HEBRU 10 - Khasi CL Bible (BSI)

¹ Ka Hukum ki Jiw kam dei ka nuksa ba-pura bad baïaineh jong kiei kiei kiba shisha; ka long tang ka nuksa batlot jong kita kiei kiei kiba bha ki ban sa wan. Ïa kijuh ki jait jingkñia la ju ainguh lynter, na kawei ka snem sha kawei pat ka snem. Kumno kata ka Hukum, te, da kaba leh ïa kine ki jingkñia kan lah ban pynjanai ïa ki briew kiba wan sha U Blei?

² Lada ïa u paidlang uba mane ïa U Blei la pynkhuid phar na ki pop jong ki, kin ym sngewrem shuh ïa la ka pop, bad ki jingkñia ainguh baroh kin ym don shuh.

³ Kumba ka long, namarkata, ki jingkñia ainguh ki don na kawei ka snem sha kawei pat ka snem ban pynkynmaw ïa ki briew shaphang ki pop jong ki.

⁴ Namar ka snam ki masi kyrtong bad ki blang kan ym lah ban kit noh ïa ki pop.

⁵ Namar kane ka daw, haba U Khrist u la dei ban wan sha kane ka pyrthei u la ong ha U Blei: “Mem kwah ïa ki jingkñia bad ïa ki jingainguh, hynrei me la pynkhreh ka met na ka bynta jong nga.

⁶ Mem shym la sngewbha ïa ki mrad kum ka jingainguh thang halor ka duwan lane ïa ki jingkñia ban shim noh ïa ki pop.

⁷ Te nga la ong, ‘Nga hangne, ban leh ïa ka mon jong me, A Blei, kumba la thoh shaphang jong nga ha ka kitab ka Hukum.’ ”

⁸ Ha kaba nyngkong u la ong, “Mem shym la mon lane mem shym la sngewbha ïa ki jingkñia bad ïa ki jingainguh lane ïa ki mrad ban thang ha ka duwan bad ïa ki jingkñia ïa ka ban kit noh ïa ki pop.” U la ong ïa kane wat haba ïa baroh ki jingkñia la ainguh kat kum ka Hukum.

⁹ Nangta u la ong, “Nga hangne, A Blei, ban leh ïa ka mon jong me.” Kumta U Blei u la pynsangeh noh ïa baroh ki jait jingkñia kiba rim bad u la pynlong ba ka jingkñia U Khrist kan mih bujli ha ka jaka jong ki.

¹⁰ Namar ba U Jisu Khrist u la leh ïa kaei kaba U Blei u kwah ïa u ban leh, ïa ngi baroh la pynkhuid na ka pop da ka jingainguh kaba u la aiti ïa la ka jong ka met tang shisien hi.

¹¹ Man la u lyngdoh Jiw, u trei ïa la ka kam man ka sngi bad ai kijuh ki jingkñia man ka por; hynrei kine ki jingkñia kim lah ban kit noh ïa ki pop.

¹² Hynrei U Khrist u la ainguh shisien kñia namar ki pop, ka jingainguh kaba dap biang junom, bad hadien u la shong ha ka liang kamon jong U Blei.

¹³ Hangta u ap mynta tad ynda U Blei u la pyndem ïa ki nongshun jong u kum ka jingïuhkjat hapoh ki kjat jong u.

¹⁴ Te da kawei ka jingkñia, u la pynjanai ha la ka rta ïa kito kiba la pynkhuid na ka pop.

¹⁵ Bad U Mynsiem Bakhuid ruh u ai ha ngi ïa ka sakhi jong u. Nyngkong u ong,

¹⁶ “Kane ka long ka jutang ïa kaba ngan pynlong bad ki, ha ki sngi ki ban sa wan, ong U Trai: Ngan buh ïa ki hukum jong nga hapoh ki dohnud jong ki bad thoh ïa ki ha ki jingmut jingpyrkhat jong ki.”

¹⁷ Bad nangta u ong, “Ngan ym kynmaw shuh ïa ki pop jong ki bad ïa ki jingleh palat jong ki.”

¹⁸ Kumta haba la map ïa kine, ym donkam shuh ka jingainguh ban kit noh ïa ki pop.

To ngin wan hajan U Blei

¹⁹ Ngi don, namar kata, ko parabangeit jong nga ïa ka jinglaitluid ba-pura ban rung shapoh ka Jaka Kaba Kyntang Tam da kata ka jingïap U Jisu.

²⁰ U la plie namar jong ngi ïa ka lynti kaba thymmai, ka lynti kaba im, lyngba kata ka jingkah — kata ka long, lyngba ka met jong u hi.

²¹ Ngi don u lyngdoh uba khraw uba peit ïa ka ïing U Blei.

²² Kumta to ngin wan sha jan U Blei da ka dohnud kaba sngur bad da ka jingngeit kaba skhem, da ki dohnud ïa kiba la pynkhuid na ka jingsngew rem ryngkat bad ki met ïa kiba la sait da ka um kaba khuid.

²³ To ngin batskhem da ka jingkyrmen ïa kaba ngi ïaphla, namar ngi lah ban shaniah ba U Blei u bat ïa la ka kular.

²⁴ To ngin pyrkhat khia uwei ïa uwei pat, ban ïarap uwei ïa uwei pat, ban pynpaw ïa ka jingïa-ieit bad ban lehbha.

²⁵ Wat ai ba ngin iehnoh ïa ka jingmlien ban ïaseng lang, kumba don kiba leh. Pynban, to ngin pynshlur uwei ïa uwei pat, khamtam haba phi ïohi ba ka Sngi U Trai ka la nang jan.

²⁶ Naba yn ym don shuh kano kano ka jingkñia kaba lah ban kit noh ïa ki pop lada ngi ïai leh pop hadien ba ngi la tip ïa ka jingshisha.

²⁷ Pynban, kaei kaba dang sah ka long ban ap da ka jingsheptieng ïa ka Jingbishar ka ban sa wan bad ïa ka ding kaba klang ka ban sa bam duh ïa kita kiba ïaleh pyrshah ïa U Blei!

²⁸ Uno uno u bymkohnguh ïa ka Hukum u Moses u shah pynïap khlem jingisynei haba la bishar pynrem halor ka sakhi jong ki ar ngut ne bun ki nongsakhi.

²⁹ Te, kaei kan long ïa u briew uba ñiewbeiñ ïa U Khun U Blei? uba ñiew dew thala ïa ka snam jong ka jutang U Blei kaba pynkhuid ïa u na ka pop? uba ñiewbeiñ ïa U Mynsiem ka jingaiei? To pyrkhat haduh katno kan long ka jingpynshitom kaba kham shyrkhei kaba u dei ban ïoh!

³⁰ Namar ngi tip uei uta uba la ong, “Ngan sa pynhiarkput, ngan siew kylliang;” bad uba la ong ruh, “U Trai un bishar ïa la ki briew.”

³¹ Ka long kaei kaei kaba shyrkhei ban hap ha ki kti jong U Blei uba im!

³² To kynmaw kumno ka la long bad phi ha ka por mynshuwa. Ha kito ki sngi, hadien ba ka jingshai U Blei ka la tyngshaiñ ha phi, phi la shahshitom shibun kiei kiei, pynban phim shym la shahjop ha kata ka jingïaleh.

³³ Hateng hateng phi la shah krenbeiñ bad shah lehbeiñ ha kaba paw, bad ha kiwei pat ki por phi long la kloi ban don bynta bad kito kiba la shah leh ha kane kajuh ka rukom.

³⁴ Phi shahshitom lem bad ki koidi, bad haba ki jingdon jingem jong phi baroh ki la shah kurup, phi la shah ïa la ka jingduh da kaba kmen, namar phi la tip ba phi la ïoh kam kynti shibun kiei kiei kiba kham bha, kiba neh junom.

³⁵ To wat duh noh ïa la ka jingshlur, te, namar ka wallam bad ka, ïa ka bainong kaba khraw.

³⁶ Phi donkam ban long kiba ïaishah, khnang ba phi lah ban leh ïa ka mon U Blei bad ïohpdiang ïa kata kaba u kular.

³⁷ Naba ka Jingthoh Bakhuid ka ong, “Namar sa tang shibit eh, bad uta uba wan un wan; un ym slem shuh.

³⁸ La katta ruh, ki briew jong nga kiba hok kin ngeit bad kin im; hynrei lada uno uno na ki u phai dien ngan ym sngewbha shuh ïa u.”

³⁹ Ngim long ki briew kiba phai dien bad kiba jot noh. Pynban, ngi don ka jingngeit bad la pynim ïa ngi.