EKSODOS 39 - Khasi CL Bible (BSI)

Kaba suh ïa ki jaiñphong na ka bynta ki lyngdoh

¹ Da u 'saiwul uba jngum, uba sawbthuh, bad uba rong saw, ki suh ïa ki jaiñphong kiba ishongkun ba ki lyngdoh ki dei ban kup haba ki shakri ha ka Jaka Kaba Kyntang. Ki suh ïa kine ki jaiñphong lyngdoh na ka bynta u Aaron kumba U Trai u la hukum ïa u Moses.

² Ki suh ki thain ïa ka ephod da ka jaiñ linen kaba ni; da u 'saiwul uba jngum, uba sawbthuh, bad uba rong saw; bad da u 'sai ksiar.

³ Ki shoh stang kum ki jingsiang ïa ka ksiar bad ki ot ïa ka ksiar kum ki ksai ïa ka ban suh ha kata ka jaiñ linen kaba ni, bad ha u 'saiwul uba jngum, uba sawbthuh, bad uba rong saw.

⁴ Ki shna ar tylli ki jingteh tyrpeng bad ki pyndait ïa ki ha ki rmiang jong ka ephod na baroh arliang, khnang ba lah ban teh skhem ïa ka.

⁵ Ïa u panpoh ba la thain itynnat bha da kijuh ki tiar la pyndait lang ha ka ephod kumba U Trai U la hukum ïa u Moses.

⁶ Ki pynkhreh ïa ki mawkordor Karnelian bad ki buh ïa ki ha ki jingoh-shrong kiba da ka ksiar. Ha kita la thoh ïa ki kyrteng jong ki khat-ar ngut ki khun shynrang u Jakob.

⁷ Ki pyndait ïa ki ha ki tyllai tawah tyrpeng jong ka ephod ba kin ïeng na ka bynta ki khat-ar jait Israel, kumba U Trai u la hukum ïa u Moses.

Ka jingshna ïa ka jingdeng shadem

⁸ Ki shna ïa ka jingdeng shadem da kijuh ki tiar da kiba la suh ïa ka ephod, bad ki pynpur itynnat ïa ka ruh ha kajuh ka rukom.

⁹ Ka long kaba sawdong bad kaba la khylliap ar syrtap. Ka don arphew ar sentimitar ka lynter bad arphew ar sentimitar ka jingïar.

¹⁰ Ki buh saw kyrdon ki mawkordor ha ka; ïa u Rubi, u Topas, bad u Garnet ha ka kyrdon kaba nyngkong;

¹¹ ïa u Emerald, u Sapphir, bad u Diamond ha ka kyrdon kaba ar;

¹² ïa u Turkwois, u Agate, bad u Amethyst ha ka kyrdon kaba lai;

¹³ bad ïa u Beryl, u Karnelian, bad u Jasper ha ka kyrdon kaba saw. Ïa kine baroh la pyndait ha ki jingoh-shrong kiba da ka ksiar.

¹⁴ Ha uwei uwei na ki khat-ar tylli ki mawkordor la thoh ïa ka kyrteng jong uwei na ki khun shynrang u Jakob ba kin ïeng na ka bynta ki khat-ar jait Israel.

¹⁵ Ki shna ïa ki kynjri kiba da ka ksiar nylla ba la jyrthiaw kum u tyllai na ka bynta kata ka jingdeng shadem.

¹⁶ Ki shna ar tylli ki shrong ksiar bad ar tylli ki kyrwoh ksiar, bad ki pyndait ïa kita ki kyrwoh ar tylli ha ki dong kiba shaneng jong ka jingdeng shadem.

¹⁷ Ki teh ïa kita ki kynjri ksiar ha kita ki kyrwoh,

¹⁸ bad ki teh ïa ki tduh jong ki ha kita ki ar tylli ki shrong, bad ki pynsnoh ïa ki sha khmat ha ki tyllai tawah tyrpeng jong ka ephod

¹⁹ Ki shna ar tylli ki kyrwoh ksiar bad ki buh ïa ki na shapoh jong ka jingdeng shadem ha ki tduh kiba sha trai jong ka, hajan ka ephod.

²⁰ Ki shna ruh sa ar tylli ki kyrwoh ksiar bad ki pyndait ïa ki ha trai jong kita ki tyllai tawah tyrpeng kiba sha khmat jong ka ephod, hamar ka jaka suh pyndait, bad haneng ka jingpanpoh ba la thain itynnat bha.

²¹ Ki teh ïa kita ki kyrwoh jong ka jingdeng shadem ha ki kyrwoh jong ka ephod da u ksai uba jngum, khnang ba kata ka jingdeng shadem kan neh halor kata ka jingpanpoh, bad ba kan ym lait na ka ephod, kumba U Trai u la hukum ïa u Moses.

Kaba suh ïa kiwei pat ki jaiñphong lyngdoh

²² Ïa ka barandi kaba dei ban kup hapoh ka ephod la suh da u 'saiwul uba jngum.

²³ Ïa ka thliew ka thliew ha ka jaka ban phrung ïa ka khlieh la suh khylliap ïa ka baroh sawdong khnang ba kan ym kad.

²⁴ Ha ka rmiang jong ka la pynpur ïa ki dur soh Pomkranet da u 'saiwul uba jngum, uba sawbthuh, bad uba rong saw, bad da ka linen bani.

^25-26 Ki buh ïa ki shakuriaw ksiar hapdeng jong kita ki dur soh baroh sawdong, kumba U Trai u la hukum ïa u Moses.

²⁷ Ki suh ïa ki sopti-poh na ka bynta u Aaron bad ki khun shynrang jong u,

²⁸ bad ka jaiñspong, ki tupia, ki patlun,

²⁹ bad ki jingpanpoh da ka linen bani bad da u 'saiwul uba jngum, uba sawbthuh, bad uba rong saw, ba la pynpur itynnat bha, kumba U Trai u la hukum ïa u Moses.

³⁰ Ki shna ïa ka jingdeng da ka ksiar nylla, kaba long ka dak kaba khuid jong ka jingpynkyntang, bad ki thoh ha ka, “La Pynkyntang sha U Trai.”

³¹ Ki teh ïa ka ha khmat ka jaiñspong da u ksai uba jngum, kumba U Trai u la hukum ïa u Moses.

Kaba pyndep ïa ka jingtrei

³² Kumta keiñ la pyndep ïa ka jingtrei baroh ha ka Ïingjaiñ ka Jingdon Ryngkat U Trai. Ki Israel ki la thaw ïa kata baroh kumba U Trai u la hukum ïa u Moses.

³³ Ki wallam sha u Moses ïa kata ka Ïingjaiñ bad ïa ki jingbuh jingsat jong ka baroh, ïa ki bnoh jong ka, ïa ki jingker jong ka, ïa ki diengkhap jong ka, ïa ki rishot jong ka, bad ïa ki thliew tnaw jong ka;

³⁴ ïa ka jingsop kaba da ka snieh u langbrot kaba la wieh rong saw, ïa ka jingsop kaba da ka snieh kaba jlih, bad ïa ka jingkah pyrda;

³⁵ ïa ka Synduk ka Jutang ha kaba don ki mawlyngkniap, ïa ki jingbah bad ïa ka jingtap jong ka;

³⁶ ïa ka miej bad ki khiew ki pliang jong ka, bad ïa u kpu ba la pynkyntang sha U Blei;

³⁷ ïa u diengpynïeng sharak ksiar, ïa ki sharak jong u, ïa ki tiar jong u baroh, bad ïa ka umphniang ïa ki sharak jong u;

³⁸ ïa ka duwan ksiar, ïa ka umphniang pynsleh, ïa ka jingiwbih, ïa ka pyrda ïa ka jaka rung sha ka Ïingjaiñ;

³⁹ ïa ka duwan rnong bad ka kriah rnong jong ka, ïa ki jingbah jong ka bad ïa ki tiar ki tar jong ka; ïa ka dabor bad ïa ka jingpynshong jong ka;

⁴⁰ ïa ki pyrda jong ka phyllaw, ïa ki rishot jong ka, bad ïa ki thliew tnaw jong ka; ïa ka pyrda ïa ka khyrdop jong ka phyllaw bad ïa ki tyllai jong ka; ïa ki snar jong ka Ïingjaiñ; ïa ki tiar baroh kiba pyndonkam ha ka Ïingjaiñ;

⁴¹ bad ïa ki jaiñphong kiba ishongkun ba ki lyngdoh ki dei ban kup ha ka Jaka Kyntang — ki jaiñphong kiba kyntang na ka bynta u Aaron u lyngdoh bad ïa ki khun shynrang jong u.

⁴² Ki Israel ki trei ïa kane ka kam baroh kumba U Trai u la hukum ïa u Moses.

⁴³ U Moses u bishar bniah ïa ka kam baroh bad u ïohi ba ki la leh ïa ka kumba U Trai u la hukum. Kumta u Moses u kyrkhu ïa ki.