EKSODOS 35 - Khasi CL Bible (BSI)

Ki jingbuhbeit ryntih shaphang ka Sabbaton

¹ U Moses u khot lang ïa ka kynhun Israel baroh kawei, bad u la ong ha ki, “Kane ka long kaei kaba U Trai u la hukum ïa phi ban leh.

² Phi ïoh hynriew sngi ban trei jingtrei, hynrei ka sngi kaba hynñiew ka dei ban long kaba kyntang, ka sngi shongthait ba la pynkyntang sha nga U Trai. Uno uno uba trei ïa kano kano ka kam ha kata ka sngi un shah pynïap.

³ Phim bit wat tang ban sliew ding ruh ha la ïing ha ka sngi Sabbaton.”

Ki jingainguh kiba dei ïa ka Ïingjaiñ kaba Kyntang

⁴ U Moses u ong ha ki paid Israel baroh, “Kane ka long kaei kaba U Trai u la hukum:

⁵ Wallam ka jingainguh sha U Trai. Kat uba kwah ban leh ïa kata un wanrah ïa kata ka jingainguh da ka ksiar, ka rupa, bad ka rnong;

⁶ ka jaiñ linen kaba ni, u 'saiwul uba jngum, uba sawbthuh, bad uba rong saw; ka jaiñ ba la thain da u shñiuh blang;

⁷ ka snieh u langbrot kaba la wieh rong saw, ka snieh kaba jlih, bad ka dieng akasia,

⁸ ka umphniang na ka bynta ki sharak, ki musla na ka bynta ka umphniang pynsleh bad na ka bynta ka jingiwbih;

⁹ ki mawkordor Karnelian bad kiwei pat ki mawlynnai ban buh ha ka ephod bad ha ka jingdeng shadem jong u Rangbah Lyngdoh.

Ki tiar na ka bynta Ka Ïingjaiñ Ka Jingdon Ryngkat U Trai

¹⁰ “Baroh ki nongtrei kiba tbit napdeng jong phi ki dei ban ïawan shna ïa kita baroh ïa kiba U Trai u la hukum:

¹¹ ïa ka Ïingjaiñ, ka jingsop jong ka bad ka jingsop kaba shabar jong ka, ïa ki bnoh bad ïa ki jingker jong ka; ïa ki diengkhap, ki rishot, bad ki thliew tnaw jong ka;

¹² ïa ka Synduk ka Jutang, ki jingbah ïa ka, ka jingtap jong ka, bad ka jingkah kaba kah ïa ka;

¹³ ïa ka miej, ki jingbah ïa ka, bad baroh ki tiar ki tar jong ka; ïa u kpu ba la ainguh sha U Blei;

¹⁴ ïa u diengpynïeng sharak bad ki tiar kiba ïadei bad u; ïa ki sharak bad ka umphniang jong ki;

¹⁵ ïa ka duwan thang jingiwbih bad ki jingbah ïa ka; ïa ka umphniang pynsleh; ïa ka jingiwbih; ïa ka pyrda na ka bynta ka jingkhang jong ka Ïingjaiñ;

¹⁶ ïa ka duwan ka jingainguh thang bad ka kriah rnong jong ka, ki jingbah ïa ka, bad ki jingbuh jingsat jong ka; ïa ka dabor bad ka jingpynshong jong ka;

¹⁷ ïa ki pyrda na ka bynta ka phyllaw, ki rishot bad ki thliew tnaw jong ka; ïa ki pyrda na ka bynta ka jingkhang jong ka phyllaw;

¹⁸ ïa ki snar bad ki tyllai jong ka Ïingjaiñ bad ka phyllaw jong ka;

¹⁹ bad ïa ki jaiñphong kiba ishongkun ba ki Lyngdoh ki dei ban phong haba ki shakri ha ka Jaka Kyntang — ki jaiñphong kiba kyntang na ka bynta u Aaron u lyngdoh, bad na ka bynta ki khun shynrang jong u.”

Ki Israel ki wallam ïa ki jingainguh

²⁰ Ki paid Israel baroh ki ïaleit noh,

²¹ bad baroh kiba mon ban leh kumta, ki wanrah ïa ka jingainguh sha U Trai ïa kaba yn pyndonkam ha kaba shna ïa ka Ïingjaiñ ka Jingdon Ryngkat U Trai. Ki wallam kat ïa kaba donkam na ka bynta ka jingmane, bad na ka bynta ban thain ïa ki jaiñphong lyngdoh.

²² Baroh kiba kwah kumta, kynthei bad shynrang, ki ïawan rah ïa ki jingpyndait ba la oh-shrong, ki sohshkor, ki sati, ki kpieng, bad ki jingdeng ksiar kiba har rukom, bad ki pynkyntang ïa ki sha U Trai.

²³ Uwei pa uwei uba don ka jaiñ linen kaba ni; ne u 'saiwul uba jngum, uba sawbthuh ne uba rong saw; ne ka jaiñ ba la thain da u shñiuh blang; ne ka snieh u langbrot kaba la wieh rong saw; ne ka snieh kaba jlih, u wanrah ïa ki.

²⁴ Baroh kiba lah ban ai da ka rupa ne da ka rnong ki wallam kum ka jingainguh sha U Trai, bad baroh kiba don ïa ka dieng akasia ïa kaba lah ban pyndonkam, ki wallam ïa ka.

²⁵ Baroh ki kynthei kiba nang ban thir ki wallam ïa u ksai linen uba ni, bad ïa u 'saiwul uba jngum, uba sawbthuh, bad uba rong saw.

²⁶ Ki thir ruh ïa u shñiuh blang.

²⁷ Ki nongïalam ki wallam ïa ki mawkordor Karnelian bad kiwei pat ki mawlynnai ban pyndait ha ka ephod bad ha ka jingdeng shadem,

²⁸ bad ïa ki musla bad ïa ka umphniang na ka bynta ki sharak, na ka bynta ka umphniang pynsleh, bad na ka bynta ka jingiwbih.

²⁹ Ki paid Israel baroh, shynrang bad kynthei, kiba sngewkynduh ki wallam mon sngewbha ïa ka jingainguh jong ki sha U Trai na ka bynta kata ka kam kaba u la hukum ïa u Moses ban leh.

Ki nongtrei ban shna ïa Ka Ïingjaiñ Ka Jingdon Ryngkat U Trai

³⁰ U Moses u ong ha ki Israel, “U Trai u la jied ïa u Besalel, u khun jong u Uri bad u khun ksiew jong u Hur, na ka jait Judah.

³¹ U Trai u la pyndap ïa u da ka bor jong u, bad u la ai ruh ha u ïa ka jingtbit, ka jingnang, bad ka jingshemphang ban trei ïa ki jait kam ohdur kiba har rukom,

³² ban pyrkhat ïa ki dur kiba itynnat bad ban saiñ ïa ki ha ka ksiar, ha ka rupa, bad ha ka rnong;

³³ ban ot ïa ki mawlynnai bad ban pyndait ïa ki; ban oh-shrong ïa ki dieng; bad ban trei ïa kano kano ka jingthaw dur kaba pynitynnat.

³⁴ U Trai u la ai ha u bad ha u Oholiab u khun jong u Ahisamakh, na ka jait Dan, ïa ka sap ban hikai ïa ki buit treikam ha kiwei pat.

³⁵ U la ai ha ki ïa ka jingtbit ban trei ïa ki jait kam baroh ba la ju trei da ki nong-ohdur, ki nongthawdur, bad ki nongsuh nongthain ïa ka linen kaba ni; ïa u 'saiwul uba jngum, uba sawbthuh, bad uba rong saw; bad ïa kiwei pat ki jait jaiñ. Ki nang ban trei ïa ki jait kam baroh, bad ki long ruh ki nongpruid dur kiba tbit.