ESRA 5 - Khasi CL Bible (BSI)

¹ Ha kata ka por, ar ngut ki nongïathuhlypa, u Haggai bad u Sekharaïah u khun jong u Iddo, ki sdang ban kren ha ka kyrteng U Blei ki Israel ha ki Jiw kiba shong basah ha Judah bad Jerusalem.

² Haba u Serubbabel u khun jong u Shealtiel bad u Joshua u khun jong u Jehosadak ki la ïohsngew ïa ki khubor, ki sdang ban tei biang ïa ka Templ ha Jerusalem, bad ki ar ngut ki nongïathuhlypa ki ïarap ïa ki.

³ Mar kumta hi, u Tattenai, u lat ka Ïuphratis Sepngi, u Shethar Bosenai bad ki para rangbah synshar, ki wan sha Jerusalem bad ki dawa bad ong: “Mano ba ai hukum ïa phi ban tei ïa kane ka Templ bad pynbiang ïa ki jingbuh jingsat jong ka?”

⁴ Ki pan ruh ïa ki kyrteng jong baroh ki rangbah kiba ïarap ha kaba tei ïa ka Templ.

⁵ Hynrei U Blei u peit halor ki nongïalam jong ki Jiw, bad ki rangbah synshar ki Persia ki rai ban ym leh ei ei haduh ba kin da lah thoh sha u Darius bad ïoh ïa ka jubab.

⁶ Kane ka dei ka jingïathuh ba ki la phah sha u patsha:

⁷ “Ha u patsha Darius, to synshar ha ka jingsuk.

⁸ “Ko syiem, phi dei ban tip ba ngi la leit sha ka probins jong ka Judah bad shem ba ïa ka Templ jong U Blei bakhraw la dang shna biang da ki maw baheh bad da ki bim dieng ba la pyndait ha ka kynroh. Ïa ka kam la pyntrei ha ka rukom kaba biang bha bad ka dang ïaid shaphrang.

⁹ “Nangta, ngi kylli ïa ki nongïalam jong ki ban ïathuh ïa ngi mano ba la ai bor ïa ki ban tei biang ïa ka Templ bad pynbiang ïa ki jingbuh jingsat jong ka.

¹⁰ Ngi kylli ruh ïa ki kyrteng jong ki khnang ba ngi lah ban pyntip sha phi mano ki nongïalam jong kane ka kam ki dei.

¹¹ “Ki jubab, ‘Ngi dei ki shakri jong U Blei ka bneng bad ka khyndew, bad ngi tei pat ïa ka Templ kaba lah dep tei bad pynbiang ïa ki jingbuh jingsat bun snem mynshuwa da u syiem bakhrawbor ka Israel.

¹² Hynrei namar ba ki kpa tymmen jong ngi ki la pynbitar ïa U Blei ka Bneng, u la shah ba yn jop noh ïa ki da u syiem Nebukhadnessar jong ka Babilonia, u syiem na ka longïing syiem Khaldi. Ïa ka Templ la pynjot bad ïa ki briew la ringmraw sha Babilonia.

¹³ Nangta ha ka snem kaba nyngkong jong ka jingsynshar u syiem Syros kum u patsha ka Babilonia, u Syros u la pynmih ïa ki hukum na ka bynta ka jingtei biang ïa ka Templ.

¹⁴ U la pynphai pat ïa ki khiew ki pliang ksiar bad rupa jong ka Templ kiba u Nebukhadnessar u la rah na ka Templ ha Jerusalem bad buh ha ka templ ha Babilon. U Syros u la aiti ïa kine ki khiew ki pliang ha u briew uba kyrteng u Sheshbassar, ïa uba u la thung kum u lat ka Judah.

¹⁵ U patsha u ong ïa u ban rah ïa ki bad pynphai sha ka Templ ha Jerusalem bad ban tei pat ïa ka Templ ha ka jaka ba ka la ïeng mynshuwa.

¹⁶ Kumta u Sheshbassar u la wan bad buh ïa ka nongrim jong ka; ka jingtrei ka la ïaid naduh kata ka por haduh mynta, hynrei ym pat pyndep ïa ka Templ.’

¹⁷ “Mynta, lada ka pynsngewbha ïa phi, ko syiem, ai ba yn ïit ha ki jingthoh syiem ha Babilon ban shem lada u Syros u la ai ne um shym la ai ki hukum na ka bynta ka jingtei pat ïa kane ka Templ ha Jerusalem, bad nangta sa pyntip ïa ngi kaei ka mon jong phi ha kane ka kam.”