HEBRU 12 - Khasi CL Bible (BSI)

U Blei uba U Kpa jong ngi

¹ Na ka bynta jong ngi, ngi don katne u paid sakhi babun byllien sawdong jong ngi. Kumta te, to ngin ïabret noh na lade ïa kiei kiei baroh kiba wan pynwit ha lynti, bad ïa kata ka pop kaba shait snoh skhem ha ngi, bad to ngin ïaphet da ka jingkut jingmut ïa ka jingïaphet thong kaba don ha khmat jong ngi.

² To ngin ïakhmih shaiñ sha U Jisu, ha uba ka jingngeit jong ngi ka don naduh kaba sdang haduh kaba kut. U bym shym la kynran dien namar ka diengphna! Pynban, namar ka jingkmen kaba la ap ïa u, um shym pyrkhat ei ei ïa ka jingjahburom ban shahïap halor ka diengphna, bad mynta u la shong ha ka liang ka mon jong ka khet U Blei.

³ To da pyrkhat ïa kaei kaba u la ïaid lyngba, kumno u la buh ïa lade ban shah isih ha ki nongpop! Kumta wat ai ba phin noh mynsiem bad kynran dien.

⁴ Naba ha kata ka jingïaleh jong phi pyrshah ïa ka pop, phim pat ïaleh pyrshah haduh ban da shah pynïap.

⁵ Hato phi la klet noh ïa ki ktien pynshlur ïa kiba U Blei u la kren ha phi kum ïa la ki khun? “Ko khun jong nga, to pynleit jingmut haba U Trai u sneng pynbeit ïa phi, bad wat sngew noh mynsiem haba u sneng ïa phi.

⁶ Namar U Trai u sneng ïa baroh kiba u ieit, bad u sympat ïa uno uno ïa uba u pdiang kum la u khun.”

⁷ To ïaishah ïa kaei kaba phi la shahshitom namar ka jingsneng sympat u kpa; ka jingshahshitom jong phi ka pynpaw ba U Blei u ñiew ïa phi kum ki khun jong u. Hato la ju don ne em u khun u bym ju shah pynshitom ha la u kpa?

⁸ Lada ïa phi ym shym la pynshitom, kumba shah ki khun jong u baroh, ka mut ba phim dei ki khun bashisha jong u, hynrei ki khun khlem kpa.

⁹ Ha kaba ïadei bad ki kpa jong ngi ha kane ka pyrthei, ki sneng sympat ïa ngi bad ngi burom ïa ki. Katno tam, te, ngi dei ban pyndem ha U Kpa ba kynja mynsiem jong ngi bad ïoh im.

¹⁰ Ki kpa jong ngi ki sneng sympat ïa ngi tang shipor, katba ki sngewbit ma ki, hynrei U Blei u leh ïa kata na ka bynta ka jingbha jong ngi hi, khnang ba ngin ïoh bynta lang ha ka jingkhuid jong u.

¹¹ Haba la sneng sympat ïa ngi, ngi ju pyrkhat ha kata ka por ïa kaei kaei kaba pynsngewsih ïa ngi, bad ym kaba pynkmen ïa ngi. Pynban hadien, kito kiba shah pynbeit da kita ki rukom sneng sympat ki ïoh ot ïa ka bainong kaba ai jingsuk jong ka jingim bahok.

Ki jingkyntu bad ki jingmaham

¹² Te to rah ïa ki kti ba la thait jong phi, bad pynkhlaiñ ïa ki khohsiew kiba la kyiuh jong phi!

¹³ Da ïaid ha ki lynti kiba beit, khnang ba ïa kata ka kjat kaba dkoh yn ym pynduhbor noh, hynrei pynban, yn pynkoit keiñ ïa ka.

¹⁴ Ïaleh ban ïashongsuk bad ki briew baroh, bad pyrshang ban im ka jingim kaba khuid, namar khlem kata uno uno un ym lah ban ïohi ïa U Trai.

¹⁵ To sumar ban ym phai dien noh na ka jingaiei U Blei. Wat ai ba uno uno un long kum u jingthung uba kthang, uba san bad uba pynjynjar da ka bih jong u.

¹⁶ Wat ai ba uno uno un long uba im thala lane u bym kynja mynsiem, kum u Iso, uba tang namar shisien ka jingbam u la die noh ïa ki hok jong u kum u hynmen.

¹⁷ Hadien kata, phi tip, u la kwah ban ïohpdiang ïa ka jingkyrkhu u kpa jong u, hynrei u la shah kyntait; namar um ïohlad shuh ban pynkylla ïa kaei kaba u la leh, la u la wad ïa ka da ki jingjaw ummat.

¹⁸ Naba phim shym la wan kumba wan ki paid Israel, sha kaei kaba phi lah ban tba, sha u lum Sinai ha kaba la don ka ding kaba klang, ka jingdum bad u lyoh ïong, ka 'erïong,

¹⁹ ka jingriew ka turoi, bad ka jingsawa jong ka sur kaba kren. Haba ki paidbah ki la ïohsngew ïa kata ka jingsawa, ki la kyrpad ba kim kwah shuh ban ïohsngew sa ïa kawei pat ka ktien.

²⁰ Namar kim lah ban shah ïa kaei kaba U Blei u la hukum kaba ong, “Wat lada u mrad un ktah ïa uta u lum, yn lynthem maw ïa u haduh ba un da ïap.”

²¹ Kaei kaba la ïohi ka long kaba sngewtriem katta katta ba u Moses u la ong, “Nga la khynñiuh bad nga la sheptieng!”

²² Pynban, phi la wan sha u lum Seïon bad sha ka nongbah jong U Blei uba im, ka Jerusalem kaba kynja bneng, ha kaba la don bun hajar ki angel.

²³ Phi la wan sha ka jingïalumlang kaba kmen jong ki khun shynrang ba la kha nyngkong jong U Blei, kiba ïa ki kyrteng jong ki la thoh ha bneng. Phi la wan sha U Blei uba long u nongbishar ki bynriew baroh, bad sha ki mynsiem jong ki briew kiba bha ïa kiba la pynjanai.

²⁴ Phi la wan sha U Jisu, uba la pynlong ïa ka jutang bathymmai, bad sha ka snam ba la synreit, kaba kular bun kiei kiei kiba kham bha ban ïa ka snam u Abel.

²⁵ Te, to sumar bad wat kyntait ban shahshkor ïa uta uba kren. Kita kiba kyntait ïa uta uba ïathuh ïa ka khubor ba kynja bneng ha pyrthei kim shym lait im. Sa katno tam ma ngi, ngin ïohlait im, te, lada ngi phai noh na uta uba kren na bneng.

²⁶ Ka sur jong u ka la pynkhynñiuh ïa ka khyndew ha kata ka por, hynrei mynta u la kular, “Sa shisien pat ngan pynkhynñiuh ym tang ïa ka khyndew hynrei ïa ka bneng kumjuh.”

²⁷ Ki ktien “sa shisien pat” ki pyn-i shai ba ïa kiei kiei kiba la thaw yn pynkhynñiuh bad yn weng noh, khnang ba ïa kiei kiei ki bym lah ban pynkhynñiuh yn pynneh.

²⁸ Te, to ngin long kiba sngewnguh, namar ngi ïohpdiang ïa ka hima ka bymlah pynkhih. To ngin long kiba sngewnguh bad mane ïa U Blei ha ka rukom ka ban pynsngewbha ïa u, da ka jingsngew burom bad ka jingtiengburom;

²⁹ namar ba U Blei jong ngi u long shisha ka ding kaba bam duh.