HABAKKUK 2 - Khasi CL Bible (BSI)

Ka jubab U Trai ïa u Habakkuk

¹ Ngan kiew ïa ka jaka ap phira jong nga bad ap ban khmih ïa kaei kaba U Trai un ïathuh ha nga ban ong bad kaei ka jubab ba un ai halor ka jingmudui jong nga.

² U Trai u la ai ïa kane ka jubab: “To thoh shai ha ki lyngkniap dewbyrtha ïa kaei ba ngan pynpaw ha me, khnang ban lah ban pule mar syn peit.

³ To buh ha ka jingthoh, namar kam pat dei ka por ba kan urlong. Hynrei ka por ka wan kloi, bad kaei kaba nga pyn-i ha me kan urlong. Ka i kumba ka wan suki jai, hynrei to ap ïa ka; kan sa jia long shisha, bad yn ym pyntud ïa ka.

⁴ Bad kane ka dei ka khubor: ‘Kito kiba bymman kin ym lait im, hynrei kito kiba hok kin im namar ki long kiba ïaineh ha U Blei.’”

Ka jingtim ïa ki bymhok

⁵ Ka spah ka long kaba shukor. Ki briew kiba lalot ki long kiba sarong bad bym lah ban shong khop — kum ka jingïap hi da lei lei kim ju hun. Namarkata ki jop ïa kawei ka hima hadien kawei pat na ka bynta ïa lade.

⁶ Ki briew kiba la shahjop ki beiñ pyrshah ïa kiba jop ïa ki bad ki pyn-i jingisih ïa ki. Kin ong, “Phi shim ïa kaei ka bym dei ka jong phi, hynrei phi long ba la tim! Katno slem phin ïailong kiba riewspah da kaba pynbor ïa ki nongshim ram jong phi ban siew noh?”

⁷ Hynrei ha shuwa ba phin tip ïa ka, phi kiba la jop ïa kiwei phin don ha ka ram ïa lade bad shah pynbor ban siew ïa ka sut. Ki nongshun kin wan bad pynkyiuh ïa phi. Kin thombor ïa phi!

⁸ Phi la thombor ïa ki briew jong ki hima kiba bun, hynrei mynta kito kiba la lait im kin thombor ïa phi namar ki kam pynïap briew ba phi la leh bad namar ki jingleh jubor jong phi pyrshah ïa ki briew jong ka pyrthei bad ki nongbah jong ka.

⁹ Phi long ba la tim! Phi la pynriewspah ïa la ka longïing da kaei kaba phi la shim da kaba leh jubor, bad phi la pyrshang ban pynlong ïa la ka ïing kaba lait na ki jingpynmynsaw bad jingma!

¹⁰ Hynrei ki buit jong phi ki wanrah ka jinglehrain ha la ka longïing; da kaba pynjot ïa ki jaitbynriew babun phi la wallam tang ka jingjot ha lade.

¹¹ Wat ki maw ha ki kynroh ki kyang pyrshah ïa phi, bad ki shankhung ki pynsawa ïa ka jingkyang.

¹² Phi long ba la tim! Phi la buh nongrim ïa ka nongbah halor ka kam runar bad la tei ïa ka da ka kam pynïap briew.

¹³ Ki jaitbynriew kiba phi la jop ki la pynshohthait ïa lade da ka jingtrei bymmyntoi, bad baroh kaba ki la tei la bam duh ha ka ding. U Trai Badonbor Baroh u la leh ïa kane.

¹⁴ Hynrei ka pyrthei kan long ba la dap da ka jingtip ïa ka burom U Trai kumba ki duriaw ki dap da ka um.

¹⁵ Phi long ba la tim! Ha ka jingbitar shla jong phi, phi la pynpoh bad pynjahburom ïa la ki paramarjan; phi pynlong ïa ki ban ïaid sheng sheng kum kiba la buaid.

¹⁶ Markylliang yn tap ïa phi da ka jinglehrain ha ka jaka ka burom. Phi ruh phin ïadih bad ïaid sheng sheng. U Trai un pynlong ïa phi ban dih na la ka khuri jong ka jingpynshitom, bad ka burom jong phi kan kylla sha ka jingjahburom.

¹⁷ Phi la pynduh ïa ki khlaw ka Lebanon; mynta yn pyndkut ïa phi. Phi la pynïap ïa ki mrad ha ka; mynta ki mrad kin pyntriem ïa phi. Kane kan jia namar ki kam pynïap ba phi la leh bad namar ki kam leh jubor pyrshah ïa ki briew jong ka pyrthei bad ki nongbah jong ka.

¹⁸ Kaei ka jingdonkam jong ka bleithaw? Ka long tang kaei kaei kaba la thaw da u briew, bad kam kren ei ei hynrei ka shukor. Kaei kaba bha ba ka leh ïa u nongthaw ba un shaniah ha ka — U Blei u bym lah wat ban kren!

¹⁹ Phi long ba la tim! Phi ong ha ka lyngkhot dieng, “Khie noh!” ne ïa u maw, “Ïeng joit!” Hato ka bleithaw ka lah ban pynpaw ei ei ïa phi? Lah ban suit ïa ka da ka rupa bad ka ksiar, hynrei ym don jingim ha ka.

²⁰ U Trai u don ha ka Templ bakhuid jong u; to ai ba uwei pa uwei ha ka pyrthei un sngap jar ha khmat jong u.