EKSODOS 38 - Khasi CL Bible (BSI)

Ka jingshna ïa ka duwan na ka bynta ka jingainguh thang

¹ Na ka bynta ban thang ïa ki jingainguh, u thaw ïa ka duwan da ka dieng akasia. Ka long kaba sawdong, ka don 2.2 mitar ka lynter, 2.2 mitar ka jingïar bad 1.3 mitar ka jingjrong.

² U thaw ïa ki reng ha khlieh ki saw tylli ki dong jong ka, ba kin ïadait lang kawei bad kata ka duwan. U suit ïa ka baroh da ka rnong.

³ U thaw ruh ïa ki tiar ki tar na ka bynta kata ka duwan: ki khiew, ki byrsha, ki dabor, ki proh, bad ki khiew ding. Baroh kine ki tiar ki tar la shna da ka rnong.

⁴ U shna ruh ïa ka kriah kaba da ka rnong bad u buh ïa ka hapoh ka rmiang jong kata ka duwan ba kan kot haduh pdeng jong ka.

⁵ U shna saw tylli ki kyrwoh bad u pyndait ïa ki ha ki saw tylli ki dong.

⁶ U thaw ïa ki dieng jingbah da ka dieng akasia, u suit ïa ki da ka rnong,

⁷ bad u bsuh ïa ki ha kita ki kyrwoh na baroh arliang jong kata ka duwan. Ïa ka duwan la thaw da ki lyntang bad pynlong thliew ïa ka.

Ka jingshna ïa ka dabor rnong

⁸ U shna kawei ka dabor rnong bad ka jingpynshong rnong, na ki ïitkhmih jong ki kynthei kiba shakri ha ka khyrdop ka Ïingjaiñ ka Jingdon ryngkat U Trai.

Ka jingker sawdong ïa Ka Ïingjaiñ Ka Jingdon Ryngkat U Trai

⁹ U shna ïa ka phyllaw ïa ka Ïingjaiñ ka Jingdon Ryngkat U Trai da ki pyrda kiba da ka jaiñ linen bani. Ha ka liang kaba shaphang shathie, kine ki pyrda ki long sawphew saw mitar ka lynter,

¹⁰ ba la kyrshan pynskhem ïa ki da ki arphew tylli ki rishot rnong ba la thep ha ki arphew tylli ki thliew tnaw rnong; ki bnoh jong kita ki rishot bad ki shrong jong ki, ki long da ka rupa.

¹¹ Ki pyrda jong ka phyllaw ha ka liang kaba shaphang shatei ki long kumjuh.

¹² Ha ka liang kaba shaphang sepngi, don ki pyrda kiba arphew ar mitar ka lynter, lem bad shiphew tylli ki rishot bad shiphew tylli ki thliew tnaw; ki bnoh jong kita ki rishot bad ki shrong jong ki, ki long da ka rupa.

¹³ Ha ka liang kaba shaphang mihngi, ha kaba don ka khyrdop, ka pyngkiang jong ka phyllaw ka long arphew ar mitar.

^14-15 Ha baroh arliang jong ka khyrdop don ki pyrda kiba 6.6 mitar ka lynter, lem bad lai tylli ki rishot bad lai tylli ki thliew tnaw ha kawei kawei ka liang.

¹⁶ Baroh ki pyrda sawdong kata ka phyllaw ki long da ka jaiñ linen kaba ni.

¹⁷ Ïa ki thliew tnaw ha kiba la thep ïa ki rishot la shna da ka rnong, hynrei ïa ki bnoh jong kita ki rishot bad ki shrong jong ki, bad ïa ki khlieh jong ki ruh la shna da ka rupa. Ïa ki rishot baroh sawdong kata ka phyllaw la pynïasoh da ki rod rupa.

¹⁸ Ïa ka pyrda na ka bynta ka khyrdop jong ka phyllaw la shna da ka jaiñ linen bani ba la thain da u 'saiwul uba jngum, uba sawbthuh, bad uba rong saw, bad ba la pynpur itynnat bha. Kata ka pyrda ka long khyndai mitar ka lynter, bad ar mitar ka jingjrong, kum ki pyrda jong ka phyllaw.

¹⁹ La kyrshan ïa ka da ki saw tylli ki rishot ba la thep ha ki saw tylli ki thliew tnaw rnong. Ki bnoh jong ki, ka jingsop ïa ki shata jong ki, bad ki rod jong ki, ki long da ka rupa.

²⁰ Baroh ki snar jong ka Ïingjaiñ bad jong ka phyllaw ki long da ka rnong.

Ki mar ba la pyndonkam ha Ka Ïingjaiñ Ka Jingdon Ryngkat U Trai

²¹ Kane ka long ka jingbuh jingkheiñ ïa ki mar kiba la pyndonkam na ka bynta ka Ïingjaiñ ka Jingdon ryngkat U Trai ha kaba la buh ïa ki ar tylli ki mawlyngkniap ba la thoh ïa ki Shiphew Hukum. U Moses u hukum ban ai ïa kane ka jingkheiñ, bad la pynkhreh ïa ka da ki Lebi ha ka jingïalam u Ithamar, u khun jong u Aaron u lyngdoh.

²² U Besalel, u khun jong u Uri bad u ksiew jong u Hur, na ka jait Judah, u la shna ïa kita baroh kat kiba U Trai u la hukum.

²³ La ïarap ïa u da u Oholiab u khun jong u Ahisamakh, na ka jait Dan, uba dei u nongsaiñdur, u nongpruid dak, bad u nongthain ïa ka linen kaba ni, bad ïa u 'saiwul uba jngum, uba sawbthuh, bad uba rong saw.

²⁴ Ka jingkhia jong ka ksiar baroh ïa kaba la pynkyntang sha U Trai na ka bynta ban shna ïa ka Ïingjaiñ ka khia shihajar kilo, kat kum ka jingthew ba la buh da ki bor pynïaid.

²⁵ Ka jingkhia ka rupa ba la ïoh na kito baroh ïa kiba la shim jingkheiñ ka long lai hajar sawspah laiphew kilo, kumba la thew da ka jingthew jong ki bor pynïaid.

²⁶ Kane ka jingkheiñ ka ïabiang bad kata baroh kaba la ai da kito ki briew kiba la shah ñiew khlieh kat kumba la mang ïa ki, bad kiba la thew da ka jingthew jong ki bor pynïaid. Ki rangbah kiba la shah ñiew khlieh kiba naduh arphew snem shaneng, ki don hynriew lakh lai hajar sanspah sanphew ngut.

²⁷ Lai hajar sawspah kilo na kata ka rupa la pyndonkam ha kaba shna shispah tylli ki thliew tnaw jong ka Ïingjaiñ bakyntang bad ka pyrda, laiphew saw kilo na ka bynta kawei kawei ka thliew tnaw.

²⁸ Ïa kaba sah laiphew kilo jong ka rupa, u Besalel u shna ïa ki shrong, ki bnoh jong ki rishot, bad ïa ki jingsop ïa ki shata jong ki.

²⁹ Ka rnong ba la pynkyntang sha U Trai ka long ar hajar sawspah arphew san kilo.

³⁰ Da kane u shna ïa ki thliew tnaw ïa ka khyrdop jong ka Ïingjaiñ ka Jingdon Ryngkat U Trai, ïa ka duwan rnong bad ka kriah rnong jong ka, ïa ki tiar ki tar baroh jong kata ka duwan,

³¹ ïa ki thliew tnaw jong ka phyllaw bad ïa ka khyrdop jong ka phyllaw bad ïa baroh ki snar na ka bynta ka Ïingjaiñ bad ïa ka phyllaw baroh sawdong jong ka.