HEBRU 1 - Khasi CL Bible (BSI)

Ka Ktien U Blei da U Khun jong u

¹ Ha ki por mynbarim, U Blei u la kren ha ki kpa tymmen jong ngi bunsien bad ha ki rukom kiba bun lyngba ki nongïathuhlypa.

² Hynrei ha kine ki sngi kiba khatduh u la kren ha ngi lyngba U Khun jong u. U la long uta da uba U Blei u la thaw ïa ka pyrthei, uta ïa uba U Blei u la jied ban long u nongïoh kynti ïa kiei kiei baroh ha kaba kut.

³ U pynpaw ïa ka jingtyngshaiñ ka burom U Blei bad u ïasyriem thik bad ka dur U Blei hi, uba kyrshan ïa ka pyrthei da ka ktien badonbor jong u. Hadien ba u la ïohpdiang ka jingmap ïa ki pop u khunbynriew, u la shong ha bneng ha ka liang kamon jong U Blei, U Bakhrawbor Tam.

Ka jingkhraw jong U Khun U Blei

⁴ Ïa U Khun la pynlong uba kham khraw ban ïa ki angel, kumba ka kyrteng kaba U Blei u la ai ha u ka long kaba kham khraw ban ïa ka jong ki.

⁵ Namar U Blei um shym la ong ha uno uno na ki angel jong u, “Me long u khun jong nga; mynta ka sngi nga la long U Kpa jong me.” Lymne U Blei um shym la ong shaphang uno uno u angel, “Ngan long U Kpa u jong u bad un long u khun jong nga.”

⁶ Hynrei haba U Blei u la dei ban phah ïa U Khun ba la kha nyngkong sha ka pyrthei, u la ong, “Baroh ki angel U Blei ki dei ban mane ïa u.”

⁷ Hynrei shaphang kita ki angel U Blei u la ong, “U Blei u la pynlong ïa la ki angel kum ki lyer, bad ïa ki shakri jong u kum ki thylliej ding.”

⁸ Hynrei ïa U Khun, U Blei u la ong: “Ka hima jong me, A Blei, kan neh junom la junom! Me synshar halor la ki briew da ka hok.

⁹ Me ieit ïa kaei kaba dei bad me isih ïa ka bymdei. Namarkata U Blei, U Blei jong me, u la jied ïa me bad u la ai ha me ïa ka jingkmen ka jingpyndonburom kaba kham khraw ban ïa kaba u ai ïa ki paralok jong me.”

¹⁰ U la ong ruh, “Me, A Trai, ha kaba mynnyngkong me la thaw ïa ka pyrthei, bad da la ki kti hi me la thaw ïa ki bneng.

¹¹ Kita kin jah noh, hynrei me men ïaisah; baroh kin sa jot noh kum ki jaiñ.

¹² Men khylliap noh ïa ki kum ka sopti-lor, bad yn bujli ïa ki kum ïa ki jaiñ, hynrei me long borabor ujuh, bad ka jingim jong me kan ym kut shuh.”

¹³ U Blei um ju ong ha uno uno na ki angel jong u: “Shong hangne ha ka liang kamon jong nga haduh ba ngan da pynlong ïa ki nongshun jong me ba kin long kum ka jingïuhkjat hapoh ki kjat jong me.”

¹⁴ Ki angel ki dei kiei, te? Ki dei ki mynsiem kiba shakri ïa U Blei bad ïa ki la phah da u ban ïarap ïa kito kiba dei ban ïohpdiang ïa ka jingpynim.