HEBRU 11 - Khasi CL Bible (BSI)

Ka jingngeit

¹ Ban ngeit ka long ban sngewskhem ïa kiei kiei ïa kiba ngi kyrmen, ban sngewthikna ïa kiei kiei kiba ngim lah ban ïohi.

² Ka dei da ka jingngeit jong ki, ba ki briew ha ki por mynbarim ki ïohpdiang ïa ka jingsngewbha jong U Blei.

³ Ka long da ka jingngeit ba ngi sngewthuh ba la pynlong ïa ka pyrthei da ka ktien U Blei, khnang ba ïa kaei kaba lah ban ïohi la pynlong na kaei ka bymlah ban ïohi.

⁴ Dei ka jingngeit kaba la pynlong ïa u Abel ban ainguh ha U Blei ïa ka jingkñia kaba kham bha ban ïa ka jong u Kain. Lyngba ka jingngeit jong u, u la ïohpdiang ka jingsngewbha U Blei kum u briew uba hok, namar U Blei hi u la pdiang ïa ki jingai sngewbha jong u. Da kata ka jingngeit, u Abel u dang ïai kren wat haba u la ïap.

⁵ Dei ka jingngeit kaba ïada ïa u Enokh na ka jingïap. Pynban, la rah ïa u sha U Blei, bad ym don uno uno uba lah ban shem ïa u, namar U Blei u la rah ïa u shajrong. Ka Jingthoh Bakhuid ka ong ba shuwa ban rah ïa u Enokh shajrong, u la pynsngewbha ïa U Blei.

⁶ Ym don uno uno uba lah ban pynsngewbha ïa U Blei khlem ka jingngeit, naba uta uba wan sha U Blei u dei ban don ka jingngeit ba U Blei u don, bad ba u ainong ïa kita kiba wad ïa u.

⁷ Dei ka jingngeit kaba la pynlong ïa u Noah ban shahshkor ïa ki jingmaham U Blei shaphang kiei kiei ki ban sa jia ïa kiba um shym lah ban ïohi. U la kohnguh ïa U Blei bad u la thaw ïa ka ïinglieng ha kaba ma u bad ka longïing jong u ki la ïohlait im. Da kane, la pynrem ïa ka pyrthei, bad u Noah u la ïohpdiang na U Blei ïa ka hok kaba wan da ka jingngeit.

⁸ Dei ka jingngeit kaba pynlong ïa u Abraham ban kohnguh haba U Blei u la khot ïa u ban leit sha ka ri kaba U Blei u la kular ban ai ha u. U la mihnoh na la ka ri khlem tip shano ba un leit.

⁹ Da ka jingngeit u la im kum u nongwei ha ka ri ha kaba U Blei u la kular ïa u. U la shong ha ki ïingjaiñ, kumta ruh u Isaak bad u Jakob, kiba la ïohpdiang ïa kajuh ka jingkular na U Blei.

¹⁰ Naba u Abraham u la ap khmih ïa ka nongbah kaba U Blei u la pynwandur bad u la tei, ka nongbah kaba don ki nongrim baneh.

¹¹ Dei ka jingngeit kaba la pynlong ïa u Abraham ban ïoh long u kpa, wat haba u la tymmen bha bad ka Sarah hi kam lah ban ïoh khun. U la shaniah ba U Blei un bat ïa la ka kular.

¹² La u Abraham u la ïap shisha, na une uwei u briew, la mih bun kiba hiarpateng kat ki khlur ha ka sahit bneng, kat u shyiap bymlah ñiew shuh harud duriaw.

¹³ Dei ha ka jingngeit ba kine ki briew baroh ki la ïap. Kim shym la ïohpdiang ïa kiei kiei ïa kiba U Blei u la kular, hynrei na sha jngai ki ïohi ïa ki bad ki pdiang sngewbha ïa ki, bad ki la pynbna paidbah ba ki la long ki nongwei bad ki sohshnong ha kane ka pyrthei.

¹⁴ Kito kiba ong ïa kita kiei kiei, ki ong shai ba ki ïawad ïa ka ri la ka jong hi.

¹⁵ Kim shym la im sngi ban pyrkhat ïa kata ka ri ïa kaba ki la iehnoh; lada ki leh kumta, kin jin da la ïoh ka kabu ban leit phai pat.

¹⁶ Pynban, ka ri kaba ki kwah hir hir ka long ka ri kaba kham bha, ka ri ba kynja bneng. Bad kumta U Blei um sngewlehrain ïa ki, ba yn khot ïa u, U Blei jong ki, namar u la pynkhreh ka nongbah na ka bynta jong ki.

¹⁷ Dei ka jingngeit kaba pynlong ïa u Abraham ban ai kum ka jingkñia ïa u Isaak u khun jong u, mynba U Blei u la tynjuh ïa u Abraham. U Abraham u la long uta ïa uba U Blei u la ïateh kular, la katta ruh u long la kloi ban ai ïa la u khun marwei kum ka jingkñia.

¹⁸ U Blei u la ong ha u, “Dei lyngba u Isaak ba men ïoh ïa ki khun ki ksiew kiba nga la kular.”

¹⁹ U Abraham u da kheiñ ba U Blei u lah ban pynmihpat ïa u Isaak na ka jingïap — bad kum ban shu ong, u Abraham u la ïohpdiang pat ïa u Isaak na ka jingïap.

²⁰ Dei ka jingngeit kaba pynlong ïa u Isaak ban kular ïa u Jakob bad u Iso da ki jingkyrkhu ki ban sa wan.

²¹ Dei ka jingngeit kaba la pynlong ïa U Jakob ha shuwa ba un ïap ban kyrkhu ïa uwei pa uwei u khun shynrang jong u Joseph. U la shan ha ka tduh u diengduh jong u bad u la mane ïa U Blei.

²² Dei ka jingngeit kaba pynlong ïa U Joseph, ha shuwa ba un ïap, ban kren shaphang ka jingmihnoh ki khun Israel na Ijipt, bad ai ka jingbthah shaphang kaei ba ki dei ban leh ïa ka met jong u.

²³ Dei ka jingngeit kaba pynlong ïa ki kmie ki kpa u Moses ban buhrieh ïa u lai bnai hadien ba la kha ïa u. Ki la ïohi ba u la long u khunlung uba bhabriew, bad kim shym la sheptieng ban pynkheiñ ïa ka hukum u Pharaoh.

²⁴ Dei ka jingngeit kaba la pynlong ïa u Moses, haba u la rangbah, ban kyntait ba yn khot ïa u, u khun jong ka khun u Pharaoh.

²⁵ U la kham jied ban shahshitom bad ki briew jong U Blei ban ïa kaba lehkmen ha ka pop katto katne por.

²⁶ U la ñiew ba ka jingshah krenbeiñ na ka bynta U Messaïah ka long kaba kham kordor bun shah ban ïa ka spah baroh jong ka ri Ijipt, naba u khmih lynti ïa ka bainong ka ban sa wan.

²⁷ Dei ka jingngeit kaba la pynlong ïa u Moses ban mihnoh na ka ri Ijipt khlem da sheptieng ïa ka jingbitar u Pharaoh. Ka la long kumba u la ïohi ïa U Blei u bym lah ban ïohi, u la kyntait ban phai dien.

²⁸ Dei ka jingngeit kaba la pynlong ïa u ban pynskhem ïa ka Jingkhawai Niam Ka Jinglait, bad hukum ban synreit ïa ka snam ha ki jingkhang, ba u Angel jong ka Jingïap un ym pynïap ïa ki khun shynrang ba la kha nyngkong jong ki Israel.

²⁹ Dei ka jingngeit kaba la pynlong ïa ki khun Israel ba kin lah ban ïaid lyngba ïa ka Duriaw Basaw la kum ha ka dewryngkhiang; haba ki nong Ijipt ki la pyrshang ban leh kumta, ka um ka la tyllep noh ïa ki.

³⁰ Dei ka jingngeit kaba la pynlong ïa ki kynroh ka Jerikho ban kyllon, hadien ba ki khun Israel ki la ïaid tawiar sawdong ïa ki, hynñiew sngi.

³¹ Dei ka jingngeit kaba la ïada ïa ka Rahab ka nuti na kaba shah pynïap lem bad kito ki bym shym la kohnguh ïa U Blei; naba ka la pdiang sngewbha ïa ki nongsyntiat na Israel.

³² Hato ngan dang ïai bteng? Ngam don por shibun ban ïathuh shaphang u Gideon, u Barak, u Samson, u Jepthah, u Dabid, u Samuel bad ki nongïathuhlypa.

³³ Da ka jingngeit ki la ïaleh pyrshah ïa baroh ki hima bad ki la jop. Ki la leh ïa kaei kaba dei hok bad ki la ïohpdiang ïa kaei kaba U Blei u la kular.

³⁴ Ki la set ïa ki shyntur jong ki sing, ki la pynlip ïa ki ding kiba klang, ki la lait im na kaba shah pynïap da ka waitlam. Ki la long kiba tlot, hynrei ki la kylla long kiba khlaiñ; ki la long kiba khlaiñbor ha ka thma bad ki la jop ïa ki kynhun shipai nongwei.

³⁵ Da ka jingngeit, ki kynthei ki la ïohpdiang ïa ki ba-ha-ïing kiba la ïap ïa kiba la pynim pat. Kiwei pat, kiba kyntait ban pdiang ïa ka jinglaitluid, ki la ïap ha ka jingshah pynshitom beiñ khnang ba yn pynmihpat sha ka jingim kaba kham bha.

³⁶ Ïa ki katto katne la rkhiebeiñ bad sympat, bad ïa kiwei pat la teh ha ki kynjri bad la set phatok ïa ki.

³⁷ La lynthem maw ïa ki, la ot arliang ïa ki, la pynïap ïa ki da ka waitlam. Ki la ïaid kylleng, ki da phong da ki jaiñ snieh langbrot lane snieh blang — ha ka jingduk, ha ka jingshah pynshitom, bad ha ka jingshah lehbeiñ.

³⁸ Ka pyrthei kam shym long kaba bha na ka bynta jong ki! Kum ki nongphetwir ki shang kylleng ha ki ri shyiap bad sha ki lum, ki da shong ha ki krem bad ha ki thliew kiba don ha ka khyndew.

³⁹ Ïa kine baroh la buh jingthoh naba ki la jop da ka jingngeit! hynrei kim shym la ïohpdiang ïa kaei kaba U Blei u la kular.

⁴⁰ Namar ba U Blei u la pynkhreh lypa ïa kaei kaei kaba kham bha na ka bynta jong ngi. Ka jingthmu jong u ka la long ba tang ha ka jingïadon ryngkat bad ngi ba yn pynjanai ïa ki.