EKSODOS 37 - Khasi CL Bible (BSI)

Ka jingshna ïa ka Synduk ka Jutang

¹ U Besalel u shna ïa ka Synduk ka Jutang da ka dieng akasia, kaba shispah shiphew sentimitar ka lynter, hynriewphew hynriew sentimitar ka pyngkiang, bad hynriewphew hynriew sentimitar ka jingjrong.

² U suit ïa ka da ka ksiar kaba nylla na shapoh bad shabar, bad u pynpur da ka ksiar ha ka rmiang jong ka baroh sawdong.

³ U thaw saw tylli ki kyrwoh ksiar bad u pyndait ïa ki ha ki kjat jong ka baroh saw tylli, ar ar tylli ki kyrwoh ha kawei kawei ka liang.

⁴ U thaw ïa ki dieng jingbah da ka dieng akasia, u suit ïa ki da ka ksiar,

⁵ bad nangta u bsuh ïa kita ki dieng lyngba ki kyrwoh ha baroh arliang kata ka synduk.

⁶ U thaw ïa ka jingtap da ka ksiar nylla, kaba shispah shiphew sentimitar ka lynter, bad hynriewphew sentimitar ka pyngkiang.

⁷ U thaw ruh ar tylli ki Kherub da ka ksiar tylli kaba la shoh.

⁸ Uwei ha kawei ka tduh, bad uwei ha kawei pat ka tduh jong kata ka jingtap. U pyndait lang ïa ki kumta ba ki long lang bad kata ka jingtap.

⁹ Kita ki Kherub ki ïaphai markhmat halor kata ka jingtap, bad ki thapniang ba-pyiar jong ki, ki kah ïa ka.

Ka jingshna ïa ka miej na ka bynta u kpu ba la ainguh sha U Blei

¹⁰ U shna ruh ïa ka miej da ka dieng akasia, kaba phraphew phra sentimitar ka lynter, sawphew saw sentimitar ka pyngkiang, bad hynriewphew hynriew sentimitar ka jingjrong.

¹¹ U suit ïa ka da ka ksiar kaba nylla, bad u buh u jingpynpur ksiar baroh sawdong ka rmiang jong ka.

¹² U shna ïa ka rmiang kaba hynñiewphew san milimitar baroh sawdong jong ka, bad u pynpur da ka ksiar sawdong kata ka rmiang.

¹³ U shna saw tylli ki kyrwoh ksiar bad u pyndait ïa ki ha ki saw tylli ki dong ha kiba don ki kjat jong ka.

¹⁴ U buh ïa kita ki kyrwoh hajan ka rmiang ba kin bat ïa ki dieng jingbah haba rah ïa ka.

¹⁵ U shna ïa kita ki jingbah da ka dieng akasia bad u suit ïa ki da ka ksiar.

¹⁶ U shna ïa ki khiew da ka ksiar nylla ban buh ha kata ka miej: ki pliang, ki khiew, ki khuri bad ki dabor rit ban pyndonkam ha ka jingainguh da ka waiñ.

Ka jingshna ïa u diengpynïeng Sharak

¹⁷ U shna ïa u diengpynïeng sharak uba da ka ksiar nylla. U shna ïa ka trai bad ïa ka ktang jong u diengpynïeng sharak da ka ksiar ba la shu shoh. Ki syntiew ba la oh-shrong jong u, kiba kynthup ïa ki shata bad ki sla jong ki, ki ïasoh lang kawei bad u.

¹⁸ Hynriew tylli ki tnat ki mih na baroh arliang jong u, lai tylli na kawei kawei ka liang.

¹⁹ Kawei pa kawei na kita ki hynriew tylli ki tnat ka don lai tylli ki khuri kiba kum ki syntiew soh almond lem bad ki shata bad ki syntiew ba la oh-shrong itynnat.

²⁰ Ka ktang jong uta u diengpynïeng sharak ka don saw tylli ki khuri kiba kum ka dur ki syntiew soh almond lem bad ki shata syntiew ba la oh-shrong itynnat.

²¹ Don kawei ka shata syntiew harum ki lai jur ki tnat kiba mih na u diengpynïeng sharak.

²² Ki shata, ki tnat, bad ka ktang u diengpynïeng sharak ki long kiba ïadait lang kawei da ka ksiar nylla ba la shoh.

²³ U shna hynñiew tylli ki sharak na ka bynta uta u diengpynïeng sharak, bad u thaw ruh ïa ki nap bad ki jingdiang jong u da ka ksiar nylla.

²⁴ U pyndonkam kumba laiphew san kilo ka ksiar nylla ban shna ïa uta u diengpynïeng sharak bad ïa ki jingpyndait jong u baroh.

Ka jingshna ïa ka duwan ban thang jingiwbih

²⁵ U shna ïa ka duwan da ka dieng akasia, na ka bynta ban thang jingiwbih. Ka long kaba sawdong, ka don sawphew san sentimitar ka lynter bad sawphew san sentimitar ka jingïar bad khyndaiphew sentimitar ka jingjrong. Ki reng jong ka ha ki saw tylli ki dong ki ïadait lang kawei bad ka.

²⁶ U suit ïa kaba shalor jong ka, ïa ki krung jong ka baroh sawdong, bad ïa ki reng jong ka, da ka ksiar nylla, bad u shna ruh ïa ka jingpynpur ksiar baroh sawdong jong ka.

²⁷ U thaw ar tylli ki kyrwoh ksiar bad u pyndait ïa ki harum kata ka jingpynpur ha ki ar tylli ki krung kiba ïa-pyrshah, ba kin bat ïa ki dieng jingbah da kiba yn bah ïa ka.

²⁸ U shna ïa kita ki jingbah da ka dieng akasia bad u suit ïa ki da ka ksiar.

Ka jingshna ïa ka umphniang pynsleh bad ka jingiwbih

²⁹ U shna ruh ïa ka umphniang pynsleh kaba kyntang bad ïa ka jingiwbih suhsieng, ïa kaba la khleh lang kumba khleh jingiwbih.