ESRA 8 - Khasi CL Bible (BSI)

Ki briew kiba leit phai na ka jingshah ringmraw

¹ Kane ka dei ka thup kyrteng jong ki rangbah kur kiba la don ha ka jinglongmraw ha Babilon bad kiba la leit phai ryngkat bad u Esra sha Jerusalem mynba u Artakserksis u long u patsha:

^2-14 U Gershom jong ka kur u Phinehas. U Daniel jong ka kur u Ithamar. U Hattush u khun jong u Shekanaïah, jong ka kur u Dabid. U Sekharaïah jong ka kur u Parosh, bad shispah sanphew ngut ki rangbah jong ka kur jong u (ki don ki jingbuh jingthoh ïa ki jinghiarpateng jong ki). U Eliehoenai u khun jong u Serahaïah jong ka kur u Pahath Moab, bad arspah ngut ki rangbah. U Shekanaïah u khun jong u Jahasiel jong ka kur u Sattu, bad laispah ngut ki rangbah. U Ebed u khun jong u Jonathan jong ka kur u Adin, bad sanphew ngut ki rangbah. U Jeshaïah u khun jong u Athalaïah jong ka kur u Elam, bad hynñiewphew ngut ki rangbah. U Sebadaïah u khun jong u Mikhael jong ka kur u Shephataïah, bad phraphew ngut ki rangbah. U Obadaïah u khun jong u Jehiel jong ka kur u Joab, bad arspah khatphra ngut ki rangbah. U Shelomith u khun jong u Josiphaïah jong ka kur u Bani, bad shispah hynriewphew ngut ki rangbah. U Sekharaïah u khun jong u Bebai jong ka kur u Bebai, bad arphew phra ngut ki rangbah. U Johanan u khun jong u Hakkatan jong ka kur u Asgad, bad shispah shiphew ngut ki rangbah. U Eliphelet, u Jeuel bad u Shemaïah jong ka kur u Adonikam, bad hynriewphew ngut ki rangbah (ki leit phai ha ka por ba kham hadien). U Uthai bad u Sakkur jong ka kur u Bigbai, bad hynñiewphew ngut ki rangbah.

U Esra u wad ïa ki Lebi na ka bynta ka Templ

¹⁵ Nga la lumlang ïa ka kynhun baroh kawei harud ka nur-um kaba tuid sha ka shnong Ahaba, bad ngi sher dara hangta lai sngi. Nga shem ba hangta ha ka kynhun, ki don ki lyngdoh, hynrei ym don ki Lebi.

¹⁶ Nga phah khot khyndai ngut na ki nongïalam: u Elieser, u Ariel, u Shemaïah, u Elnathan, u Jarib, u Elnathan, u Nathan, u Sekharaïah bad u Meshullam bad ïa ar ngut ki nonghikai, u Joïarib bad u Elnathan.

¹⁷ Nga phah ïa ki sha u Iddo, u khlieh ka imlang ka sahlang ha Kasiphia, ban kylli ïa u bad ïa ki paralok jong u, ki rangbah kiba long ki nongtrei ka Templ, ban phah sha ngi ïa ki briew ki ban shakri ïa U Blei ha ka Templ.

¹⁸ Da ka jingaiei U Blei, ki phah sha ngi ïa u Sherebaïah, u briew uba tbit, u Lebi na ka kur u Mahli, bad khatphra ngut na ki khun shynrang jong u bad ki para, ki wan bad u.

¹⁹ Ki phah ruh ïa u Hashabaïah bad u Jeshaïah jong ka kur Merari, ryngkat bad arphew ngut na ki ba-ha-ïing jong ki.

²⁰ Nalor kata, la don arspah arphew ngut ki rangbah kiba long ki nongtrei ka Templ, kiba ïa ki kpa tymmen jong ki la buh da u syiem Dabid bad ki rangbah synshar jong u ban ïarap ïa ki Lebi. Ïa ki baroh la thoh ha ka thup kyrteng.

U Esra u ïalam ïa u paidbah ha ka jingshah jingit bad jingduwai

²¹ Hangta harud ka nur-um jong ka Ahaba, nga ai ki hukum na ka bynta jong ngi baroh ban shahjingit bad pynrit ïa lade ha khmat U Blei jong ngi bad ban kyrpad ïa u ban ïalam ïa ngi ha ka jingïaid lynti jong ngi bad ban ïada ïa ngi bad ki khun ki kti jong ngi bad ïa baroh ki jingdon jingem jong ngi.

²² Ngan jin da la lehrain ban kyrpad ïa u patsha ban ai ki shipai ïaid kjat ban ïada ïa ngi na kino kino ki nongshun katba ngi dang ïaid lynti, namar nga la lah ong ïa u ba U Blei jong ngi u kyrkhu ïa uno uno uba shaniah ha u, hynrei ba u sngewsih bad u pynshitom ïa uno uno uba phai noh na u.

²³ Kumta ngi la shahjingit bad duwai ïa U Blei ban ïada ïa ngi, bad u jubab ïa ki jingduwai jong ngi.

Ki jingai na ka bynta ka Templ

²⁴ Napdeng ki lyngdoh bapawkhmat, nga la jied ïa u Sherebaïah, u Hashabaïah, bad shiphew ngut kiwei pat.

²⁵ Nangta nga thew ïa ka rupa, ka ksiar bad ki khiew ki pliang kiba u patsha, ki nongaibuit jong u bad ki rangbah synshar, bad ki Israel ki la ai ban pyndonkam ha ka Templ, bad nga ai ha ki lyngdoh.

^26-27 Kane ka dei kaba nga la ai ha ki: Ka rupa — Arphew ar hajar kilo. Shispah tylli ki khiew ki pliang rupa — Hynñiewphew kilo. Ka ksiar — Lai hajar sawspah kilo. Arphew tylli ki pliang ksiar — Phra kilo sawspah gram. Ar tylli ki pliang rnong kiba itynnat, kiba ïaryngkat bad ka dor ki pliang ksiar.

²⁸ Nga ong ha ki, “Phi long kiba kyntang ha U Trai U Blei jong ki kpa tymmen jong phi, bad kumjuh ruh ki long ka rupa bad ki khiew ki pliang ksiar ba la wanrah ha u kum ki jingainguh mon sngewbha.

²⁹ Ap phira bha ïa ki haduh ba phin da poi ha ka Templ. Hangta ha ka kamra ki lyngdoh, thew ïa ki bad aiti ïa ki ha ki nongïalam jong ki lyngdoh bad jong ki Lebi, bad ha ki nongïalam jong ki paid Israel ha Jerusalem.”

³⁰ Kumta ki lyngdoh bad ki Lebi ki la shimti ïa ka rupa, ka ksiar bad ki khiew ki pliang, ban leit rah ïa ki sha ka Templ ha Jerusalem.

Ka jingleit phai sha Jerusalem

³¹ Ka la long ha ka sngi kaba khat-ar jong u bnai banyngkong ba ngi la mihnoh na ka nur-um Ahaba ban leit sha Jerusalem. U Blei jong ngi u la long ryngkat bad ngi bad u la ïada ïa ngi na ki jingtur ïaleh ki nongshun bad na ki jingapthap katba ngi dang ïa-ïaid ha ka lynti.

³² Haba ngi la poi ha Jerusalem, ngi la shongthait lai sngi.

³³ Nangta ha ka sngi kaba saw ngi leit sha ka Templ, ngi thew ïa ka rupa, ka ksiar bad ki khiew ki pliang bad aiti ïa ki sha u Meremoth, u lyngdoh, u khun jong u Uriah. Kiba la ïadon bad u, ki long u Eleasar u khun jong u Phinehas bad ar ngut ki Lebi, u Josabad u khun jong u Jeshua bad u Noadaïah u khun jong u Binnui.

³⁴ Ïa kiei kiei baroh la ñiew bad la thew, bad ïa ka jingbuh jingthoh kaba biang la leh ha kajuh ka por.

³⁵ Nangta kita baroh kiba la wan phai na ka jingshah ringmraw ki la wallam ki jingainguh ban thang kum ki jingkñia sha U Blei ki Israel. Ki la ainguh khat-ar tylli ki masi kyrtong na ka bynta ki Israel baroh, khyndaiphew hynriew tylli ki langbrot shynrang bad hynñiewphew hynñiew tylli ki khunlangbrot; ki ainguh ruh khat-ar tylli ki blang ban pynkhuid ïa lade na ka pop. Ïa kine ki jingri baroh la thang kum ki jingkñia sha U Trai.

³⁶ Ki la rah ruh ïa ka jingthoh kaba u patsha u la lah ai ha ki bad ai ïa ka ha ki lat bad ki rangbah synshar ka probins jong ka Ïuphratis Sepngi, kiba la ai pat ïa ka jingkyrshan jong ki ïa ki briew bad ka jingmane ha ka Templ.