HEBRU 2 - Khasi CL Bible (BSI)

Ka jingpynim bakhraw

¹ Namar kata ngi dei ban kham batskhem ïa kita ki jingshisha ïa kiba ngi la ïohsngew, kumta ba ngin ym shah rong noh.

² Kata ka khubor ïa kaba la pynbna da ki angel ha ki kpa tymmen jong ngi ka long kaba shisha, bad uno uno u bym shym bud ïa ka lane u bym shym kohnguh ïa ka u shah pynshitom kumba ka dei hok ïa u.

³ Da kumno te ngin lait, lada ngi leh bymsuidñiew ïa ka jingpynim kaba khraw katta katta? U Trai hi u la pynbna nyngkong ïa kane ka jingpynim, bad kita kiba la ïohsngew ïa u ki pynshisha ha ngi ba ka long kaba shisha.

⁴ Ha kajuh ka por, U Blei ruh u la ai shuh ïa la ki sakhi ha ki, da kaba leh bun ki kambah bad ki kamphylla bad da kaba ïasam ïa ki jingai U Mynsiem Bakhuid kat kum ka mon jong u.

Uta uba ïalam ïa ngi sha ka jingpynim

⁵ U Blei um shym la buh ïa ki angel kum ki nongsynshar halor ka pyrthei kaba thymmai ka ban sa wan — ka pyrthei ïa kaba ngi ïakren.

⁶ Pynban, kumba la ong ha katto katne ki jaka ha ki Jingthoh Bakhuid: “U briew u long aïu, A Blei, ba men pyrkhat ïa u, tang uba kynja briew, ba men suidñiew ïa u?

⁷ Me la pynlong ïa u khampoh khyndiat ban ïa ki angel, me la pynphong pansngiat ïa u da ka burom bad ka jingpyndonburom, bad me la pynlong ïa u ban synshar halor kiei kiei baroh.”

⁸ La ong ba U Blei u la pynlong ïa u briew “u nongsynshar halor kiei kiei baroh;” kane ka paw shai ba ka kynthup ïa kiei kiei baroh. Pynban, ngim pat ïohi ba u briew un synshar halor kiei kiei baroh mynta.

⁹ Hynrei ngi da ïohi ïa U Jisu, ïa uba la pynlong shipor kham hapoh ban ïa ki angel, kumta ba lyngba ka jingaiei ka jong U Blei, u dei ban shahïap na ka bynta uwei pa uwei baroh. Mynta ngi ïohi ïa u, ba la pynphong pansngiat da ka burom bad da ka jingpyndonburom namar ka jingïap kaba u la shah.

¹⁰ Ka long kaba dei eh ba U Blei, uba thaw bad pynneh ïa kiei kiei baroh, un pynlong ïa U Jisu uba janai lyngba ka jingshah shitom, khnang ban pynwan ïa kiba bun ki khun ban ïoh bynta ha ka burom jong u. Namar U Jisu u long uta uba ïalam ïa ki sha ka jingpynim.

¹¹ U pynkhuid ïa ki briew na ki pop jong ki, bad ma u lem bad kita baroh ïa kiba la pynkhuid ki don ujuh U Kpa. Namarkata, U Jisu um sngewlehrain ban khot ïa ki, ki para jong u.

¹² U ong ha U Blei, “Ngan pynbna ha ki para jong nga, ïa kaei kaba me la leh; ngan rwai ïaroh ïa me ha ki jingïamane lang jong ki.”

¹³ U ong ruh, “Ngan buh ïa la ka jingshaniah ha U Blei.” Bad u ong ruh, “Hangne nga don bad ki khun ïa kiba U Blei u la ai ha nga.”

¹⁴ Namar ba kita ki khun, kumba u khot ïa ki, ki long ki briew na ka doh bad ka snam, U Jisu u la long u briew kum ma ki hi bad ïoh bynta lang na ka jinglongbriew jong ki. U la leh ïa kane, khnang ba da ka jingïap jong u, u lah ban pynduh ïa u Bymman, uba don ka bor halor ka jingïap,

¹⁵ bad ha kane ka rukom, un pyllait ïa kita baroh kiba la long ki mraw shi lynter ka jingim jong ki, namar ka jingsheptieng jong ki ïa ka jingïap.

¹⁶ Namar ka shai kdar, ba ym dei ïa ki angel ba u ïarap. Pynban, kumba ka Jingthoh Bakhuid ka ong, “U ïarap ïa kiba hiarpateng na u Abraham.”

¹⁷ Kane ka mut, ba u dei ban long uba syriem kum ki para jong u ha kiei kiei baroh, ba un ïoh long u rangbah lyngdoh uba lah ban shaniah bad uba sngewsynei ha ka jingshakri ïa U Blei, kumta ba yn ïohmap noh ïa ki pop ki briew.

¹⁸ Bad mynta, u lah ban ïarap ïa kita kiba shah pynshoi, namar ma u hi u la shah pynshoi bad shahshitom.