai dien noh na U Blei uba im.

¹³ Pynban, khnang ba ym don uwei na phi u ban shah shukor ha ka pop bad eh dohnud; phi dei ban ïarap iwei ïa iwei pat ha la ka sngi, katba ka ktien “Mynta” ha ka Jingthoh Bakhuid ka kren ïa ngi.

¹⁴ Naba ngi long baroh ki nongïoh bynta bad U Khrist lada ngi batskhem haduh kaba kut ïa kata ka jingsngewskhem kaba ngi la don naduh kaba sdang.

¹⁵ Kane ka long kaei ba ka Jingthoh Bakhuid ka ong: “Lada phi ïohsngew ïa ka sur jong U Blei ha kane ka sngi, wat pyneh ïa la ki dohnud, kumba ki kpa tymmen jong phi ki la long haba ki ïaleh pyrshah ïa U Blei.”

¹⁶ Kiei kita ki briew kiba la ïohsngew ïa ka sur jong U Blei bad ïaleh pyrshah ïa u? Baroh kito ïa kiba la ïalam noh na Ijipt da u Moses?

¹⁷ Bad kiei pat kiba U Blei u la bitar haduh sawphew snem? Bad kita ki briew kiba la leh pop, kiba la kyllon ïap ha ka ri shyiap.

¹⁸ Haba U Blei u la pynlong ïa ka jingkular bakyntang jong u, “Kin ym ïohrung da lei lei sha ka ri ha kaba ngan ai ïa ki ïa ka jingjahthait” — ïano u kren? Ïa kita kiba la ïaleh pyrshah.

¹⁹ Kumta ngi ïohi ba kim shym la lah ban leit rung shapoh kata ka ri, namar kim shym la ngeit.