ESRA 7 - Khasi CL Bible (BSI)

U Esra u wan poi ha Jerusalem

¹ Bun snem hadien, mynba u Artakserksis u long u patsha ha Persia, la don u briew uba kyrteng u Esra. U don ka jinghiarpateng na u kpa tymmen jong u, u Aaron, u Rangbah Lyngdoh, kumne harum: U Esra u long u khun jong u Seraïah, u khun jong u Asaraïah, u khun jong u Hilkaïah,

² u khun jong u Shallum, u khun jong u Sadok, u khun jong u Ahitub,

³ u khun jong u Amaraïah, u khun jong u Asaraïah, u khun jong u Meraïoth,

⁴ u khun jong u Serahaïah, u khun jong u Ussi, u khun jong u Bukki,

⁵ u khun jong u Abishua, u khun jong u Phinehas, u khun jong u Eleasar, u khun jong u Aaron.

^6-7 U Esra u long u riewstad uba don ka jingtip bajylliew ïa ka Hukum kaba U Trai U Blei ki Israel u la ai ha u Moses. Namar ba u Esra u don ïa ka jingkyrkhu U Trai U Blei jong u, u patsha u ai kat ïa kaba u pan. Ha ka snem kaba hynñiew jong ka jingsynshar u Artakserksis, u Esra u la mih na Babilonia ban leit sha Jerusalem ryngkat bad shi kynhun ki Israel kiba kynthup ïa ki lyngdoh, ki Lebi, ki nongput nongtem ka Templ, ki nongap phira ka Templ bad ki nongtrei.

^8-9 Ki mih na Babilonia ha ka sngi banyngkong jong u bnai banyngkong, bad da ka jingïarap U Blei, ki poi ha Jerusalem ha ka sngi banyngkong jong u bnai uba san.

¹⁰ U Esra u la aiti ïa la ka jingim ha kaba pule ïa ka Hukum jong U Trai, ha kaba pyntreikam ïa ka, bad ha kaba hikai ïa baroh ki aiñ bad ki jingbuhbeit ryntih ha ki paid Israel.

Ka jingthoh kaba u Artakserksis u ai ïa u Esra

¹¹ U Artakserksis u ai ïa kane ka jingthoh ha u Esra, u lyngdoh bad u riewstad, uba don ka jingtip bajylliew ïa ki aiñ bad ki hukum kiba U Trai u la ai ha ki Israel:

¹² “Na u patsha Artakserksis ha u Esra, u lyngdoh, riewstad ka Hukum jong U Blei ka Bneng.

¹³ “Nga hukum ba ha baroh kawei ka hima jong nga, baroh ki Israel, ki lyngdoh, bad ki Lebi, ïa kat kita kiba kwah, la ai jingbit ban leit bad me sha Jerusalem.

¹⁴ Ma nga, bad ki hynñiew ngut ki nongai jingmut, ngi phah ïa phi ban wad jingtip ïa ki jinglong jingman ha Jerusalem bad Judah khnang ban ïohi kumno ïa ka Hukum U Blei jong me, ïa kaba la bynshet ha me, la kohnguh.

¹⁵ Men rah bad me ïa ka ksiar bad ka rupa na ka bynta ki jingainguh, ïa kiba ma nga bad ki nongai jingmut jong nga, ngi kwah ban ai sha U Blei ki Israel, uba ka Templ jong u ka don ha Jerusalem.

¹⁶ Men rah ruh baroh ka rupa bad ka ksiar kaba me la lum na baroh kawei ka probins Babilon bad ki jingainguh kiba ki Israel bad ki lyngdoh jong ki, ki ai na ka bynta ka Templ jong U Blei jong ki ha Jerusalem.

¹⁷ “Phi dei ban pynlut ha ka rukom kaba dei ïa kane ka pisa bad ban thied ki masi kyrtong, ki langbrot shynrang, ki khunblang, u kew bad ka waiñ bad ban ainguh ïa ki ha ka duwan jong ka Templ ha Jerusalem.

¹⁸ Phi lah ban pyndonkam ïa ka rupa bad ka ksiar kaba sah na ka bynta kano kano kaba ma phi bad ki para ri jong phi, phi kwah ban pyndonkam, kat kum ka mon U Blei jong phi.

¹⁹ Phi dei ban ai sngewbha sha U Blei ha Jerusalem ïa baroh ki khiew ki pliang ïa kiba la ai ha phi ban pyndonkam ha ki jingshakri ha ka Templ.

²⁰ Bad kano kano kaba phi dang donkam shuh ha ka Templ, phi lah ban ïoh na ka ïing jingkynshew syiem.

²¹ “Nga hukum ïa baroh ki rangbah synshar ka ïing jingkynshew ha ka probins jong ka Ïuphratis Sepngi ban pynbiang khlem pynslem ïa u Esra, u lyngdoh bad u riewstad ha ka Hukum jong U Blei ka Bneng, ïa kaei kaei baroh kaba u pan,

²² haduh lai hajar sawspah kilo ka rupa, shiphew hajar kilo u kew, ar hajar litar ka waiñ, ar hajar litar ka umphniang Olib, bad katba donkam ka mluh.

²³ Phi dei ban peit bha ban pynbiang ïa kaei kaei baroh kaba U Blei jong ka Bneng u donkam na ka bynta ka Templ jong u, bad ban pynthikna un ym bitar ïa nga lane ïa kito ki ban synshar hadien jong nga.

²⁴ La khang pyrshah ïa phi na kaba lum khajna na ki lyngdoh, ki Lebi, ki nongput nongtem, ki nongap phira, ki nongtrei lane kino kino kiba don ka jingïadei bad kane ka Templ.

²⁵ “Ma me, ko Esra, da kaba pyndonkam ïa ka jingstad kaba U Blei jong me u la ai ha me, men thung ki nongsynshar bad ki nongbishar ki ban synshar ïa ki briew baroh jong ka Ïuphratis Sepngi kiba im da ka Hukum jong U Blei jong me. Me dei ban hikai ïa kato ka Hukum ha uno uno u bymtip ïa ka.

²⁶ Lada uno uno um kohnguh ïa ki aiñ jong U Blei jong me lane ki aiñ jong ka hima, ïa u dei ban pynshitom mardor: da ka jingïap lane da ka jingringmraw lane da kaba knieh ïa ki jingdon jingem jong u lane da ka jingset byndi.”

U Esra u ïaroh ïa U Blei

²⁷ U Esra u ong, “Ïaroh ïa U Trai, U Blei jong ki kpa tymmen jong ngi! U la pynlong ïa u patsha da ka mon sngewbha ban burom ha kane ka rukom ïa ka Templ jong U Trai ha Jerusalem.

²⁸ Da ka jingaiei U Blei, nga la ïoh ïa ka jinglehsbun jong u patsha, ki nongai jingmut, bad ki nongsynshar bakhrawbor jong u baroh; U Trai U Blei jong nga u la ai ïa nga ka jingshlur, bad nga la lah ban pynkohnguh ïa kiba bun ki rangbah kur jong ki Israel ban wan phai bad nga.”