ESRA 2 - Khasi CL Bible (BSI)

Ka thup kyrteng jong kito kiba wan phai na ka jingshah ringmraw

¹ Bun na kiba la shah ringmraw, ki la mihnoh na ka probins jong ka Babilon bad wan phai pat sha Jerusalem bad Judah, uwei pa uwei sha la ka jong ka nongbah. Ki longïing jong ki, ki la shong la sah ha ka jingshah ringmraw ha Babilon naduh ka por ba u Nebukhadnessar u la lah rah ïa ki hangta kum ki koidi.

² Ki nongïalam jong ki, ki long u Serubbabel, u Joshua, u Nehemaïah, u Seraïah, u Reelaïah, u Mordekai, u Bilshan, u Mispar, u Bigbai, u Rehum bad u Baanah. Kane ka dei ka thup kyrteng jong ki kur ki Israel, bad kito kiba dei na kawei kawei ka kur kaba wan phai na ka jingshah ringmraw:

^3-20 Parosh — Ar hajar shispah hynñiewphew ar ngut. Shephataïah — Laispah hynñiewphew ar ngut. Arah — Hynñiewspah hynñiewphew san ngut. Pahath Moab (ki khun ki ksiew u Jeshua bad u Joab) — Ar hajar phraspah khat-ar ngut. Elam — Shihajar arspah sanphew saw ngut. Sattu — Khyndaispah sawphew san ngut. Sakkai — Hynñiewspah hynriewphew ngut. Bani — Hynriewspah sawphew ar ngut. Bebai — Hynriewspah arphew lai ngut. Asgad — Shihajar laispah arphew ar ngut. Adonikam — Hynriewspah hynriewphew hynriew. Bigbai — Ar hajar sanphew hynriew ngut. Adin — Sawspah sanphew saw ngut. Ater (la khot ruh Hesekaïah) — Khyndaiphew phra ngut. Besai — Laispah arphew lai ngut. Jorah — Shispah khat-ar ngut. Hashum — Arspah arphew lai ngut. Gibbar — Khyndaiphew san ngut.

^21-35 Ki briew kiba ki kpa tymmen jong ki kiba la shong la sah ha kine ki shnong ruh ki la wan phai: Bethlehem — Shispah arphew lai ngut. Netophah — Sanphew hynriew ngut. Anathoth — Shispah arphew phra ngut. Asmabeth — Sawphew ar ngut. Kiriath Jearim, Shephirah bad Beeroth — Hynñiewspah sawphew lai ngut. Ramah bad Geba — Hynriewspah arphew wei ngut. Mikhmash — Shispah arphew ar ngut. Bethel bad Ai — Arspah arphew lai ngut. Nebo — Sawphew ar ngut. Magbish — Shispah sanphew hynriew ngut. Kawei pat ka Elam — Shihajar arspah sanphew saw ngut. Harim — Laispah arphew ngut. Jerikho — Laispah sawphew san ngut. Lod, Hadid bad Ono — Hynñiewspah arphew san ngut. Senaah — Lai hajar hynriewspah laiphew ngut.

^36-39 Kane ka dei ka thup kyrteng jong kiba na ka kur lyngdoh kiba wan phai na ka jingshah ringmraw: Jedaïah (ki khun ki ksiew jong u Jeshua) — Khyndaispah hynñiewphew lai ngut. Immer — Shihajar sanphew ar ngut. Pashhur — Shihajar arspah sawphew hynñiew ngut. Harim — Shihajar khathynñiew ngut.

^40-42 Ki kur jong ki Lebi kiba wan phai na ka jingshah ringmraw: Jeshua bad Kadmiel (ki khun ki ksiew jong u Hodabaïah) — Hynñiewphew saw ngut. Ki nongtem nongput ka Templ (ki khun ki ksiew u Asaph) — Shispah arphew phra ngut. Ki nongap phira ka Templ (ki khun ki ksiew u Shallum, u Ater, u Talmon, u Akkub, u Hatita bad Shobai) — Shispah laiphew khyndai ngut.

^43-54 Ki kur jong ki nongtrei ka Templ kiba wan phai na ka jingshah ringmraw: Siha, Hasupha, Tabbaoth, Keros, Siaha, Padon, Lebanah, Hagabah, Akkub, Hagab, Shamlai, Hanan, Giddel, Gahar, Reaïah, Resin, Nekoda, Gassam, Ussa, Paseah, Besai, Asnah, Meunim, Nephisim, Bakbuk, Hakupha, Harhur, Basluth, Mehida, Harsha, Barkos, Sisera, Temah, Nesaïah, bad Hatipha.

^55-57 Ki kur jong ki shakri u Solomon kiba wan phai na ka jingshah ringmraw: Sotai, Hassophereth, Peruda, Jaalah, Darkon, Giddel, Shephataïah, Hattil, Pokhereth Hassebaim bad Ami.

⁵⁸ Baroh ki khun ki ksiew jong ki nongtrei ka Templ bad ki shakri u Solomon kiba la wan phai na ka jingshah ringmraw ki long laispah khyndaiphew ar ngut.

^59-60 Ki don hynriewspah sanphew ar ngut kiba dei na ki kur u Delaïah, u Tobiah bad u Nekoda kiba la wan phai na ki shnong ka Tel Melah, Tel Harsha, Kherub, Addan bad Immer; hynrei kim shym la lah ban pynshisha ba ki dei kiba hiarpateng na ki Israel.

^61-62 Kine ki kur lyngdoh kim shym shem ka jingbuh jingthoh ka ban pynshisha ïa ka jinghiarpateng na ki kpa tymmen: Habaïah, Hakkos bad Barsillai. (U kpa tymmen jong ka kur lyngdoh jong u Barsillai u la shongkurim ïa ka kynthei na ka kur u Barsillai jong ka Gilead bad shim ïa ka kyrteng jong ka kur u kthaw jong u.) Namar ba kim shym la lah ban pynshisha mano ba dei ki kpa tymmen jong ki, ym shym la pdiang ïa ki kum ki lyngdoh.

⁶³ U lat uba dei u Jiw u ong ïa ki ba kim lah ban bam ïa ki jingbam ba la kñia ha U Blei haduh ban da don u lyngdoh uba lah ban pyndonkam ïa u Urim bad u Thummim.

^64-67 Baroh kiba wan phai na ka jingshah ringmraw ki long — Sawphew ar hajar laispah hynriewphew ngut. Ki shakri shynrang bad kynthei — Hynñiew hajar laispah laiphew hynñiew ngut. Ki nongput nongtem shynrang bad kynthei — Arspah ngut. Ki kulai — Hynñiewspah laiphew hynriew tylli. Ki khashor — Arspah sawphew san tylli. Ki ut — Sawspah laiphew san tylli. Ki kada — Hynriew hajar hynñiewspah arphew tylli.

⁶⁸ Haba kiba shah ringmraw ki la poi ha ka Templ U Trai ha Jerusalem, katto katne na ki nongïalam jong ki kur ki la ai ki jingainguh mon sngewbha ban ïarap ïa ka jingtei biang ïa ka Templ ha ka jaka ba-mynshuwa.

⁶⁹ Ki la ai katba ki lah na ka bynta kane ka jingtrei, bad kaba mih baroh ka long sanspah kilo ka ksiar, ar hajar phraspah kilo ka rupa bad shispah tylli ki jaiñkup na ka bynta ki lyngdoh.

⁷⁰ Ki lyngdoh, ki Lebi bad katto katne na ki briew ki la shongduh ha Jerusalem ne ki jaka ba-marjan; ki nongtem nongput, ki nongap phira ka Templ, bad ki nongtrei shynrang ka Templ ki la shongduh ha ki shnong ba-marjan; bad kiba sah na ki Israel ki shongduh ha ki shnong kiba ki kpa tymmen jong ki, ki la shong la sah.