ESRA 4 - Khasi CL Bible (BSI)

Ka jingpyrshah ïa ka jingtei pat ïa ka Templ

¹ Ki nongshun jong ki briew ka Judah bad Benjamin ki la ïohsngew ba kita kiba la wan phai pat na ka jingshah ringmraw ki dang ïatei pat ïa ka Templ U Trai, U Blei ki Israel.

² Kumta ki leit ban ïakynduh ïa u Serubbabel bad ïa ki rangbah kur bad ki ong, “To ngin ïasnohkti lang bad phi ha ka jingtei ïa ka Templ. Ngi mane ïa ujuh U Blei uba phi mane, bad ngi ju ai ki jingkñia ha u naduh ka por u Esarhaddon, u patsha ka Assyria, uba phah ïa ngi ban shong ban sah hangne.”

³ U Serubbabel, u Joshua bad ki rangbah kur ki ong ïa ki, “Ngim donkam ïa ka jingïarap jong phi ban tei ïa ka templ na ka bynta U Trai U Blei jong ngi. Ngin tei hi ïa ka da lade, kumba u Syros, u patsha ka Persia, u la hukum ïa ngi.”

⁴ Nangta ki briew kiba shong basah ha ka ri ki pyrshang ban pynduh mynsiem bad pyntieng ïa ki Jiw bad ban khanglad ïa ka jingtrei.

⁵ Ki la pynbam pisa ruh ïa ki rangbah synshar ka sorkar Persia ban trei pyrshah ïa ki. Ki la ïai leh ïa kane baroh shi lynter ka jingsynshar u Syros haduh ka jingsynshar u Darius.

Ka jingpyrshah ïa ka jingtei pat ïa ka Jerusalem

⁶ Ha kaba sdang jong ka jingsynshar u patsha Serksis, ki nongshun jong ki briew kiba shong basah ha Judah bad Jerusalem ki la wanrah ïa ki jingmudui da ka jingthoh pyrshah ïa ki.

⁷ Ha ka por ka jingsynshar u Artakserksis, u patsha ka Persia, u Bishlam, u Mithredath, u Tabeel bad ki paralok jong ki, ki thoh shithi sha u patsha. Ïa ka shithi la thoh ha ka ktien Aramaik bad ban pynkylla ktien ha ka por ba pule ïa ka.

⁸ U Rehum ruh, u lat, bad u Shimshai, u sekretari jong ka probins, ki thoh ïa kane ka shithi sha u Artakserksis na Jerusalem:

⁹ “Na u Rehum, u lat, na u Shimshai, u sekretari jong ka probins, na ki paralok jong ki, ki nongbishar bad na baroh ki kiwei pat ki rangbah synshar, kiba long ki rangbah traishnong na Erekh, Babilon bad Susa ha ka ri Elam,

¹⁰ ryngkat bad kiwei ki jaitbynriew ïa kiba u Ashurbanipal bakhraw bad badonbor, u la pynkynriah ïa ki na ki ïing jong ki bad pynsah ïa ki ha ka nongbah Samaria bad shawei shaei ha ka probins jong ka Ïuphratis Sepngi.”

¹¹ Kane ka dei ka jingthoh ha ka shithi: “Ha u patsha Artakserksis, na ki shakri jong, ki rangbah ka Ïuphratis Sepngi.

¹² “Ngi kwah ba u syiem un tip ba ki Jiw kiba la wan hangne na kiwei ki ri, ki la shong la sah ha Jerusalem bad ki dang tei pat ïa kato ka nongbah kaba sniew bad kaba ïaleh pyrshah. Ki la sdang ban tei pat ïa ki kynroh bad shen kin sa pyndep ïa ki.

¹³ Ko syiem, lada ïa kane ka nongbah yn tei pat bad ïa ki kynroh jong ka yn pyndep, ki briew kin sa sangeh ban siew khajna, bad ki jingmih ka ïingsyiem kin sa duna.

¹⁴ Mynta, namar ba ngi don hapoh ka jingpynïaid jong phi, ko syiem, ngim kwah ban ïohi ïa kane ba kan jia, bad kumta ngi ai jingmut

¹⁵ ba phin hukum ban wad ïa ki jingbuh jingthoh kiba ki kpa tymmen jong phi ki la buh. Lada phi leh kumta, phin shem ba kane ka nongbah ka la long borabor kaba ïaleh pyrshah bad ba naduh ki por mynhyndai, ka la ju ai jingshitom ïa ki syiem bad ki nongsynshar ki jylla. Ka long borabor kaba eh ban synshar ïa ki briew jong ka. Dei na kane ka daw ba ïa ka nongbah la pynjot.

¹⁶ Ngi sngewskhem, namarkata, ba lada ïa kane ka nongbah la tei pat bad ba ïa ki kynroh la pyndep, ko Syiem, phin ym lah shuh ban pynïaid ïa ka probins jong ka Ïuphratis Sepngi.”

¹⁷ U patsha u phah ïa kane ka jubab: “Ha u Rehum, u lat, ha u Shimshai, u sekretari jong ka probins, bad ha ki paralok jong ki kiba shong ha Samaria bad ha kiba sah jong ka Ïuphratis Sepngi, ki jingkhublei.

¹⁸ “Ïa ka shithi kaba phi la phah, la pynkylla ktien bad pule ha nga.

¹⁹ Nga la hukum ban don ka jingtohkit, bad la shem shisha ba naduh ki por mynhyndai ka Jerusalem ka la ju ïaleh pyrshah ïa ka bor syiem bad ba ka dap da ki nongïaleh pyrshah bad ki nongthaw jingkulmar.

²⁰ Ki syiem bakhlaiñbor ki la synshar hangto bad ki la synshar ïa ka probins jong ka Ïuphratis Sepngi baroh kawei, ki da lum khajna bad ki jingmih.

²¹ Namarkata phi dei ban pynmih ki hukum ba kito ki rangbah kin sangeh noh na ka jingtei pat ïa ka nongbah haduh ba ngan da ai hukum da kumwei pat.

²² Leh ïa kane shisyndon, khnang ba yn ym don shuh ka jingma ïa ki jingthmu jong nga.”

²³ Tang shu pule ïa kane ka shithi na u Artakserksis ha u Rehum bad u Shimshai bad ki paralok jong ki, ki leit kyrkieh sha Jerusalem bad pynbor ïa ki Jiw ban sangeh noh na ka jingtei pat ïa ka nongbah.

Ka jingtrei ïa ka Templ ka sdang biang

²⁴ Ïa ka jingpyntrei ïa ka Templ la lah pynsangeh noh bad ka la sahkut khlem pyntrei shuh haduh ka snem ba ar jong ka jingsynshar u Darius, u patsha ka Persia.