EKSODOS 40 - Khasi CL Bible (BSI)

Kaba pynïeng bad pynkyntang ïa Ka Ïingjaiñ Ka Jingdon Ryngkat U Trai

¹ U Trai u ong ha u Moses,

² “Ha ka sngi kaba nyngkong jong u bnai uba nyngkong pynïeng ïa ka Ïingjaiñ ka Jingdon Ryngkat U Trai.

³ Buh hangta ïa ka Synduk ka Jutang ha kaba don ki Shiphew Hukum, bad kah ïa ka da ka pyrda.

⁴ Wanrah ïa ka miej bad buh ryntih ïa ki tiar jong ka ha ka. Wanrah ruh ïa u diengpynïeng sharak bad buh hangta ïa ki sharak jong u.

⁵ Buh ïa ka duwan ksiar ban thang jingiwbih ha khmat ka Synduk ka Jutang, bad wah ïa ka pyrda ha ka jaka rung jong ka Ïingjaiñ.

⁶ Buh ïa ka duwan ka jingainguh thang ha khmat ka jingkhang jong ka Ïingjaiñ.

⁷ Buh ïa ka dabor hapdeng ka Ïingjaiñ bad kata ka duwan, bad pyndap ïa ka da ka um.

⁸ Pynïeng ïa ka phyllaw kaba baroh sawdong bad wah ïa ka pyrda ha ka khyrdop jong ka.

⁹ “Nangta, pynkyntang ïa ka Ïingjaiñ, bad ïa ki jingbuh jingsat jong ka baroh da kaba synreit da ka umphniang pynsleh; te kan sa long kaba kyntang.

¹⁰ Nangta pynkyntang ïa ka Ïingjaiñ bad ïa ki tiar jong ka baroh da kaba synreit da ka umphniang pynsleh; te kan sa long kaba kyntang nadong shadong.

¹¹ Ha kajuh ka rukom, pynkyntang ïa ka dabor bad ïa ka jingpynshong jong ka.

¹² “Ïalam ïa u Aaron bad ïa ki khun shynrang jong u sha ka khyrdop jong ka Ïingjaiñ, bad ong ïa ki ban sum kat kum ka jinglehniam.

¹³ Pynkup ïa u Aaron da ki jaiñphong lyngdoh, pynsleh ïa u, bad da kane pynkyntang ïa u, ba u lah ban shakri ïa nga kum u lyngdoh.

¹⁴ Wan ïalam sa ïa ki khun shynrang jong u, bad pynphong sopti ïa ki.

¹⁵ Nangta, pynsleh ïa ki kumba me leh ïa u kpa jong ki, ba ki lah ban shakri ïa nga kum ki lyngdoh. Da kane ka jingpynsleh, kin ïailong ki lyngdoh shi rta.”

¹⁶ U Moses u leh ïa kata baroh kumba U Trai u la hukum ïa u.

¹⁷ Kumta ha ka sngi kaba nyngkong jong u bnai uba nyngkong jong ka snem kaba ar hadien ba ki la mihnoh na Ijipt, la pynïeng ïa kata ka Ïingjaiñ ka Jingdon Ryngkat U Trai.

¹⁸ Ha kaba pynïeng ïa ka, u Moses u pynskhem ïa ki thliew tnaw jong ka, u pynïeng ïa ki jingker jong ka, u pyndait ïa ki diengkhap jong ka, bad u pynïeng ïa ki rishot jong ka.

¹⁹ U siang ïa ka jingsiang halor ka Ïingjaiñ bad u buh sa ïa ka jingtap halor jong ka, kumba U Trai u la hukum.

²⁰ Nangta u shim ïa kita ki mawlyngkniap ar tylli bad u buh ïa ki hapoh ka Synduk ka Jutang. U bsuh ïa ki dieng jingbah ha ki kyrwoh jong kata ka synduk bad u buh ïa ka jingtap halor jong ka.

²¹ Nangta u buh ïa kata ka synduk hapoh ka Ïingjaiñ bad u wah ïa ka pyrda. Da kumne u kah ïa ka Synduk ka Jutang, kumba U Trai u la hukum ïa u.

²² U buh ïa ka miej hapoh ka Ïingjaiñ, ha ka liang kaba shaphang shatei, shabar kata ka pyrda,

²³ bad u buh halor jong ka ïa u kpu ba la pynkyntang sha U Trai, kumba U Trai u la hukum ïa u.

²⁴ U buh ïa u diengpynïeng sharak hapoh ka Ïingjaiñ, ha ka liang kaba shaphang shathie, marpyrshah kata ka miej,

²⁵ bad hangta ha ka jingdon U Trai u thang ïa kita ki sharak, kumba U Trai u la hukum ïa u.

²⁶ U buh ïa ka duwan ksiar hapoh ka Ïingjaiñ, ha khmat ka pyrda,

²⁷ bad u thang ïa ka jingiwbih suhsieng halor jong ka, kumba U Trai u la hukum ïa u.

²⁸ U wah ïa ka pyrda ha ka jingkhang ka Ïingjaiñ,

²⁹ bad hangta ha khmat jong kata ka pyrda u buh ïa ka duwan ka jingainguh thang. U kñia ïa ka jingainguh thang bad ïa ka jingainguh bam halor jong ka, kumba U Trai u la hukum ïa u.

³⁰ U buh ïa ka dabor hapdeng ka Ïingjaiñ bad kata ka duwan, bad u pyndap ïa ka da ka um.

³¹ U Moses, u Aaron, bad ki khun shynrang jong u, ki sait ïa la ki kti bad ïa la ki kjat

³² man kaba ki rung shapoh ka Ïingjaiñ ne ki leit sha jan kata ka duwan, kumba U Trai u la hukum.

³³ U Moses u pynïeng sa ïa ka phyllaw kaba baroh sawdong ka Ïingjaiñ bad kata ka duwan, bad u wah ïa ka pyrda ha khyrdop jong ka phyllaw. Kumta keiñ u Moses u pyndep ïa kata ka kam baroh.

U lyoh halor Ka Ïingjaiñ Ka Jingdon Ryngkat U Trai

³⁴ Nangta u lyoh u tap ïa ka Ïingjaiñ baroh kawei, bad ka burom batyngshaiñ na ka jingdon ryngkat U Trai ka pyndap ïa ka.

³⁵ Namar kane, u Moses um shym lah ban leit rung shapoh kata ka Ïingjaiñ.

³⁶ Ki Israel ki kynriah jaka tang lada uta u lyoh u kiew shajrong na kata ka Ïingjaiñ.

³⁷ Katba u lyoh u dang neh sah hajuh, ki ruh kim kynriah na ka jaka sher dara.

³⁸ Ha ki jingïaid lynti jong ki baroh shi lynter, ki lah ban ïohi mynsngi ïa ka jingdon ryngkat U Trai ha uta u lyoh halor ka Ïingjaiñ, bad mynmiet pat ha ka ding kaba meh halor jong ka.