EKSODOS 36 - Khasi CL Bible (BSI)

¹ “U Besalel, u Oholiab, bad kiwei pat ki nongtrei ïa kiba U Trai u la ai ka jingtbit bad ka jingshemphang, kiba tip ban trei ïa ka kam baroh kaba ïadei bad ka jingtrei ïa ka Ïingjaiñ kaba kyntang, ki dei ban shna ïa kaei kaei baroh kumba U Trai u la hukum.”

Ki paidbah ki wallam shibun ki jingai sngewbha

² U Moses u la khot ïa u Besalel, ïa u Oholiab, bad ïa baroh ki rangbah kiba tbit ha kiba U Trai u la ai ïa ka jingnang bad kiba kloi mon sngewbha ban ïarap, bad u ong ïa ki ban sdang trei noh ïa kata ka kam.

³ Ki la ïohpdiang na u ïa kita ki jingai baroh ba ki Israel ki la wallam na ka bynta ban tei ïa kata ka Ïingjaiñ kaba kyntang. Hynrei ki Israel ki nang ïai wallam sha u Moses ïa ki jingainguh jong ki man ka step.

⁴ Te ki rangbah kiba tbit kiba trei ïa ka kam ki mih na la ka jingtrei,

⁵ bad ki leit ïathuh ha u Moses, “Ki paidbah ki la wallam palat ban ïa kaba ngi donkam na ka bynta ka jingtrei kaba U Trai u la hukum ïa ngi ban leh.”

⁶ Kumta u Moses u phah pynbna ha ka jaka sher dara baroh kawei ba ym donkam shuh ïano ïano ban wallam jingainguh na ka bynta ka Ïingjaiñ kaba kyntang; kumta kita ki paidbah kim shym wallam ei ei shuh.

⁷ Kaei kaba la lah wallam ka la biang ban trei pyndep ïa ka kam baroh.

Kaba shna ïa Ka Ïingjaiñ Ka Jingdon Ryngkat U Trai

⁸ Ki briew kiba tbit tam napdeng kita kiba trei ki shna ïa ka Ïingjaiñ ka Jingdon Ryngkat U Trai. Ki shna ïa ka na ki shiphew tylli ki lyngkhot jaiñ kiba da ka linen bani, ba la thain da u 'saiwul uba jngum, uba sawbthuh, bad uba rong saw, ha kiba la suh pynpur itynnat da ki dur jong ki Kherub.

⁹ Kawei kawei ka lyngkhot jaiñ ka long khat-ar mitar ka lynter bad ar mitar ka kynïan. Baroh kita ki lyngkhot jaiñ ki long katjuh ka jingheh.

¹⁰ Ki bteng lang san tylli na ki ba kin long shi sut, bad ki leh kumjuh ïa ki san tylli ki lyngkhot jaiñ kiba sah.

¹¹ Ki shna ki kyrwoh da ka jaiñ kaba jngum ha rmiang jong ka lyngkhot jaiñ kaba harud duh na kita ki jingkah baroh ar tylli.

¹² Ki buh sanphew tylli ki kyrwoh ha ka sut kaba nyngkong, bad sa sanphew tylli pat ha ka rmiang jong ka lyngkhot jaiñ kaba khatduh, ba la suh lang ha ka sut kaba ar. Kita ki kyrwoh ki ïaphai marpyrshah.

¹³ Ki shna ruh sanphew tylli ki jingpyndait kiba da ka ksiar, bad ki pynïasoh ïa kita ki jingkah ar tylli da kita ki jingpyndait ba kin long tang kawei.

¹⁴ Nangta ki shna ïa ka jingtap jong ka Ïingjaiñ na ki khatwei tylli ki lyngkhot jaiñ ba la thain da u shñiuh blang.

¹⁵ Kawei kawei ka lyngkhot jaiñ ka long khatlai mitar ka lynter bad ar mitar ka kynïan; bad baroh khatwei tylli kita ki lyngkhot jaiñ ki long katjuh ka jingheh.

¹⁶ Ki bteng lang san tylli kita ki lyngkhot jaiñ ba kin long tang kawei shi sut jingtap, bad ki leh kumjuh ïa ki hynriew tylli ki lyngkhot jaiñ kiba sah.

¹⁷ Ki buh sanphew tylli ki kyrwoh ha ka rmiang jong ka lyngkhot jaiñ kaba harud eh jong ka sut kaba nyngkong, bad sa sanphew tylli ha rmiang jong ka jaiñ ka sut kaba ar.

¹⁸ Ki thaw sanphew tylli ki jingpyndait kiba da ka rnong ban pyndait lang ïa kita ki ar tylli ki sut ba kin long kawei ka jingtap.

¹⁹ Ki shna ruh sa ar tylli ki jingtap, kawei kaba da ka snieh u langbrot kaba la wieh rong saw, bad kawei pat kaba da ka snieh kaba jlih, ban long kum ka jingtap nalor.

²⁰ Ki shna ïa ki jingker ïa ka Ïingjaiñ da ka dieng akasia.

²¹ Kawei kawei ka jingker ka long saw mitar ka jingjrong bad hynriewphew hynriew sentimitar ka pyngkiang,

²² bad ar tylli ki tnaw kiba kumjuh ba yn lah ban pyndait lang ïa ki. Baroh kita ki jingker ki don kine ki tnaw.

²³ Ki shna arphew tylli ki jingker ïa ka liang kaba shaphang shathie,

²⁴ bad sawphew tylli ki thliew tnaw rupa ha trai jong ki, ar ar tylli ki thliew tnaw hapoh kawei ka jingker ban bat ïa kita ki tnaw jong ka ar tylli.

²⁵ Ki shna ruh arphew tylli ki jingker na ka bynta ka liang kaba shaphang shatei ka Ïingjaiñ,

²⁶ lem bad sawphew tylli ki thliew tnaw rupa, ar ar tylli hapoh kawei ka jingker.

²⁷ Ïa ka liang kaba shaphang sepngi jong ka Ïingjaiñ, ki shna hynriew tylli ki jingker,

²⁸ bad sa ar tylli ki jingker ïa ki dong jong ka.

²⁹ Ïa kine ki jingker kiba ha dong la pynïasoh lang naduh trai baroh shi lynter haduh khlieh. La shna ïa kine ki jingker kiba ha dong ha kajuh ka rukom.

³⁰ Kumta don phra tylli ki jingker bad khathynriew tylli ki thliew tnaw rupa, ar ar tylli hapoh kawei kawei ka jingker.

³¹ Ki shna ruh khatsan tylli ki diengkhap da ka dieng akasia, san tylli ïa ki jingker kiba ha kawei ka liang jong ka Ïingjaiñ,

³² san tylli ïa ki jingker kiba ha kawei pat ka liang, bad san tylli ïa ki jingker kiba shadien, shaphang sepngi.

³³ U diengkhap uba hapdeng, ïa uba la pynkhap hamar shiteng kita ki jingker, u kot naduh kawei ka tduh jong ka Ïingjaiñ sha kawei pat.

³⁴ Ki suit ksiar ruh ïa kita ki jingker, bad ki pyndait ha ki ïa ki kyrwoh ksiar ban batskhem ïa kita ki diengkhap. Ïa kita ki diengkhap ruh la suit da ka ksiar.

³⁵ Ki shna ïa ka pyrda da ka linen kaba ni, ba la thain da u 'saiwul uba jngum, uba sawbthuh, bad uba rong saw, bad la suh pynpur itynnat bha ha ka da ki dur ki Kherub.

³⁶ Ki shna saw tylli ki païa da ka dieng akasia ha kiba yn wah ïa kata ka pyrda, ki suit ïa ki da ka ksiar, bad ki buh ha ki ïa ki bnoh ksiar. Nangta ki shna saw tylli ki thliew tnaw rupa kiba batskhem ïa kita ki païa.

³⁷ Ïa ka jaka rung jong ka Ïingjaiñ, ki shna ka pyrda kaba da ka linen kaba ni, ba la thain da u 'saiwul uba jngum, uba sawbthuh, bad uba rong saw, bad ha kaba la suh pynpur itynnat bha.

³⁸ Na ka bynta kane ka pyrda, ki shna san tylli ki rishot da ka dieng akasia bad ki sah ha ki san tylli ki bnoh; ki suit da ka ksiar ïa ki shata bad ki shrong jong ki, bad ki shna ruh san tylli ki thliew tnaw rnong na ka bynta kita ki rishot.