HEBRU 13 - Khasi CL Bible (BSI)

Kumno ban pynsngewbha ïa U Blei

¹ To ïaineh ha kaba ïa-ieit iwei ïa iwei kum ki parabangeit.

² Da kynmaw ban pdiang sngewbha ïa ki nongwei ha ki ïing jong phi. Don kiba la leh kumta bad pdiang sngewbha ïa ki angel khlem da tip ïa kata.

³ To kynmaw ïa kito kiba don ha ïingbyndi, la kumba phi don lang bad ki ha ïingbyndi. Kynmaw ïa kito kiba shahshitom, la kumba phi ruh phi shahshitom kum ma ki.

⁴ Ïa ka jingshongkurim dei ban ri burom da baroh, bad kiba long shi tnga ki dei ban shaniah iwei ïa iwei pat. U Blei un sa bishar ïa kito kiba awria bad ïa kito kiba klim.

⁵ Sumar bad kiar ïa la ka jingim na kaba ieit spah, bad sngewhun bad kita kiei kiei kiba phi don. Namar U Blei u la ong, “Ngan ym iehnoh ïa phi, ngan ym kyntait ïa phi.”

⁶ To ngin long shlur, te, bad ong, “U Trai u long u nongïarap jong nga, ngan ym sheptieng. Uei uba lah ban leh ei ei ïa nga?”

⁷ To kynmaw ïa ki nongïalam jong phi kiba mynshuwa, kiba la kren ha phi ïa ka khubor U Blei. To da pyrkhat kumno ki la im bad ki la ïap, bad pyrthuh bud ïa ka jingngeit jong ki.

⁸ U Jisu Khrist u long ujuh mynhynnin, mynta bad sha ki bymjukut.

⁹ Wat shah ba ki jinghikai bakhyllah baroh kin ïalam bakla ïa phi na ka lynti kaba dei. Ka long kaba bha ban ïohpdiang ïa ka jingkhlaiñ kaba kyrsoi na shapoh da ka jingaiei U Blei, bad ym da kaba kohnguh ïa ki hukum kiba ïadei bad ki jingbam; kito kiba kohnguh ïa kine ki hukum kim shym la ïoh jingïarap ei ei na ki.

¹⁰ Ki lyngdoh kiba shakri ha ki jaka mane blei jong ki Jiw kim don hok ban bam na kano kano ka jingkñia ïa kaba la buh halor ka duwan jong ngi.

¹¹ U rangbah lyngdoh jong ki Jiw u wanrah ïa ka snam ki mrad ha ka Jaka Kaba Kyntang Tam ïa ka ban ainguh kum ka jingkñia namar ki pop; hynrei ïa ki met jong ki mrad la thang shabar ka jaka shong dara.

¹² Namar kane ka daw U Jisu ruh u la ïap shabar ka nongbah, khnang ban pynkhuid ïa u paidlang na ka pop da ka snam jong u hi.

¹³ Te, to ngin leit sha u shabar ka jaka shong dara ban ïoh bynta lang ha ka jingshah lehrain jong u.

¹⁴ Naba ym don ka nongbah kaba ïaineh na ka bynta jong ngi hangne ha pyrthei, ngi ap khmih ïa ka nongbah ka ban sa wan.

¹⁵ Namarkata, to ngin ai jingïaroh ïa U Blei khlem da pud kum ka jingkñia da U Jisu, kaba long ka jingainguh da ki rmiang shyntur kiba phla ïa u kum U Trai.

¹⁶ Wat klet ban lehbha bad ïarap uwei ïa uwei pat, namar kine ki long ki jingkñia kiba pynsngewbha ïa U Blei.

¹⁷ To kohnguh ïa ki nongïalam jong phi da kaba bud ïa ki hukum jong ki. Ki sharai ïa ki mynsiem jong phi khlem da thait, namar ki dei ban ai jingkheiñ ïa ka kam jong ki sha U Blei. Lada phi kohnguh ïa ki, kin trei ïa ka kam da kaba kmen; lada phim kohnguh, kin trei ïa ka kam da kaba sngewsih, bad kata kan ym ïarap ïa phi.

¹⁸ To ïai duwai namar jong ngi. Ngi sngewskhem ba ngi don ka jingïatiplem kaba khuid, namar ngi kwah ban leh ïa kaba dei ha ki por baroh.

¹⁹ Bad nga da kyrpad jur ïa phi ban duwai ba U Blei un phah pat ïa nga sha phi kham kloi.

Ka jingduwai pynwai

^20-21 U Blei uba la pynmihpat na ka jingïap ïa U Jisu uba U Trai jong ngi, uba long u Nongaplangbrot uba khraw jong ki langbrot da kata ka jingïap ha kaba la kñia ïa u, da kaba la pynskhem ïa ka jutang bymjukut. To ai ba U Blei ka jingsuk un pyndap ïa phi da kaei kaei kaba bha baroh kaba phi donkam khnang ban leh ïa ka mon jong u, bad ai ba ma u, da U Jisu Khrist, un leh ha ngi ïa kaei kaei kaba pynsngewbha ïa u. Bad ha U Khrist to long ka burom junom la junom, Amen.

Ki kyntien khatduh

²² Nga kyrpad ïa phi, ko parabangeit jong nga, ban shahshkor bha ïa kane ka khubor ka jingpynshlur; naba kane ka shithi kaba nga la thoh sha phi kam da long kaba jrong eh.

²³ Nga kwah ïa phi ban tip ba ïa u para jong ngi, u Timothi la pyllait na ka ïingbyndi. Lada u wan kloi, ngan wan ryngkat bad u haba nga wan jngoh ïa phi.

²⁴ To ai ki jingkhublei jong ngi sha baroh ki nongïalam jong phi bad sha ki briew jong U Blei baroh. Ki parabangeit jong ngi na Italy ki phah ki jingkhublei jong ki ïa phi.

²⁵ To ka jingaiei U Blei kan long lem bad phi baroh.