ESTHER 4 - Khasi CL Bible (BSI)

U Mordekai u pan ïa ka jingïarap ka Esther

¹ Haba u Mordekai u tip ïa kata baroh ba la leh, u tar ïa la ki jaiñ ha ka jinglyng-a bajur. Nangta u phong da ki jaiñ khain bad sleh ïa ka khlieh da u dpei, bad ïaid lyngba ïa ka nongbah, u da ïam lynñiar kthang, haduh ba un da poi ha ka jaka rung sha ka ïingsyiem.

² Um shym la rung shapoh namar ym don uba lah ban rung shapoh ha ki jaiñ khain.

³ Ha baroh ki jylla, hangno hangno ba la pynbna paidbah ïa ka jingpynbna u syiem, la don ka jingsawa jong ka jingïambriew hapdeng ki Jiw. Ki shahjingit, ki ïam bad lynñiar bad bun na ki, ki phong jaiñ khain bad thiah ha u dpei.

⁴ Haba ki shakri kynthei jong ka Esther bad ki ïunukh ki ïathuh ha ka ïa kaei kaba u Mordekai u leh, ka la shitom jingmut haduh katta katta. Ka phah sha u Mordekai katto katne ki jaiñ ban phong ha ka jaka ki jaiñ khain, hynrei um shym pdiang ïa ki.

⁵ Nangta ka khot ïa u Hathakh, uwei na ki ïunukh ba la thung da u syiem, bad ong ïa u ban leit sha u Mordekai bad ban shem ïa kaei kaba la jia bad ban kylli balei ka long kumta.

⁶ U Hathakh u leit sha u Mordekai ha ka phyllaw ka nongbah ha ka khyrdop ka ïingsyiem.

⁷ U Mordekai u ong ïa u ïa kaei baroh kaba la jia ïa u bad haduh katno ka pisa ba u Haman u la kular ban buh ha ka ïing jingkynshew u syiem lada ïa baroh ki Jiw la pynïap.

⁸ U ai ha u Hathakh ïa ka kopi jong ka jingpynbna kaba u la pynmih ha Susa, kaba hukum ïa ka jingpynjot ïa ki Jiw. U Mordekai u ong ïa u ban rah ïa ka sha ka Esther, ban batai ha ka ïa kaei kaba long, bad ban ong ïa ka ban ïasaid bad u syiem bad kyrpad ïa u ban don jingisynei ïa ki briew jong ka.

⁹ U Hathakh u leh ïa kane,

¹⁰ bad ka Esther ka ai ïa kane ka khubor ban leit rah pat sha u Mordekai:

¹¹ “Lada mano mano, u briew ne ka briew, u ban leit sha ka jaka ba kham shapoh ka phyllaw u syiem bad leit ïakynduh ïa u khlem shah khot, un ïap. Kata ka dei ka aiñ; naduh ki nongai jingmut u syiem haduh ki riewpaidbah jong ki jylla, ki tip ïa kata. Ka don tang kawei ka lynti ban lait na kane ka aiñ: lada u syiem u pyn-i ïa u diengsynshar ksiar ïano ïano, tang kata ka ban pyllait im ïa uta u briew. Hynrei ka la long mynta shi bnai ba u syiem u la phah khot ïa nga.”

¹² Haba u Mordekai u la ïoh ïa ka khubor, u phah ïa ka ïa kane ka jingmaham:

¹³ “Wat pyrkhat ba phan kham lait im ban ïa kiwei pat ki Jiw tang namar ba pha don ha ka ïingsyiem.

¹⁴ Lada pha sngap jar ha ka por kum kane, ka jingïarap kan wan na bneng ïa ki Jiw, bad kin lait im, hynrei phan ïap, bad ka longïing u kpa jong pha kan kut noh. Pynban mano ba lah ban tip — lehse ka dei na ka bynta ka por kum kane ba la pynlong mahadei ïa pha!”

¹⁵ Ka Esther ka phah sha u Mordekai ïa kane ka jubab:

¹⁶ “To khie leit bad ïalumlang ïa baroh ki Jiw ha Susa; pynlong ka jingshah jingit bad duwai na ka bynta jong nga. Wat bam lane dih ei ei na ka bynta lai sngi bad lai miet. Ki shakri kynthei jong nga bad ma nga, ngin leh kumjuh. Hadien kata, ngan leit sha u syiem, wat la ka long pyrshah ïa ka aiñ. Lada ka dei ïa nga ban ïap na ka bynta kata, ai ngan ïap.”

¹⁷ Nangta u Mordekai u leit noh bad u leh ïa baroh kaba ka Esther ka la ong ïa u ban leh.