ESTHER 2 - Khasi CL Bible (BSI)

Ka Esther ka long mahadei

¹ Hadien, wat haba ka jingbitar u syiem ka la pjah, u ïai pyrkhat shaphang kaei kaba ka Bashti ka la leh bad shaphang ka jingpynbna jong u pyrshah ïa ka.

² Kumta katto katne ngut na ki nongai jingmut u syiem kiba ïajan bad u ki ai jingmut, “Balei phim pynlong ka jingwad ban shem katto katne ki theisotti ba-bhabriew?

³ Phi lah ban thung ki rangbah synshar ha man ki probins jong ka hima bad hukum ïa ki ban wallam ïa baroh kine ki samla kynthei ba-bhabriew sha ka ïing ki kynthei jong phi hangne ha Susa, ka nongbah jong ka hima. Buh ïa ki hapoh ka jingkhmih jong u Hegai, u ïunukh uba peit halor ki kynthei jong phi, bad ban ai ka jingsumar na ka bynta ka jingpynbha briew ïa ki.

⁴ Nangta sa shim ïa ka samla kaba phi itynnat tam bad pynlong ïa ka, ka mahadei ha ka jaka jong ka Bashti.” U syiem u la pyrkhat ba kane ka long ka jingai jingmut kaba bha, kumta u la pdiang ïa kata.

⁵ Hangta ha Susa la don u Jiw uba kyrteng u Mordekai, u khun jong u Jair; uba na ka jait Benjamin bad u long uba hiarpateng na u Kish bad u Shimei.

⁶ Haba u syiem Nebukhadnessar jong ka Babilon u la rah ïa u Jehoïakhin u syiem ka Judah ha ka jingringmraw na Jerusalem, ryngkat bad shi kynhun ki koidi, u Mordekai u long uwei na ki.

⁷ U don ka bakha, ka Esther, kaba ka kyrteng Hebru jong ka, ka long ka Hadassah; ka long ka samla ba-bhabriew, bad ka don ka rynïeng ryñiot ba-itynnat. Ha ka jingïap noh ki kmie ki kpa jong ka, u Mordekai u la ri bad pynheh pynsan ïa ka kum la ka jong ka khun.

⁸ Haba u syiem u la pynmih ïa ka jingpynbna bathymmai bad shibun ki samla kynthei la wallam sha Susa, ka Esther ka la long kawei na ki. Ïa ka ruh la buh ha ka ïingsyiem hapoh ka jingsumar u Hegai, uba peit ïa ka ïing ki kynthei.

⁹ U Hegai u la itynnat ïa ka Esther, bad ka la ïoh ïa ka jinglehsbun jong u. Um shym pynslem ha kaba ai ka jingsumar na ka bynta ka jingpynbha briew bad ki jingbam bakyrpang. U ai ïa ka, ka jaka babha tam ha ka ïing ki kynthei bad buh hynñiew ngut ki samla kynthei ba la jied kyrpang na ka ïingsyiem ban shakri ïa ka.

¹⁰ Mynta, halor ka jingai jingmut u Mordekai, ka Esther ka bat tang ha lade khlem ïathuh hano hano ba ka long ka Jiw.

¹¹ Man ka sngi u Mordekai u ju ïaid sharum shaneng ha khmat ka phyllaw ka ïing ki kynthei, khnang ban tip kumno ka long bad kaei ka ban jia ïa ka.

¹² Ka jingai jingsumar man ka por na ka bynta ka jingpynbha briew ïa ki kynthei ka neh shisnem — ki jingkhem met da ka umphniang mirr na ka bynta hynriew bnai bad da ka umphniang balsam sa hynriew bnai. Hadien kata, ïa kawei pa kawei ka samla yn ïalam kawei hadien kawei sha u syiem Serksis.

¹³ Haba ka leit na ka ïing ki kynthei sha ka ïingsyiem, ka lah ban riam kano kano ka jingriam kaba ka kwah.

¹⁴ Kan leit hangta ha ka por janmiet, bad ha ka step babud yn ïalam ïa ka sha kawei pat ka ïing ki kynthei bad yn buh hapoh ka jingpeit jong u Shaashgas, u ïunukh uba khmih ïa ka ïing ki tnga kliar u syiem. Kan ym leit shuh sha u syiem lymda u sngewtynnat eh ïa ka ba un phah khot ïa ka da ka kyrteng.

¹⁵ Ka por ka la dei na ka bynta ka Esther ban leit sha u syiem. Ka Esther — ka khun u Abihail bad ka bakha jong u Mordekai, uba la ri ïa ka kum la ka khun; ka Esther — ïa kaba la ïaroh da baroh kiba ïohi ïa ka. Haba ka por jong ka, ka la poi, ka la riam thik kumba u Hegai, uta u ïunukh uba khmih ïa ka ïing ki kynthei, u la ai jingmut ïa ka ban riam.

¹⁶ Kumta ha ka snem kaba hynñiew jong u Serksis kum u syiem, ha u Tebeth, u bnai ba-shiphew, ïa ka Esther la wallam sha u syiem Serksis ha ka ïingsyiem.

¹⁷ U syiem la u itynnat ïa ka palat ban ïa kiwei pat ki samla kynthei, bad palat ban ïa kiwei pat, ka la ïoh ïa ka jinglehbha bad ka jingsngewieit. U buh ïa ka pansngiat syiem ha ka khlieh jong ka bad pynlong mahadei ïa ka ha ka jaka jong ka Bashti.

¹⁸ Nangta u syiem u pynlong ka jingkhawai kaba khraw kum ka jinglehburom ïa ka Esther bad khot sngewbha ïa baroh ki rangbah synshar bad nongpynïaidkam. U la pynbna shuti ha ka hima baroh kawei bad ai ki jingai sngewbha kiba shongdor kum ïa u syiem.

U Mordekai u pyllait im ïa u syiem

¹⁹ Ha kata ka por u syiem u la thung ïa u Mordekai ha ka kam synshar khadar.

²⁰ Ka Esther kam pat shym la ïathuh ba ka dei ka Jiw. U Mordekai u la ong ïa ka ban ym ïathuh hano hano ruh, bad ka kohnguh ïa u ha kane, kumba ka la ju kohnguh ïa u mynba ka dang long ka khynnah rit hapoh ka jingsumar jong u.

²¹ Katba u Mordekai u dang long u nongtrei ha ka ïingsyiem, u Bigthana bad u Teresh, kiba long ar ngut na ki ïunukh ka ïingsyiem kiba ap phira ïa ka khyrdop sha ki kamra u syiem, ki la shun ïa u syiem Serksis bad sylla ban pynïap ïa u.

²² U Mordekai u tip shaphang kane bad u ïathuh ïa ka Esther, ka mahadei; kaba la ïathuh pat ïa u syiem ïa kaei kaba u Mordekai u la shem.

²³ Ka la don ka jingtohkit, bad la shem ba ka jingïathuh ka long kaba dei, kumta ïa baroh ar ngut ki briew la sdien phasi. U syiem u la hukum ba ïa kane ka jingjia dei ban thoh ha ki jingbuh jingthoh jong ka hima.