HABAKKUK 1 - Khasi CL Bible (BSI)

¹ Kane ka long ka khubor ba U Blei u la pynpaw ha u Habakkuk u nongïathuhlypa.

U Habakkuk u mudui ïa ka jingbishar bymhok

² A Trai, katno slem nga dei ban pyrta jingïarap ha shuwa ba men shahshkor, ha shuwa ba men pyllait im ïa ngi na ka jingleh jubor?

³ Balei ba me pynlong ïa nga ban ïohi ïa kaba kum kane ka jingjynjar? Kumno me lah ban shu peit ïa kaba kum kane ka jingleh bymdei? Ka jingpynjot bad ka jinglehbor ki don baroh sawdong jong nga, bad ka don ka jingïaleh bad jingïakajia ha kylleng.

⁴ Ka aiñ ka tlot bad kam myntoi ei ei, bad ym ju don ka jingbishar hok. Ki briew kiba sniew ki ïoh ïa kaba kham bha ban ïa kiba hok, bad kumta ïa ka jingbishar hok la pynjngut.

Ka jubab na U Trai

⁵ Te U Trai u la ong ha la ki briew, “To khmih thuh ïa ki jaitbynriew sawdong jong phi, bad phin lyngngoh ïa kaei kaba phi ïohi. Ngan leh ei ei kaba phin ym lah ngeit haba phi ïohsngew shaphang jong ka.

⁶ Ngan wanrah ïa ki nong Babilonia ban don ha ka bor, kito kiba triem, ki briew bym lah ban shong khop. Ki leit kylleng ka pyrthei ban jop ïa kiwei ki ri.

⁷ Ki wallam ïa ka jingtieng bad jingpyntriem, bad ha ka jingsarong jong ki, ki shim ïa ka aiñ ha lade.

⁸ “Ki kulai jong ki, ki kham stet ban ïa ki 'labasa, kham shyrkhei ban ïa ki suri bathngan. Ki nongshong kulai jong ki, ki wan tur na ki jaka ba sha jngai; ki kulai jong ki, ki trud ïa ka khyndew. Ki wan suh wia kum ki pukni kiba tur ha ka jingbam.

⁹ “Ki kynhun shipai jong ki, ki tur jubor sha khmat ban jop, bad uwei pa uwei u la sngewtriem katba ki nang tur. Kiba shah kem ki bun bah kum u shyiap.

¹⁰ Ki ñiewbeiñ ïa ki syiem bad ki rkhiebeiñ ïa ki rangbah synshar ba-halor. Ym don ka kut kaba lah ban pynsangeh ïa ki — ki kynton ïa ka khyndew pyrshah ïa ka bad ki knieh ïa ka.

¹¹ Nangta ki her noh kum ka lyer bad ki jah syndon, kine ki briew kiba ka bor ka long u blei jong ki.”

U Habakkuk u mudui biang ha U Trai

¹² A Trai, naduh kaba nyngkong eh me long U Blei. Me long U Blei jong nga, uba khuid bad uba bymjukut. A Trai, U Blei jong nga bad u nongïada, me la jied ïa ki nong Babilonia bad pynlong ïa ki, kiba khlaiñ khnang ba kin lah ban pynshitom ïa ngi.

¹³ Hynrei kumno me lah ban shah ïa kine ki riewshukor, ki briew kiba sniew? Ki khmat jong me ki khuid palat kat ban peit ïa kaba sniew, bad mem lah shah ban peit ïa ki briew ba leh bymdei. Te balei ba me shu sngap jar jar katba ki dang pynjot ïa ki briew kiba kham hok ban ïa ki?

¹⁴ Kumno me lah ban pynlong ïa ki briew kum ka dohkha lane kum ka kynhun ki khñiang ki bym don nongsynshar ban ïalam ïa ki?

¹⁵ Ki nong Babilonia ki kem ïa ki briew da ki khwai, la kumba ki dei ki dohkha. Ki ring ïa ki na ki jar bad ki risa da ka jingkmen ïa ka jingïoh jong ki!

¹⁶ Ki mane wat ïa ki jar tong dohkha jong ki bad ai jingkñia ha ki, namar ki jar jong ki, ki pyndap ïa ki da kiei kiei baroh kiba bha tam.

¹⁷ Hato kin pyndonkam ïa la ki waitlam junom bad ïai pynjot ïa ki jaitbynriew khlem jingisynei?