ESTHER 9 - Khasi CL Bible (BSI)

Ki Jiw ki pynjot ïa ki nongshun jong ki

¹ Ka sngi kaba khatlai jong u Adar ka la poi, ka sngi ha kaba yn pyntreikam ïa ka jingpynbna u syiem, ka sngi mynba ki nongshun jong ki Jiw ki la thmu ban pyndem ïa ki hapoh ka bor jong ki. Hynrei pynban, ki Jiw ki la jop halor jong ki.

² Ha ki jaka shong jaka sah ki Jiw ha baroh ki nongbah ha ka hima, ki Jiw ki la pynkhreh bha ïa lade ban tur ïaleh ïa kito kiba pyrshang ban pynmynsaw ïa ki. Ki briew ha kylleng ki la sheptieng ïa ki, bad ym don mano mano ba la ïeng pyrshah ïa ki.

³ Ha ka jingshisha, baroh ki rangbah synshar ki jylla — ki lat, ki nongsynshar, ki nongmihkhmat u syiem — ki la ïarap ïa ki Jiw namar baroh ki la sheptieng ïa u Mordekai.

⁴ Ka long kaba la tip ha kylleng sawdong ka hima ba u Mordekai u long mynta u briew uba donbor ha ka ïingsyiem bad u nang khrawbor.

⁵ Kumta ki Jiw ki lah ban leh ïa kaei kaba ki kwah ïa ki nongshun jong ki. Ki tur ïaleh ïa ki da ki waitlam bad ki pynïap ïa ki.

⁶ Ha Susa, ka nongbah jong ka hima, ki Jiw ki la pynïap sanspah ngut ki rangbah.

^7-10 Hapdeng jong ki don shiphew ngut ki khun shynrang jong u Haman u khun jong u Hammedatha, u nongshun jong ki Jiw; u Parshandatha, u Dalphon, u Aspatha, u Poratha, u Adalia, u Aridatha, u Parmashtha, u Arisai, u Aridai, bad u Baisatha. Hynrei ym shym la don ka jinglute.

¹¹ Ha kata kajuh ka sngi ïa ki briew ba la pynïap ha Susa la pyntip sha u syiem.

¹² Nangta u ong ha ka Esther ka mahadei, “Tang ha Susa ki Jiw ki la pynïap sanspah ngut ki rangbah, kynthup ïa ki shiphew ngut ki khun shynrang jong u Haman. Kaei kaba ki la dep leh shabar ha ki jylla! Kaei kaba pha kwah mynta? Phan ïoh ïa ka. Ïathuh ïa nga sa kaei pha kwah, bad phan ïoh ïa ka.”

¹³ Ka Esther ka jubab, “Lada phi sngewbha, ko syiem, to ai ba ki Jiw ha Susa kin leh biang la shai ka sngi ïa kaei kaba la shah ïa ki ban leh mynta ka sngi. Bad hukum ba ïa ki met jong ki shiphew ngut ki khun shynrang jong u Haman, yn sdien ha ka diengphasi.”

¹⁴ U syiem u la hukum ba ïa kane dei ban leh, bad ïa ka jingpynbna la pynmih ha Susa. Ïa ki met jong ki shiphew ngut ki khun shynrang u Haman la pyn-i paidbah.

¹⁵ Ha ka sngi kaba khatsaw jong u Adar ki Jiw jong ka Susa ki ïakynduh lang biang bad pynïap sa laispah ngut ki rangbah ha ka nongbah. Hynrei kumjuh, kim shym la lute.

¹⁶ Ki Jiw ha ki jylla ruh ki la ïa-ïeng ryntih bad ïada ïa lade. Ki la pyllait ïa lade na ki nongshun jong ki da kaba pynïap hynñiewphew san hajar ngut ki briew kiba shun ïa ki. Hynrei kim shym la lute.

¹⁷ Kane ka la long ha ka sngi kaba khatlai jong u Adar. Ha ka sngi kaba bud, kaba khatsaw, ym shym la don jingpynïap shuh, bad ki la pynlong ïa ka, ka sngi bakmen jong ka jingkhawai sngewbha.

¹⁸ Ki Jiw jong ka Susa pat, ki pynlong ïa ka sngi kaba khatsan, ka sngi shuti, namar ki la pynïap ïa ki nongshun jong ki ha ka sngi kaba khatlai bad kaba khatsaw bad nangta ki sangeh ha ka sngi kaba khatsan.

¹⁹ Kane ka long balei ba ki Jiw kiba shong basah ha ki shnongrit ki rakhe ïa ka sngi kaba khatsaw jong u bnai Adar kum ka sngi shuti bakmen, ka por jong ka jingkhawai sngewbha bad jingai sngewbha da ka jingbam iwei ïa iwei. Ka Jingkhawai Niam ki Purim.

²⁰ U Mordekai u la phah buh jingthoh ïa kine ki jingjia bad phah ki shithi sha baroh ki Jiw, kiba hajan bad hajngai, ha kylleng ka hima Persia,

²¹ da kaba ong ïa ki ban rakhe ïa ki sngi khatsaw bad khatsan jong u Adar kum ki sngi shuti man ka snem.

²² Kine ki long ki sngi ha kiba ki Jiw ki la pyllait ïa lade na ki nongshun jong ki; une u long u bnai ha uba la pynphai pat na ka por jong ka jingsngewsih bad jingduh jingkyrmen sha ka por jong ka jingsngewbha bad ka jingkmen. La ong ïa ki ban rakhe ïa kine ki sngi da kaba ïabam sngewbha bad lehkmen, da kaba ai jingai sngewbha da ka jingbam iwei ïa iwei pat bad ïa kiba duk.

²³ Kumta ki Jiw ki bud ïa ki jingbthah u Mordekai bad ka jinglehkmen ka la long ka rukom ba man ka snem.

²⁴ U Haman, u khun jong u Hammedatha — uba hiarpateng na u Agag bad u nongshun ka jaitbynriew Jiw — u la kynting sbai (lane kumba la khot ki “purim” ïa ki) ban buh ïa ka sngi na ka bynta ka jingpynjot ïa ki Jiw; u la thmu ban pynïap lut phar ïa ki.

²⁵ Hynrei ka Esther ka la leit sha u syiem bad u syiem u la pynmih ki hukum da ka jingthoh, kaba ka jingmih ka long ba u Haman u la shah ïa ka kupar kaba u la thmu na ka bynta ki Jiw — ma u bad ki khun shynrang jong u ki la shah sdien ha u diengphasi.

²⁶ Ka dei na kata ka daw ba ïa ki sngi shuti la khot ki Purim. Namar ka shithi u Mordekai bad namar baroh kaba la jia ha ki,

²⁷ ki Jiw ki pynlong ïa ka, ka aiñ na ka bynta ïa lade, ki khun ki ksiew jong ki bad mano mano ki ban kylla Jiw, ba ha ka por kaba dei man ka snem, ïa kine ki ar tylli ki sngi yn rakhe borabor kat kum ki jingbthah u Mordekai.

²⁸ La rai ba kawei pa kawei ka longïing ki Jiw jong ka pateng ban wan ha baroh ki probins bad ha baroh ki nongbah, ki dei ban kynmaw bad rakhe ïa ki sngi ki Purim ha ki por baroh ki ban wan.

²⁹ Te ka Esther ka mahadei, ka khun u Abihail, ryngkat bad u Mordekai, ki la thoh ruh ïa ka shithi, kaba pynkhlaiñbor ïa ka shithi shaphang ki Purim, kaba u Mordekai u la lah thoh mynshuwa.

³⁰ Ïa ka shithi la thoh sha baroh ki Jiw, bad ïa ki kopi la phah sha baroh ki shispah arphew hynñiew tylli ki jylla jong ka hima Persia. Ka shithi ka kyrmen ïa ka jingsuk bad jingshongshngain ki Jiw

³¹ bad ka bthah ruh ïa ki bad ïa ki khun ki ksiew jong ki ban rakhe ïa ki sngi ki Purim ha ka por ba dei, kumba ki la thaw ïa ki aiñ na ka bynta ka jingrakhe ïa ki jingshah jingit bad ki por ka jingïambriew. Ïa kane la hukum da baroh ar ngut, u Mordekai bad ka Esther ka mahadei.

³² Ïa ka hukum ka Esther, kaba pynskhem ïa ki aiñ ki Purim, la buh jingthoh ha ka kot kli.