ESRA 9 - Khasi CL Bible (BSI)

U Esra u ïoh jingtip shaphang ki jingïashongkha khleh bad ki bym dei ki Jiw

¹ Hadien ba la pyndep ïa kane baroh, katto katne ngut na ki nongïalam jong ki Israel ki wan bad ïathuh ïa nga ba ki briew, ki lyngdoh bad ki Lebi kim shym la pynkyrpang ïa lade na ki briew jong ki ri ba-marjan jong ki Ammon, Moab, bad Ijipt lane na ki Kanaan, ki Hit, ki Peris, ki Jebus bad ki Amor. Baroh na ki, ki la leh ïa kijuh kiei kiei kiba ijli kiba kito ki briew ki la leh.

² Ki rangbah Jiw ki shongkurim ïa ki kynthei nongwei, bad kumta ki briew ba la kyntang jong U Blei ki kylla long kiba tngit. Ki nongïalam bad ki rangbah synshar ki long ki nongpynkheiñ hukum kiba kongsan.

³ Haba nga la ïohsngew ïa kane, nga kad ïa la ki jaiñ ha ka jingsngewsih, nga phut ïa la u shñiuh bad u 'ñiuhtmoh bad nga shong ba la bankhia da ka jingsngewsih.

⁴ Nga shong hangta ha ka jingsngewsih haduh ynda la janmiet, ka por ban ai ïa ki jingkñia, bad ki briew ki sdang ban ïalum sawdong ïa nga — baroh kito kiba la sheptieng ïa kaei kaba U Blei ki Israel u la lah ong shaphang ki pop jong kito kiba la wan phai na ka jingshah ringmraw.

⁵ Haba ka por ka la poi na ka bynta ka jingkñia janmiet, nga ïeng na ka jaka ba nga shong sngewsih, bad nga dang phong ïa ki jaiñ ba la jot, nga dem khohsiew ha ka jingduwai bad nga pyiar ïa la ki kti sha U Trai U Blei jong nga.

⁶ Nga ong, “A Blei, nga sngewlehrain haduh katta katta ban rah ïa la ka khlieh ha ka jingdon jong me. Ki pop jong ngi ki la kynton palat ïa ki khlieh jong ngi; ki la poi shaduh sha bneng.

⁷ Naduh ki sngi jong ki kpa tymmen jong ngi haduh mynta, ma ngi, ki briew jong me, ngi la leh pop palat. Namar ki pop jong ngi, ma ngi, ki syiem jong ngi, bad ki lyngdoh jong ngi, ngi la hap noh ha ki kti jong ki syiem nongwei, bad ïa ngi la pynïap, la lute bad la ïalam noh kum ki koidi. Ngi la long baroh kiba shah lehrain, kumba ngi long ruh mynta ka sngi.

⁸ Mynta, na ka bynta khyndiat por, A Trai U Blei jong ngi, me la leh-isynei ïa ngi bad me la shah ïa katto katne na ngi ban lait na ka jinglongmraw bad ban shong ban sah ha ka jingshngain ha kane ka jaka bakhuid. Me la pyllait ïa ngi na ka jinglongmraw bad ai pat ka jingim bathymmai.

⁹ Ngi la long ki mraw, hynrei mem shym la iehnoh ïa ngi ha ka jinglongmraw. Me la pynlong ïa ki patsha ka Persia ban lehsbun ïa ngi bad ban shah ïa ngi ban dang ïoh ban im bad ban tei pat ka Templ jong me, kaba la long ha ka jingjot jingpra, bad ban ïoh ïa ka jingshongshngain hangne ha Judah bad Jerusalem.

¹⁰ “Hynrei mynta, A Blei, kaei kaba ngi lah ban ïa-ong hadien kata baroh kaba la jia? Ngi la long ki bymkohnguh biang ïa ki hukum kiba me la ai ha ngi lyngba ki shakri jong me, ki nongïathuhlypa.

¹¹ Ki la ong ha ngi ba ka ri kaba ngin ïohkynti, ka long ka ri ka bymkhuid namar ki briew kiba shong basah ha ka, ki la pyndap ïa ka naduh kawei ka bynta shaduh kawei pat da kiei kiei kiba isaitmet bad ki kam ba-ijli.

¹² Ki ong ïa ngi ba ngim dei ban ïashongkha khleh bad kito ki briew bad ba ngim dei ban ïarap ïa ki ban roi ban par lane ba kin ïoh jingjop, lada ngi kwah ban lehkmen ha ka ri bad ai kum ka jinghiarpateng ha ki khun ki ksiew jong ngi junom.

¹³ Wat hadien kiei kiei kiba la jia ïa ngi da ka jingpynshitom na ka bynta ki pop bad ki jingleh bymdei jong ngi, ngi tip ba ma me, U Blei jong ngi, mem shym la pynshitom than ïa ngi kumba ka dei ïa ngi bad me la shah ïa ngi ban ïoh im.

¹⁴ Nangta kumno ngi lah ban lyndet biang ïa ki hukum jong me bad shongkha khleh bad kine ki briew kiba sniew? Lada ngi leh kumta, ka jingbitar jong me kan long kaba khraw bad men pynjot khoit ïa ngi bad yn ym don mano mano na ngi u ban lait im.

¹⁵ A Trai U Blei ki Israel, me long uba hok, hynrei me la shah ïa ngi ban im. Ngi phla ïa ki pop jong ngi ha me; ngim don hok shuh ban wan ha ka jingdon ryngkat jong me.”