ESRA 6 - Khasi CL Bible (BSI)

La shem biang ïa ka hukum u Syros

¹ Kumta u patsha Darius u la pynmih ïa ki hukum ban wad ha ki jingthoh syiem ba la buh ha Babilon.

² Hynrei ka la long ha ka nongbah Ekbatana ha ka probins jong ka Media ba ïa ka kot kli la shem kaba don ïa kane ka jingbuh jingthoh:

³ “Ha ka snem banyngkong jong ka jingsynshar jong u patsha Syros, u la hukum ba ïa ka Templ ha Jerusalem yn tei pat ha kaba ïa ki jingkñia bad ki jingainguh yn thang. Ka Templ ka dei ban long arphew hynñiew mitar ka jingjrong bad arphew hynñiew mitar ka pyngkiang.

⁴ Ïa ki kynroh dei ban tei da shi syrtap ka dieng halor man ki lai syrtap ki maw. Ïa baroh ki jingpynlut pynsep dei ban siew na ka ïing jingkynshew syiem.

⁵ Ïa ki khiew ki pliang ksiar bad rupa ruh kiba u syiem Nebukhadnessar u la wallam sha Babilon na ka Templ ha Jerusalem, dei ban pynphai pat sha ka jaka jong ki ha ka Templ ha Jerusalem.”

U Darius u hukum ba ka kam kan bteng

⁶ Nangta u Darius u phah ïa kane ka jubab: “Ha u Tattenai, u lat jong ka Ïuphratis Sepngi, u Shethar Bosenai, bad ki para rangbah synshar ha Ïuphratis Sepngi.

⁷ “Wat don ha ka Templ bad wat tuklar ïa ka jingtei ïa ka. Ai ba u lat ka Judah bad ki nongïalam jong ki Jiw kin tei pat ïa ka Templ U Blei ha ka jaka ba ka la ïeng mynshuwa.

⁸ Da kane nga hukum ïa phi ban ïarap ïa ki ban tei biang ïa ka. Ïa ki jingpynlut pynsep dei ban ai khlem pynslem na ka ïing jingkynshew syiem ba la ïoh na ki khajna ha Ïuphratis Sepngi, khnang ban ym pynthut ïa ka kam.

⁹ Man ka sngi, khlem pep, phi dei ban ai ïa ki lyngdoh ha Jerusalem ïa kaei kaei kaba ki ong ïa phi ba ki donkam: ki masi lyngraw, ki langbrot, lane ki khunlangbrot ban kñia kum ki jingainguh sha U Blei jong ka Bneng, lane u kew, ka mluh, ka waiñ, lane ka umphniang Olib.

¹⁰ Ïa kane dei ban leh khnang ba ki lah ban ai ki jingkñia ba pdiang hun ha U Blei jong ka Bneng bad duwai ïa ka jingkyrkhu jong u halor jong nga bad ki khun shynrang jong nga.

¹¹ Nga hukum ruh ba lada uno uno um kohnguh ïa kane ka hukum, dei ban sei ïa u bim dieng na ka ïing jong u, ban pynnep ha kawei ka liang, bad ban sam lyngba ïa ka met jong u. Bad ïa ka ïing jong u ban pynlong kum ka kynton ñiut.

¹² To U Blei uba la jied ïa ka Jerusalem kum ka jaka ba yn mane ïa u, un pynjot noh ïa uno uno u syiem lane ka hima kaba ïaleh pyrshah ïa kane ka hukum bad uba pyrshang ban pynjot ïa ka Templ hangta. Ma nga, u Darius, nga la ai ïa kane ka hukum. Dei ban kohnguh lut ïa ka.”

La pynkyntang ïa ka Templ

¹³ Nangta u Tattenai, u lat, u Shethar Bosenai bad ki paralok jong ki, ki la leh thik kumba u patsha u la hukum.

¹⁴ Ki nongïalam ki Jiw ki la pynïaid bha ïa ka jingtei ïa ka Templ, ba la ai jingpynshlur da ki nongïathuhlypa, u Haggai bad u Sekharaïah. Ki pyndep ïa ka Templ kumba la hukum da U Blei ki Israel bad da u Syros, u Darius bad u Artakserksis, ki patsha ka Persia.

¹⁵ Ki pyndep ïa ka Templ ha ka sngi kaba lai jong u bnai Adar ha ka snem kaba hynriew jong ka jingsynshar u patsha Darius.

¹⁶ Nangta ki paid Israel — ki lyngdoh, ki Lebi bad baroh kiwei pat kiba la wan phai na ka jingshah ringmraw — da ka jingkmen ki pynkyntang ïa ka Templ.

¹⁷ Na ka bynta ka jingpynkyntang, ki ai shispah tylli ki masi kyrtong, arspah ki langbrot, bad sawspah tylli ki khunlangbrot kum ki jingainguh thang, bad khat-ar tylli ki blang kum ki jingainguh ïa ka pop, uwei na ka bynta kawei ka jait ki Israel.

¹⁸ Ki la buh ryntih ruh ïa ki lyngdoh bad ki Lebi na ka bynta ka jingshakri ha ka Templ ha Jerusalem, kat kum ki jingbthah bad don ha ka kitab u Moses.

Ka Niam Ka Jinglait

¹⁹ Ki briew kiba la wan phai na ka jingshah ringmraw, ki la rakhe ïa ka Niam Ka Jinglait ha ka sngi kaba khatsaw jong u bnai banyngkong jong ka snem kaba bud.

²⁰ Baroh ki lyngdoh bad ki Lebi ki pynkhuid ïa lade bad ki khuid kat kum ka jinglehniam. Ki Lebi ki pynïap ïa ki mrad na ka bynta ki jingkñia ka Niam Ka Jinglait ïa ki briew kiba la wan phai, ki lyngdoh, bad na ka bynta ïa lade.

²¹ Ïa ki jingkñia la bam da baroh ki Israel kiba la wan phai na ka jingshah ringmraw bad da baroh kito kiba la iehnoh ïa ki rukom mane blei thala jong kiwei pat ki briew kiba shong basah ha ka ri bad kiba la wan ban mane ïa U Trai U Blei ki Israel.

²² Hynñiew sngi ki rakhe da ka jingkmen ïa ka Jingkhawai Niam U Kpu Bakhlem Thiat. Ki la dap da ka jingkmen namar U Trai u la pynlong ïa u patsha jong ka Assyria ban lehsbun ïa ki, ba u kyrshan ïa ki ha ka jingtrei jong ki ha ka jingtei pat ïa ka Templ jong U Blei ki Israel.