ESRA 3 - Khasi CL Bible (BSI)

Ka jingshakri ka sdang biang

¹ Haba la dap hynñiew bnai, ki Israel ki la ïashongduh ha la ki shnong jong ki. Nangta baroh ki ïalumlang ha Jerusalem,

² bad u Joshua u khun jong u Jehosadak, ki para lyngdoh jong u, bad u Serubbabel u khun jong u Shealtiel, ryngkat bad ki ba-ha-ïing jong u, ki la ïatei biang ïa ka duwan jong U Blei ki Israel, khnang ba ki lah ban thang ki jingkñia halor jong ka kat kum ki jingbthah ba la thoh ha ka Hukum u Moses, u briew jong U Blei.

³ Wat la kiba shah ringmraw kiba la wan phai, ki sheptieng ïa ki briew kiba shong basah ha ka ri, pynban ki tei biang ïa ka duwan ha ka jaka ba ka ïeng mynshuwa. Nangta ki sdang biang ban thang halor jong ka ïa ki jingkñia man ka step bad man ka janmiet.

⁴ Ki rakhe ïa ka Jingkhawai Niam Ki Ïingtrep kat kum ki jingbuhbeit ryntih; ha kawei pa kawei ka sngi ki ai ki jingkñia kiba donkam ha kata ka sngi;

⁵ bad nalor kata, ki ai ki jingainguh thang tylli bad kito ki jingainguh ban ai ha ka Jingkhawai Niam Bnai Thymmai bad ha baroh kiwei ki jingïaseng ba ju long ha kaba la mane ïa U Trai, kumjuh ruh ki jingainguh ba ai sha U Trai da ka mon sngewbha.

⁶ Wat la ki briew kim pat shym la sdang ban tei biang ïa ka Templ, ki la sdang ha ka sngi banyngkong jong u bnai bahynñiew ban thang ki jingkñia sha U Trai.

Ka jingtei pat ïa ka Templ ka sdang

⁷ Ki briew ki ai pisa ban siew ïa ki misteri maw bad ki misteri dieng bad ïa ka jingbam jingdih bad ka umphniang Olib ban phah sha ki nongbah jong ka Tyros bad Sidon kum ka jingïabujli na ka bynta ki dieng Kedar na Lebanon, ban wallam lyngba ka duriaw sha Joppa. Ïa kane baroh la leh da ka jingai jingbit u Syros, u patsha ka Persia.

⁸ Kumta ha u bnai ba ar jong ka snem hadien ba ki la wan pat sha ka jaka jong ka Templ ha Jerusalem, ki sdang ban ïatrei. U Serubbabel, u Joshua bad kiwei pat ki para rangbah ka ri, ki lyngdoh, bad ki Lebi, ha ka jingshisha, baroh kiba shah ringmraw kiba la wan phai pat sha Jerusalem, ki la ïasnohkti lang ha ka jingtrei. Ïa baroh ki Lebi kiba la dap arphew snem ka rta lane tam, la buh ban khmih ha ka jingtei pat ïa ka Templ.

⁹ U Jeshua, u Lebi, lem bad ki khun shynrang bad ki ba-ha-ïing ha-sem jong u bad u Kadmiel bad ki khun shynrang jong u (na ka kur Hodabaïah), ki la ïasnohkti lang ha kaba khmih ïa ka jingtei biang ïa ka Templ. (Ïa ki la ïarap da ki Lebi jong ka kur Henadad.)

¹⁰ Haba ki rangbah ki la sdang ban tei ïa ka nongrim jong ka Templ, ki lyngdoh ha ki jingriam jong ki, ki ïeng ha la ki jaka bad ki turoi ha ki kti jong ki, bad ki Lebi jong ka kur Asaph ki ïeng hangta ryngkat bad ki shakuriaw. Ki ïaroh ïa U Trai kat kum ki jingbthah ba la ai pateng naduh ka por u syiem Dabid.

¹¹ Ki rwai ki jingïaroh ïa U Trai, da kaba ïai rwai ïa ka banktien: “U Trai u long uba bha, bad ka jingieit jong u ïa ki Israel ka long bymjukut.” Baroh ki pyrta jam katba don ka bor, da kaba ïaroh ïa U Trai, namar ka jingtei ïa ka nongrim jong ka Templ ka la sdang.

¹² Bun na ki lyngdoh ba la kham tymmen, ki Lebi, bad ki rangbah kur, ki la ïohi ïa ka Templ banyngkong, bad ki peit ïa ka nongrim jong kane ka Templ katba dang tei, ki ïam pangnud. Hynrei kiwei pat kiba don hangta ki pyrta da ka jingkmen.

¹³ Ym don ba lah ban pynïapher hapdeng ki jingpyrta jong ka jingkmen bad ka jingïam, namar ka jingsawa kaba ki la pynlong ka long kaba haduh katta katta, ba lah ban ïohsngew shaduh sha jngai.