ESRA 10 - Khasi CL Bible (BSI)

Ka jingpynkhreh ban pynkut ïa ki jingïashongkha khleh

¹ Katba u Esra u dang dem ha ka jingduwai ha khmat ka Templ, da kaba ïam bad phla ïa kine ki pop, shi kynhun bah ki Israel — ki rangbah, ki kynthei bad ki khynnah — ki ïalum sawdong ïa u, ki da ïam pait dohnud.

² Nangta u Shekanaïah u khun jong u Jehiel, jong ka kur u Elam, u ong ïa u Esra, “Ngi la pynkheiñ ïa ka jingngeit bad U Blei da kaba shongkurim ïa ki kynthei nongwei, hynrei wat la katta ruh ka dang don ka jingkyrmen na ka bynta ka Israel.

³ Mynta ngi dei ban pynlong ka jingkular bakyntang ha U Blei jong ngi ba ngin phah noh ïa kine ki kynthei bad ki khynnah. Ngin leh ïa kaei kaba ma phi bad kiwei kiba burom ïa ki hukum U Blei kiba hikai ïa ngi ban leh. Ngin leh ïa kaei kaba ka Hukum U Blei ka dawa.

⁴ Ka long ka jingkitkhlieh jong phi ban pyntreikam. Ngi don hadien jong phi, kumta ïaid shaphrang ban pyndep ïa ka.”

⁵ Kumta u Esra u la sdang da kaba pynlong ba ki nongïalam jong ki lyngdoh, ki Lebi bad kita kiwei ki briew, ban shim ïa ka jingsmai ba kin leh ïa kaei kaba u Shekanaïah u la tyrwa.

⁶ Nangta u leit na khmat ka Templ sha ki jaka sah jong u Jehohanan u khun jong u Eliashib, bad u pynlut ïa ka miet hangta ryngkat bad ka jingsngewsih ïa ka jingbymkohnguh jong kiba la shah ringmraw. Um shym la bam ne dih ei ei.

⁷ Ïa ka khubor la phah sha kylleng ka Jerusalem bad Judah ba baroh kito kiba la wan phai na ka jinglongmraw kin ïakynduh lang ha Jerusalem da ka hukum jong ki nongïalam jong ki paidbah.

⁸ Lada don mano mano u bym wan hapoh lai sngi, ïa ka jingdon jingem jong u baroh yn knieh noh, bad un duh ïa la ka hok ban long u dkhot ka imlang ka sahlang.

⁹ Hapoh lai sngi, ha ka sngi kaba arphew jong u bnai uba khyndai, baroh ki rangbah kiba shong basah ha ki ri ka Judah bad Benjamin ki la wan sha Jerusalem bad ki la ïalumlang ha ka phyllaw jong ka Templ. Ka la don ka jingslap kaba jur, bad namar ka jinglong jong ka suiñbneng bad ka jingkhia jingmut jong ka jingïalang, baroh ki la ïakyiuh.

¹⁰ U Esra u lyngdoh u la ïeng bad kren ha ki. U ong, “Phim shym la neh ha ka jingngeit bad phi la wanrah ïa ka jingpynrem halor ka Israel da kaba shongkurim ïa ki kynthei nongwei.

¹¹ Mynta, to phla ïa ki pop jong phi ha U Trai, U Blei jong ki kpa tymmen jong phi, bad to leh ïa kaei kaba pynsngewbha ïa u. Pynkyrpang ïa lade na ki nongwei kiba shong ha ka ri jong ngi bad pyllait noh ïa ki tnga nongwei jong phi.”

¹² Ki briew ki jubab da kaba pyrta, “Ngin leh ïa kaei kaba phi ong.”

¹³ Hynrei ki ong pat, “U paidbah u bun palat, bad u slap u dang jur. Ngim lah ban ïeng hangne ha kane ka rukom khlem don ka jingda. Kane ka long kaei kaei kaba ym lah ban pyndep ha ka shi sngi ne ar sngi, namar bun eh na ngi, ngi leh ïa kane ka pop.

¹⁴ To ai ba ki rangbah synshar jong ngi kin sah ha Jerusalem bad khmih ïa kane ka kam. Nangta ai ba kita kiba don ki tnga nongwei kin wan ha ka por ba la buh, ryngkat bad ki nongïalam bad ki nongbishar jong kane ka nongbah. Ha kane ka rukom ka jingbitar U Blei halor kane ka kam kan phai noh na ngi.”

¹⁵ Ym shym don mano mano ba pyrshah ïa kata ka jingpynbeit lait tang u Jonathan u khun jong u Asahel bad u Jahseïah u khun jong u Tikbah, kiba la ïoh ïa ka jingkyrshan jong u Meshullam bad u Shabbethai, u Lebi.

¹⁶ Kiba shah ringmraw kiba la wan phai pat ki pdiang ïa ka jingpynbeit, kumta u Esra u lyngdoh u thung ki rangbah napdeng ki rangbah kur bad buh jingthoh ïa ki kyrteng jong ki. Ha ka sngi kaba nyngkong jong u bnai uba shiphew ki sdang ïa ka jingtohkit,

¹⁷ bad hapdeng lai bnai ki la tohkit ïa baroh ki rangbah kiba don ki tnga nongwei.

Ki rangbah kiba don ki tnga nongwei

^18-25 Kane ka dei ka thup kyrteng jong ki rangbah kiba don ki tnga nongwei: Ki lyngdoh, ba la jer kyrteng da ki kur: Ka kur u Joshua bad ki para jong u, ki khun shynrang u Jehosadak: U Maaseïah, u Elieser, u Jarib bad u Gedalaïah. Ki kular ban pyllait noh ïa ki tnga jong ki, bad ki ai ïa u langbrot kum ka jingkñia ïa ki pop jong ki. Ka kur u Immer: U Hanani bad u Sebadaïah. Ka kur u Harim: u Maaseïah, u Elijah, u Shemaïah, u Jehiel bad u Ussaïah. Ka kur u Pashhur: u Elioenai, u Maaseïah, u Ishmael, u Nethanel, u Josabad bad u Elasah. Ki Lebi: U Josabad, u Shimei, u Kelaïah (ba la khot ruh Kelita), u Pethahaïah, u Judah bad u Elieser. Ki nongput nongtem: U Eliashib. Ki nongap phira ka Templ: U Shallum, u Telem bad u Uri. Kiwei pat: Ka kur u Parosh: u Ramaïah, u Issaïah, u Malkhijah, u Mijamin, u Eleaser, u Malkhijah bad u Benaïah.

²⁶ Ka kur u Elam: u Mattanaïah, u Sekharaïah, u Jehiel, u Abdi, u Jeremoth bad u Elijah.

²⁷ Ka kur u Sattu: u Elioenai, u Eliashib, u Mattanaïah, u Jeremoth, u Sabad bad u Asisa.

²⁸ Ka kur u Bebai: u Jehohanan, u Hananaïah, u Sabbai bad u Athlai.

²⁹ Ka kur u Bani: u Meshullam, u Mallukh, u Adaïah, u Jashub, u Sheal, bad u Jeremoth.

³⁰ Ka kur u Pahath Moab: u Adna, u Khelal, u Benaïah, u Maaseïah, u Mattanaïah, u Besalel, u Binnui bad u Manasseh.

^31-32 Ka kur u Harim: u Elieser, u Isshijah, u Malkhijah, u Shemaïah, u Shimeon, u Benjamin, u Mallukh bad Shemaraïah.

³³ Ka kur u Hashum: u Mattenai, u Mattattah, u Sabad, u Eliphelet, u Jeremai, u Manasseh bad u Shimei.

^34-37 Ka kur u Bani: u Maadai, u Amram, u Uel, u Benaïah, u Bedeïah, u Kheluhi, u Banaïah, u Meremoth, u Eliashib, u Mattanaïah, u Mattenai bad u Jaasu.

^38-42 Ka kur u Binnui: u Shimei, u Shelemaïah, u Nathan, u Adaïah, u Makhnadebai, u Shashai, u Sharai, u Asarel, u Shelemaïah, u Shemaraïah, u Shallum, u Amaraïah bad u Joseph.

⁴³ Ka kur u Nebo: u Jeiel, u Mattithaïah, u Sabad, u Sebina, u Jaddai, u Joel bad u Benaïah.

⁴⁴ Kine ki rangbah baroh ki don ki tnga nongwei. Ki la pyllait noh ïa ki bad phah noh ïa ki bad ïa ki khun jong ki.