HAGGAI 1 - Khasi CL Bible (BSI)

Ka Hukum U Trai ban tei pat ïa ka Templ

¹ Ha ka snem kaba ar kaba u Darius u long u patsha ka Persia, ha ka sngi kaba nyngkong jong u bnai uba hynriew, U Trai u la kren lyngba u Haggai u nongïathuhlypa. Ka khubor ka la long na ka bynta u lat ka Judah, u Serubbabel u khun jong u Shealtiel, bad na ka bynta u Rangbah Lyngdoh, u Joshua u khun jong u Jehosadak.

² U Trai Badonbor Baroh u la ong ha u Haggai, “Kine ki briew ki ong ba kane kam dei ka por kaba biang ban tei pat ïa ka Templ.”

³ Te U Trai u la ai ïa kane ka khubor sha ki briew lyngba u Haggai u nongïathuhlypa:

⁴ Ko ki briew jong nga, balei ba ma phi phin shong ha ki ïing ba la shna bha katba ka Templ jong nga ka dang sah ha ki jingjot?

⁵ Hato phim ïohi ïa kaei kaba jia ha phi?

⁶ Phi la bet shibun u kew, hynrei phi la ot tang khyndiat. Phi don ka bam ban bam, hynrei kam biang kat ban pynkdang ïa phi. Phi don ka waiñ ban dih, hynrei kam biang kat ban pynbuaid ïa phi! Phi don ki jaiñkup, hynrei kam biang kat ban pynsyaid ïa phi. Bad u nongtrei um lah ban kamai kat ban biang ban im.

⁷ Hato phim ïohi balei kane ka wan jia?

⁸ Mynta to leit kiew sha ki lumrit, pynïoh ïa ki dieng shna ïing, bad tei pat ïa ka Templ; te ngan sngewbha ha ka bad ïa nga yn mane kumba ka dei.

⁹ “Phi la kyrmen ïa ki jingot kiba bun, hynrei ki la kylla long tang khyndiat. Bad haba phi la wanrah ïa ka jingot sha ïing, nga pynher ïa ka sha jngai. Balei ba nga la leh ïa kata? Namar ka Templ jong nga ka dang don ha ki jingjot katba uwei pa uwei na phi u bunkam ha ka jingtrei ïa la ka jong ka ïing.

¹⁰ Dei na kata ka daw ym shym don slap bad ym shym mih ei ei.

¹¹ Nga la wallam ïa ka jingtyrkhong ha ka ri — ha ki lumrit jong ka, ha ki lyngkha kew jong ka, ki bri sohwaiñ, ki brisoh Olib — ha baroh ki jingthung kiba ka khyndew ka pynmih, ha ki briew bad ki mrad, ha baroh kiba phi pyrshang ban pynmih.”

Ki briew ki kohnguh ïa ka Hukum U Trai

¹² Te u Serubbabel bad u Joshua bad ki briew baroh kiba la wan phai na ka jingshah ringmraw ha Babilonia, ki la leh ïa kaei kaba U Trai U Blei jong ki u la ong ïa ki ban leh. Ki la sheptieng bad ki la kohnguh ïa u Haggai u nongïathuhlypa, u nonglamktien jong U Trai.

¹³ Nangta u Haggai u la ai ïa ka khubor jong U Trai ha u paidbah: “Ngan long ryngkat bad phi — kata ka long ka jingkular jong nga.”

¹⁴ U Trai u la pynkhih mynsiem ïa uwei pa uwei ban trei ha ka Templ: U Serubbabel, u lat ka Judah; u Joshua, u Rangbah Lyngdoh, bad ki briew baroh kiba la wan phai na ka jingshah ringmraw. Ki la sdang ban trei ïa ka Templ jong U Trai Badonbor Baroh, U Blei jong ki,

¹⁵ ha ka sngi kaba arphew saw jong u bnai uba hynriew ha ka snem kaba ar jong ka jinglong Patsha u Darius.