HAGGAI 2 - Khasi CL Bible (BSI)

Ka jingiphuh jong ka Templ kaba thymmai

¹ Ha ka sngi kaba arphew wei jong u bnai uba hynñiew ha kata kajuh ka snem, U Trai u la kren biang lyngba u Haggai u nongïathuhlypa.

² U la ong ïa u Haggai ban kren ha u Serubbabel, u lat ka Judah, ha u Joshua, u Rangbah Lyngdoh, bad ha ki paidbah, bad ban ong ha ki,

³ “Hato don uno uno hapdeng jong phi uba dang kynmaw katno ka jingiphuh ka Templ ka la ju long? Kumno phi ïohi ïa kane mynta? Ka paw kumba kam long ei ei ruh.

⁴ Hynrei mynta to wat duh jingkyrmen, mano mano ruh na phi. Leh la ka kam, naba nga long ryngkat bad phi.

⁵ Mynba phi la mihnoh na ri Ijipt, nga la kular ba ngan long lem bad phi borabor. Nga dang long lem bad phi, kumta wat sheptieng.

⁶ “Shen ngan pynkhih ïa ka bneng bad ka pyrthei, ïa ka khyndew bad ka duriaw.

⁷ Ngan pynkyllon ïa ki hima baroh, bad ïa ki jingkynshew yn wallam shane, bad ïa ka Templ yn pyndap da ka spah.

⁸ Ka rupa bad ka ksiar baroh ha ka pyrthei ka long ka jong nga.

⁹ Ka Templ kaba bathymmai kan kham iphuh ban ïa kaba rim, bad hangta ngan ai ha ki briew jong nga ïa ka jingdap kyrhai bad ka jingsuk.” U Trai Badonbor Baroh u la kren.

U nongïathuhlypa u twad jingmut na ki lyngdoh

¹⁰ Ha ka sngi kaba arphew saw jong u bnai uba khyndai ha ka snem kaba ar ba u Darius u la long u patsha, U Trai Badonbor Baroh u la kren biang ha u Haggai u nongïathuhlypa.

¹¹ U la ong, “Kylli ïa ki lyngdoh ban ai ka rai halor kane ka jingkylli:

¹² Tharai uno uno u shim ïa ka lyngkhot doh ba la pynkyntang na ka jingkñia bad u rah ha ka jingkhylliap jong ka jaiñkup jong u. Te lada u kum pyndei ïa la ka jaiñkup ha uno uno u kpu, ka jingbam ba la shet, ka waiñ, ka umphniang Olib, ne ka dei kano kano ka jait jingbam, hato kan pynlong ba la pynkyntang ruh ïa kata ka jingbam?” Haba la kylli ïa kata ka jingkylli, ki lyngdoh ki jubab, “Em.”

¹³ Nangta u Haggai u kylli, “Tharai ïa uno uno la pyntngit namar ba u la ktah ïa ka metïap. Te lada u ktah ïa kano kano na kine ki jingbam, hato kata kan pynlong ïa ki ruh ba la pyntngit?” Ki lyngdoh ki jubab, “Ho-oid.”

¹⁴ Nangta u Haggai u la ong, “U Trai u ong ba kata kajuh kaei kaei ka treikam ha ki briew jong kane ka hima bad ha baroh kiei kiei ba ki pynmih; bad baroh ba ki ai ha ka duwan ka long ba la pyntngit.”

U Trai u kular ïa ka jingkyrkhu jong u

¹⁵ U Trai u ong, “Hato phim ïohi ïa kaei kaba la jia ha phi? Ha shuwa ba phin sdang ban tei pat ïa ka Templ,

¹⁶ phi leit sha ka thup kew da kaba khmih lynti ban shem arspah kilo, hynrei yn don hangta tang shispah. Phin leit ban tong shispah litar ka waiñ na ka jingbuh hynrei phi shem tang sawphew.

¹⁷ Nga la phah ïa ki lyer ba-tyrkhong bad u phria ban pynjot ïa baroh kiba phi pyrshang ban thung, hynrei phim kylla-kaba-mut hi.

¹⁸ Mynta ka sngi ka dei ka sngi kaba arphew saw jong u bnai uba khyndai, ka sngi ha kaba la pyndep ïa ka nongrim jong ka Templ. Ha khmih kaei ka ban sa jia naduh mynta.

¹⁹ Wat la ym don kew ba dang sah, bad ki dieng sohwaiñ, ki diengsoh Dumbur, ki diengsoh Pomkranet, bad ki diengsoh Olib kim pat shym pynmih soh, pynban naduh mynta ngan kyrkhu ïa phi.”

Ka jingkular U Trai ïa u Serubbabel

²⁰ Ha kata kajuh ka sngi, kaba arphew saw jong u bnai, U Trai u la ai ha u Haggai ïa ka khubor kaba ar

²¹ ïa u Serubbabel, u lat ka Judah: “Nga la jan ban pynkhih ïa ka bneng bad ka khyndew

²² bad pynkyllon ïa ki hima bad pynkut ïa ka bor jong ki. Ngan pynkylla khongpong ïa ki kali ïapom bad ïa ki nongñiah jong ki; ki kulai kin ïap, bad ki nongshong kulai kin ïa-pynïap para ma ki.

²³ Ha kata ka sngi ngan shim ïa me, ko Serubbabel u shakri jong nga, bad ngan thung ïa me ban synshar ha ka kyrteng jong nga. Me long uta uba nga la jied.” U Trai Badonbor Baroh u la kren.