ESRA 1 - Khasi CL Bible (BSI)

¹ Ha snem kaba nyngkong ba u Syros u long u patsha jong ka Persia, U Trai u la pynlong ïa kaei kaba u la ong lyngba u nongïathuhlypa Jeremaïah ba kan long shisha. U la pynkhih ïa u Syros ban pynmih ïa kane ka hukum bad phah ïa ka ha ka jingthoh ban pule jam ha baroh sawdong ka hima jong u:

² “Kane ka dei ka hukum u Syros, u patsha ka Persia. U Trai, U Blei jong ka Bneng, u la pynlong ïa nga u nongsynshar jong ka pyrthei baroh kawei bad u la ai ha nga ïa ka jingkitkhlieh ban tei ïa ka templ ïa u ha Jerusalem ha Judah.

³ To U Blei un long bad phi baroh kiba dei ki briew jong u. Phi dei ban leit sha Jerusalem bad tei biang ïa ka Templ jong U Trai, U Blei ki Israel, U Blei ïa uba la mane ha Jerusalem.

⁴ Lada mano mano na ki briew jong u ha ka jingshah ringmraw ki donkam ïa ka jingïarap ban leit phai, ki paramarjan jong ki, ki dei ban ai ïa ki kane ka jingïarap. Ki dei ban pynbiang ïa ki ka rupa bad ka ksiar, ki mar ki mata, ki mrad kit jingkit, kumjuh ruh ki jingai sngewbha na ka bynta ka Templ U Blei ha Jerusalem.”

⁵ Nangta ki rangbah kur jong ki jait Judah bad Benjamin, ki lyngdoh bad ki Lebi, bad baroh kiwei ïa kiba U Blei u la pynkhih ïa ki dohnud jong ki, ki long ba la kloi ban leit bad tei biang ïa ka Templ U Trai ha Jerusalem.

⁶ Baroh ki paramarjan ki la ïarap ïa ki da kaba ai ïa ki bun kiei kiei: ki khiew rupa, ka ksiar, ki mar ki mata bad ki jingai sngewbha na ka bynta ka Templ.

⁷ U Syros u la pynphai pat sha ki ïa ki pliang bad ki khuri kiba u syiem Nebukhadnessar u la rah na ka Templ ha Jerusalem bad ba u la buh ha ka templ jong ki blei jong u.

⁸ U la aiti ïa ki ha u Mithredath u rangbah uba hakhlieh duh jong ka ïing jingkynshew u syiem, uba la thaw ïa ka thup jong ki tiar ki tar na ka bynta u Sheshbassar, u lat ka Judah,

^9-10 kumne harum: Laiphew tylli ki pliang ksiar ba pyndonkam ha ki jingainguh. Shihajar tylli ki pliang rupa ba pyndonkam ha ki jingainguh. Arphew khyndai tylli kiwei pat ki pliang. Laiphew tylli ki pliang rupa barit. Sawspah shiphew tylli ki pliang ksiar barit. Laiphew tylli kiwei pat ki khiew ki pliang.

¹¹ Ha baroh ki don san hajar sawspah tylli ki pliang ksiar bad pliang rupa bad kiwei ki tiar ki tar kiba u Sheshbassar u la shim mynba ma u bad kiwei kiba la shah ringmraw ki la leit na Babilon sha Jerusalem.