HABAKKUK 3 - Khasi CL Bible (BSI)

Ka jingduwai u Habakkuk

¹ Kane ka long ka jingduwai u Habakkuk u nongïathuhlypa:

² A Trai, nga la ïohsngew ïa kaei ba me la leh, bad nga la dap da ka jingtiengburom. Mynta to leh biang ha ki por jong ngi ïa ki kam bakhraw kiba me la ju leh. To leh-isynei, wat haba me bitar.

³ U Blei u wan biang na Edom; U Blei bakhuid u wan na ki lumrit ka Paran. Ka burom jong u ka dap ïa ki bneng, bad ka pyrthei ka dap da ka jingïaroh ïa u.

⁴ U wan bad ka jingthaba ka leilieh; ka jingshai ka phalang na ka kti jong u, dei hangta ba ka bor jong u ka rieh.

⁵ U phah ïa ka jingpang ha shuwa jong u bad hukum ba ka jingïap kan bud ïa u.

⁶ Haba u sangeh, ka pyrthei ka khih; u tang shu peit, ki jaitbynriew ki kyiuh. Ki lumbah ba bymjukut ki khih; ki lumrit baneh junom ki ngam shapoh, ki lumrit ha kiba u ju ïaid ha ki por mynbarim.

⁷ Nga la ïohi ïa ki briew ka Kushan ba ki sheptieng bad ki briew ka Midian ki khynñiuh.

⁸ Hato la dei ki wah kiba la pynlong ïa me ban bitar, A Trai! Hato la dei ka duriaw kaba la pynlong ïa me ban bitar shla? Me shong kulai halor ki lyoh; u lyoh ka 'erïong u la long ka kali ïapom jong me, mynba me la wallam jingjop ha la ki briew.

⁹ Me pynkhreh ban pyndonkam ïa la ka ryntieh, me khreh ban siat ïa la ki khnam. Ka leilieh jong me ka pynpait ïa ka khyndew.

¹⁰ Haba ki lumbah ki la ïohi ïa me, ki kyiuh; ka um ka hap na ki sahit bneng. Ki um hapoh ka khyndew ki kyrhuh, bad ki jingat phyllung jong ki, ki kiew shalor.

¹¹ Ha ka jingthaba jong ki khnam baher stet bad ka jingtyngshaiñ na u sum baphyrnai, ka sngi bad u bnai ki sangeh hajuh.

¹² Me thom sawdong ka pyrthei ha ka jingbitar; ha ka jingbitar shla me ïuh halor ki jaitbynriew.

¹³ Me mihnoh ban pyllait ïa la ki briew, ban pyllait ïa u syiem ba la jied jong me. Me pynkyllon ïa u nongïalam jong ki bymman bad pynjot thiaw ïa ki nongbud jong u.

¹⁴ Ki khnam jong me ki sam lyngba ïa u nongïalam ka kynhun shipai jong u haba u la wan kum ka 'erïong ban pynsakma ïa ngi, da ka jingsarong kum kito kiba banbeiñ ïa kiba duk ha kaba rieh.

¹⁵ Me ïuh halor ka duriaw da ki kulai jong me, bad ki umbah ki thnam shaid.

¹⁶ Nga ïohsngew ïa kane baroh, bad nga kyiuh; ki rmiang shyntur jong nga ki khih da ka jingsheptieng. Ka met jong nga ka jem lwep, bad ki kjat jong nga ki jynthut hapoh jong nga. Ngan ap jar jar ïa ka por ka ban wan haba U Blei un pynshitom ïa kito kiba tur ïaleh ïa ngi.

¹⁷ Wat la ki dieng Dumbur kim don soh bad ym don sohwaiñ ba mih ha ki dieng sohwaiñ, wat la u dieng Olib um sei ei ei bad ki lyngkha kim pynmih kew, wat la ki langbrot baroh ki ïap bad ki sem masi ki thylli,

¹⁸ Ngan ïai lehkmen bad shadkmen, namar U Trai U Blei u long u nongpynim jong nga.

¹⁹ U Trai Nongsynshar u ai ha nga ka jingkhlaiñ. U pynlong ïa nga uba skhem ki kjat kum ka skei bad u sumar ïa nga halor ki lumbah.