EPHESOS 5 - Khasi CL Bible (BSI)

Im ha ka jingshai

¹ Namar phi long ki khun kiba ieit eh jong U Blei, phi dei ban long kum ma u.

² Ïa ka jingim jong phi dei ban synshar da ka jingieit, kumba U Khrist u la ieit ïa ngi bad u la aiti ïa la ka jingim na ka bynta jong ngi kum ka jingainguh ba-iwbih bad ka jingkñia ba pynsngewbha ïa U Blei.

³ Namar ba phi long ki briew jong U Blei, kam long kaba dei wat ban ïakren hapdeng jong phi ïa kino kino ki kam awria ne ki kam jakhlia ne ki kam kwah lalot.

⁴ Lymne kam long kaba dei ïa phi ban pyndonkam ïa ka ktien kaba khlem akor, kren thala, ne krensih, pynban, phi dei ban ainguh ïa U Blei.

⁵ Phi dei ban sngewskhem ba yn ym don uno uno uba awria, uba long jakhlia, lane uba kwah lalot (naba ka jingkwah lalot ka long hi ka rukom mane bleithaw) u ban ïoh bynta ha ka Hima jong U Khrist bad jong U Blei.

⁶ Wat shah ïano ïano ban shukor ïa phi da ki ktien bieit, namar dei na kine kiei kiei ba ka jingbitar U Blei kan wan ha kito ki bymkohnguh ïa u.

⁷ Kumta phim dei ban ïadon bynta ei ei bad kiba kum kita ki briew.

⁸ Phi hi phi la ju long mynno mynno ha ka jingdum, hynrei namar phi la long ki briew jong U Trai, phi long ha ka jingshai. Kumta phi dei ban im kum ki briew kiba don ha ka jingshai,

⁹ naba ka dei ka jingshai kaba pynmih ïa ka jingot kaba kyrhai ha baroh ki jinglong babha, bahok, bad bashisha.

¹⁰ Pyrshang ban tip ïa kaei kaba pynsngewbha ïa U Trai.

¹¹ Phim dei ban ïadon bynta ei ei bad ki kam bym don jingmyntoi kiba ki briew ki leh, kiba long ki kam ka jingdum. Pynban wallam ïa ki sha ka jingshai.

¹² (Ka long da shisha kaba lehrain eh wat ban ïakren ïa kita kiei kiei ïa kiba ki leh ha kaba rieh).

¹³ Bad haba ïa kiei kiei baroh la wallam sha ka jingshai, te ïa ka jinglong bashisha jong ki la pynpaw shynna; naba kaei kaei kaba la pynpaw shynna ka kylla long ka jingshai.

¹⁴ Kata ka long balei ba la ong, “To khie joit, me uba ïohthiah, bad to mih na kiba ïap, bad U Khrist un tyngshaiñ halor jong me.”

¹⁵ Kumta da sumar kumno phi im. Wat im kum ki briew kiba bieit, hynrei, kum ki briew kiba stad.

¹⁶ To pyndonkam bha ïa ki kabu baroh ba phi ïoh, namar kine ki long ki sngi kiba sniew.

¹⁷ Wat long kiba bieit, hynrei, pyrshang ban wad ïa kaei kaba U Trai u kwah ïa phi ban leh.

¹⁸ Wat buaid da ka waiñ, ha kaba kan pynjot ïa phi; pynban, to long kiba la pyndap da U Mynsiem.

¹⁹ To ïakren iwei ïa iwei pat da ki ktien ha ki salm, ki jingrwai ïaroh bad ki jingrwai ba kynja mynsiem; da kaba rwai ki jingrwai ïaroh bad ki salm sha U Trai da ki jingïaroh ha ki dohnud jong phi.

²⁰ Ha ka kyrteng U Jisu Khrist uba U Trai jong ngi, to ïai ainguh borabor na ka bynta kiei kiei baroh sha U Blei uba U Kpa.

Ka kamram u Tnga bad ka Tnga

²¹ To pyndem ïa lade iwei ha iwei pat namar ka jingsheptieng burom jong phi ïa U Khrist.

²² Ko ki kynthei, to pyndem ha la ki tnga, kumba ha U Trai.

²³ Naba u tnga u don ka iktiar halor la ka tnga kumba U Khrist u don ka iktiar halor ka balang; bad U Khrist hi u long U Nongpynim jong ka balang, ka met jong u.

²⁴ Bad kumta ki kynthei ki dei ban aiti lut ha ki tnga jong ki kumba ka balang ka aiti ïa lade ha U Khrist.

²⁵ Ko ki shynrang, to ieit ïa la ki tnga kumba U Khrist u la ieit ïa ka balang bad u la ai ïa la ka jingim na ka bynta jong ka.

^26-27 U la leh ïa kane ban pynkyntang ïa ka balang sha U Blei da ka ktien jong u, hadien ba la pynkhuid ïa ka da kaba sait ïa ka ha ka um, khnang ban aiti ïa ka balang sha lade hi, ha ka jingitynnat jong ka baroh — kaba khuid bad khlem shah kynnoh pop, khlem ka jingthohbria ne ka jingsti ne kano kano ka jingbymjanai.

²⁸ Ki shynrang ki dei ban ieit ïa ki tnga jong ki kumba ki ieit ïa la ki jong ki met. U shynrang uba ieit ïa la ka tnga u ieit ïa lade hi.

²⁹ (Ym ju don uno uno uba isih ïa la ka jong ka met. Pynban, u bsa bad sumar ïa ka, kumba U Khrist ruh u leh ïa ka balang;

³⁰ naba ngi long ki dkhot ka met jong u.)

³¹ Kumba ka Jingthoh Bakhuid ka ong, “Namar kane ka daw, u briew un iehnoh ïa la u kpa bad ïa la ka kmie bad un ïalong kawei bad la ka tnga, bad ki ar ngut kin ïalong kawei.”

³² Ka don ka jingmaïan kaba la pynpaw ha ka Jingthoh Bakhuid, kaba nga sngewthuh kaba thew ïa U Khrist bad ïa ka balang.

³³ Hynrei ka thew ruh ïa phi: Man u shynrang u dei ban ieit ïa la ka tnga kumba ïa lade, bad man ka kynthei ka dei ban ñiewburom ïa la u tnga.