ESTHER 3 - Khasi CL Bible (BSI)

U Haman u ïasylla ban pynjot ïa ki Jiw

¹ Hadien katto katne por u syiem Serksis u la pynkiew kyrdan ïa u briew uba kyrteng u Haman sha ka kyrdan myntri rangbah. U Haman u dei u khun jong u Hammedatha, uba hiarpateng na u Agag.

² U syiem u la hukum ïa baroh ki rangbah synshar ha ka jingtreikam ban pynpaw ïa ka jingburom ïa u Haman da kaba dem khohsiew bad nguh ïa u. Baroh ki la leh kumta, lait noh tang u Mordekai, uba la kyntait ban leh ïa ka.

³ Kiwei pat ki rangbah synshar jong ka jingtreikam ha ïingsyiem ki la kylli ïa u balei ba um kohnguh ïa ka hukum u syiem;

⁴ man ka sngi ki kyntu ïa u ban pyndem, hynrei um sngap ïa ki. “Nga dei u Jiw,” u batai, “bad ngam lah ban dem ha u Haman.” Kumta ki ïathuh ïa kane ha u Haman, bad ki pyrkhat la un lah ban shah ïa kane ka jingleh u Mordekai.

⁵ U Haman u la bitar haba u la sngewthuh ba u Mordekai un ym dem khohsiew ïa u,

⁶ bad haba u tip ba u Mordekai u dei u Jiw, u la rai ban pynshitom ym tang ïa u Mordekai marwei. U la don ka jingthmu ban pynïap ïa baroh ki Jiw ha ka hima Persia baroh kawei.

⁷ Ha ka snem kaba khat-ar jong ka jingsynshar u Syiem Serksis, ha u Nisan, u bnai banyngkong, u Haman u la hukum ban kynting sbai (la khot ïa ki, “purim”) ban shem ïa ka sngi bad u bnai babiang ban pyntreikam ïa kata ka jingsylla jong u. La rai ban pyntreikam ha ka sngi kaba khatlai jong u Adar, u bnai uba khat-ar.

⁸ Kumta u Haman u ong ïa u syiem. “Ka don kawei ka jaitbynriew kaba la saphriang kylleng sawdong ka hima jong phi bad ba lah ban shem ha kawei pa kawei ka probins. Ki bud ïa ki dustur kiba ïapher na ki jong kiwei pat ki jaitbynriew. Nalor kata kim kohnguh ïa ki aiñ jong ka hima, kumta kan ym long kaba bha ïa phi ban shah ïa ki.

⁹ Lada phi sngewbha, ko syiem, pynmih da ka hukum ba dei ban pynïap noh ïa ki. Lada phi leh kumta, nga pynthikna ba ngan lah ban buh palat lai lakh sawphew hajar kilo ka rupa sha ka jingkynshew ka ïingsyiem na ka bynta ka jingpynïaid kam ha ka hima.”

¹⁰ U syiem u law ïa la ka sati ba pyndonkam ha kaba shon muhor ban pynkupbor ïa ki jingpynbna, bad ai ïa ka ha u nongshun jong ka jaitbynriew Jiw, u Haman u khun jong u Hammedatha, uba hiarpateng na u Agag.

¹¹ U syiem u ong ha u, “Ki briew bad ka pisa jong ki, ki long ki jong me; leh katba me sngewkwah ïa ki.”

¹² Kumta ha ka sngi kaba khatlai jong u bnai banyngkong, u Haman u la khot ïa ki sekretari jong u syiem bad u la pule ha ki ba kin bud ïa ka jingpynbna bad ong ïa ki ban pynkylla ktien sha baroh ki jait ktien bad rukom thoh ba la pyndonkam ha ka hima bad ban phah sha baroh ki nongsynshar, ki lat bad rangbah synshar. La pynmih ha ka kyrteng jong u syiem Serksis bad shon muhor da ka sati jong u.

¹³ Ki nongrah-khubor ki la rah ïa kane ka jingpynbna sha kawei pa kawei ka probins jong ka hima. Ka don ki jingbthah ba tang ha kawei ka sngi, ka sngi kaba khatlai jong u Adar, ïa baroh ki Jiw — samla bad tymmen, kynthei bad khynnah — dei ban pynïap. Ïa ki dei ban pynïap khlem jingisynei bad ba ïa ki jingdon jingem jong ki dei ban shim noh.

¹⁴ Ïa ki jingthoh ha ka jingpynbna dei ban pyntip paidbah ha kawei pa kawei ka probins, khnang ba baroh kin long ba la pynkhreh haba kata ka sngi kan wan.

¹⁵ Ha ka hukum u syiem ïa ka hukum la pyntip paidbah ha Susa, ka nongbah jong ka hima, bad ki nongrah-khubor ki rah ïa ka khubor sha ki jylla. U syiem bad u Haman ki shong bad ïadih sngewbha katba ka nongbah Susa ka la don hapdeng ka jingkulmar.