GALATIA 3 - Khasi CL Bible (BSI)

Ka Hukum ne ka jingngeit

¹ A phi ki nong Galatia kiba bieit! Uei uba la pynthame ïa phi? Ha khmat ki khmat jong phi hi la batai shai kdar ïa ka jingïap U Jisu Khrist halor ka diengphna!

² Ïathuh ha nga ïa kane kawei: Hato phi pdiang ïa U Mynsiem U Blei da kaba leh ïa kaei ba ka Hukum ka dawa ne da kaba ïohsngew ïa ka Gospel bad ngeit ïa ka?

³ Kumno phi dang sah bieit haduh katta katta! Haba phi la sdang da U Mynsiem U Blei, mynta phi kwah pat ban pynkut da la ka bor hi?

⁴ Hato baroh kaba phi la mad kam don jingmut ei ei? Da shisha ka don katto katne ka jingmut!

⁵ Hato U Blei u ai ïa U Mynsiem bad leh ïa ki kambah hapdeng jong phi namar ba phi leh ïa kaei kaba ka Hukum ka dawa ne namar ba phi ïohsngew ïa ka Gospel bad ngeit ïa ka?

⁶ To pyrkhat ïa ka jingïashem u Abraham, kumba ka Jingthoh Bakhuid ka ong, “U la ngeit ha U Blei, bad namar ka jingngeit jong u, U Blei u la pdiang ïa u kum uba hok.”

⁷ Phi dei ban sngewthuh te, ba ki khun ki ksiew bashisha jong u Abraham ki long ki briew kiba don ka jingngeit.

⁸ Ka Jingthoh Bakhuid ka la ong lypa ba U Blei un pynksan ïa ki Jentil ha lade hi da ka jingngeit. Bad kumta ka Jingthoh Bakhuid ka pynbna ïa ka khubor babha ha u Abraham: “Lyngba jong me, U Blei un kyrkhu ïa ka jaitbynriew baroh.”

⁹ U Abraham u la ngeit bad la kyrkhu ïa u; kumta ruh ïa baroh kiba ngeit la kyrkhu kumba la kyrkhu ïa u.

¹⁰ Kita kiba shaniah ha kaba kohnguh ïa ka Hukum ki im hapoh ka jingtim. Naba ka Jingthoh Bakhuid ka ong, “Uno uno ruh u bym ïai kohnguh ïa baroh kaba la thoh ha ka kitab ka Hukum u long hapoh ka jingtim U Blei!”

¹¹ Mynta, ka la shai kdar ba ym shym la pynksan ïano ïano ruh ha U Blei da ka Hukum, namar ka Jingthoh Bakhuid ka ong, “Tang uta ïa uba la pynksan ha U Blei da ka jingngeit un im.”

¹² Hynrei ka Hukum kam don ei ei ban leh bad ka jingngeit. Pynban kumba ka Jingthoh Bakhuid ka ong, “Jar uba leh ïa baroh ïa kaba ka hukum ka dawa un ïoh im.”

¹³ Hynrei, da kaba kylla long ka jingtim na ka bynta jong ngi, U Khrist u la siewspah ïa ngi na ka jingtim kaba ka Hukum ka wanrah; naba ka Jingthoh Bakhuid ka ong, “Uno uno uba la shah sdien ha u dieng un don hapoh ka jingtim U Blei.”

¹⁴ U Khrist u la leh ïa kane khnang ba ka jingkyrkhu kaba U Blei u la kular ha u Abraham kan ïoh wan ha ki Jentil da U Khrist Jisu, khnang ba lyngba ka jingngeit ngin ïohpdiang ïa U Mynsiem ba la kular da U Blei.

Ka Hukum bad ka jingkular

¹⁵ Ko parabangeit jong nga, ngan pyndonkam ïa ka nuksa kaba ju long man ka sngi: Haba ar ngut ki briew ki ïamynjur halor kano kano ka kam da kaba soi ïa ka soskular, ym don uno uno uba lah ban pynkheiñ ïa ka lane pyndap ei ei ha ka.

¹⁶ Mynta, U Blei u la pynlong ïa ki jingkular jong u ha u Abraham bad ha u nonghiarpateng jong u. Ka Jingthoh Bakhuid kam shym pyndonkam da ki kyntien “ki nonghiarpateng,” kaba thew shibun ki briew, hynrei ka pyndonkam da ka kyntien “u nonghiarpateng,” kaba mut tang uwei u briew, kaba mut U Khrist.

¹⁷ Kaei kaba nga mut ka long ba U Blei u la pynlong ïa ka jutang bad u Abraham bad u la kular ban bat ïa ka. Ka hukum, ïa kaba la ai hadien sawspah laiphew snem, kam lah ban pynkheiñ ïa ka jutang bad pyndam noh ïa ka jingkular U Blei.

¹⁸ Naba lada ka jingai U Blei ka shong ha ka Hukum, te ka jingaiei kam shong shuh ha ka jingkular jong u. Pynban ka long namar ka jingkular jong u ba U Blei u la ai ïa kata ka jingai sngewbha ha u Abraham.

¹⁹ Kaei te, ka jingthmu jong ka Hukum? La bynrap khnang ban pyn-i ïa kaei ba ka long ka jingpalat, bad la thmu ba kan neh haduh ka jingwan uta u nonghiarpateng jong u Abraham, ha uba la pynlong ïa ka jingkular. Ïa ka Hukum la aiti da ki angel, lem bad u briew uba ïeng kum u ksiang.

²⁰ Hynrei ïa u ksiang ym donkam haba treikam tang uwei u briew; bad U Blei u long uwei.

Ka jingthmu jong ka Hukum

²¹ Hato kane ka mut ba ka Hukum ka long pyrshah ïa ki jingkular U Blei? Em, ym dei kumta! Naba lada u khunbynriew u la ïohpdiang ïa ka Hukum kaba lah ban wanrah jingim, te uwei pa uwei u lah ban long uba la pynksan ha U Blei da kaba kohnguh ïa ka.

²² Hynrei ka Jingthoh Bakhuid ka ïathuh ba ka pyrthei hi baroh kawei ka don hapoh ka bor jong ka pop; bad kumta ïa ka jingai ïa kaba la kular halor ka nongrim jong ka jingngeit ha U Jisu Khrist la ai ïa kito kiba ngeit.

²³ Hynrei ha shuwa ka por ba ka jingngeit kan wan, ka Hukum ka set ïa ngi baroh kum ki koidi tad haduh ban da pynpaw ïa kane ka jingngeit.

²⁴ Bad kumta ka Hukum ka synshar ïa ngi tad haduh ba U Khrist u la wan, khnang ba yn lah ban pynksan ïa ngi ha U Blei da ka jingngeit.

²⁵ Mynta ba ka por ka jingngeit ka la poi, ka Hukum kam donbor shuh halor jong ngi.

²⁶ Ka dei lyngba ka jingngeit ba phi baroh phi long ki khun U Blei ha U Khrist Jisu.

²⁷ La pynbaptis ïa phi ha U Khrist, bad mynta la pynkup ïa phi, kumba ong, da ka jingim U Khrist hi.

²⁸ Kumta, ym don jingïapher hapdeng ki Jiw bad ki Jentil, hapdeng ki mraw bad kiba laitluid, hapdeng ki shynrang bad ki kynthei; phi baroh phi ïalong kawei ha U Khrist Jisu.

²⁹ Lada phi dei ki jong U Khrist, te, phi long ki nonghiarpateng u Abraham bad phin ïohpdiang ïa kaei kaba U Blei u la kular.