EKSODOS 34 - Khasi CL Bible (BSI)

Kaba thaw ar sien ïa ki mawlyngkniap

¹ U Trai u ong ha u Moses, “Shtah ar tylli ki mawlyngkniap kum kito kiba mynshuwa, bad ngan sa thoh ha ki ïa ki ktien kiba la don ha ki mawlyngkniap kiba nyngkong, ïa kiba me la pynpait.

² Khreh la shai dang step, bad wan kiew ïa u Lum Sinai ban ïashem bad nga hangta ha kliar lum.

³ Ym bit ïano ïano ban wan ryngkat bad me, bad wat ai ba yn ïohi ïano ïano ha kano kano ka bynta jong u lum. Wat shah ïa ki langbrot ne ïa ki masi ba kin ïabam phlang ha trai u lum.”

⁴ Kumta u Moses u shtah ar tylli ki mawlyngkniap kum kita kiba mynshuwa. Dang step phyrngab u leit kiew ïa u Lum Sinai, u da rah ïa kita ki mawlyngkniap, kumba U Trai u la hukum ïa u.

⁵ U Trai u wan hiar ha u lyoh bad u la ïeng bad u hangta, bad u la pynbna ïa ka kyrteng kaba khuid jong u, U Trai.

⁶ U Trai u ïaid na khmat jong u, bad u pynbna, “Ma nga, U Trai, nga long U Blei uba dap da ka jinglehsbun bad jinglehisynei, uba suki ban bitar bad uba pyn-i ïa ka jingieit bakhraw bad ïa ka jingïaineh skhem.

⁷ Nga bat ïa la ka kular na ka bynta ki bun hajar ki pateng bynriew bad nga map ïa ka jingbymman, bad ïa ka pop; hynrei, ngan pynshitom ïa ki khun ki ksiew haduh ka pateng bynriew kaba lai bad kaba saw namar ki pop jong ki kmie ki kpa jong ki.”

⁸ U Moses u pynkloi ban nguh dem haduh khyndew bad u la mane.

⁹ U la ong, “Ko Trai, lada me sngewbha shisha ïa nga, nga kyrpad ïa me ban wan ryngkat bad ngi. Kine ki briew ki long kiba mutlop, hynrei map ïa ka jingbymman bad ka pop jong ngi, bad pdiang ïa ngi kum ki briew ki jong me hi.”

La pynthymmai ïa ka Jutang

¹⁰ Te U Trai u ong ha u Moses, “Mynta nga pynlong ka jutang bad ki paid Israel. Ha khmat jong ki ngan leh ïa kiei kiei kiba khraw, ïa kiba ym pat ju leh mynno mynno ha ka pyrthei hapdeng kano kano ka jaitbynriew. Baroh ki jaitbynriew kin ïohi ïa ki kam kiba khraw kiba ma nga, U Trai nga lah ban leh, namar ngan leh ïa kaei kaei kaba khraw na ka bynta jong phi.

¹¹ Kohnguh ïa ki hukum kiba nga ai ha phi mynta ka sngi. Ngan beh noh ïa ki Amor, ki Kanaan, ki Hit, ki Peris, ki Hib, bad ki Jebus, katba phi nang tur sha khmat.

¹² Wat ïateh jutang bad ki briew jong kata ka ri sha kaba phi leit, namar kata ka lah ban long ka jingriam ka ban pynïap ïa phi.

¹³ Pynban, pynpra ïa ki duwan jong ki, pynjot ïa ki rishot kyntang jong ki, bad pom pynduh ïa ki shab jong ka Asherah, ka blei jong ki.

¹⁴ “Wat mane ïa uno uno uwei pat u blei, namar ba ma nga, U Trai, ngam lah shah ïa kino kino ki ban ïakob ïa nga.

¹⁵ Wat ïateh kano kano ka jutang bad ki briew jong kata ka ri, namar haba ki mane ïa ki blei thala jong ki, bad kñia ha ki, kin sa khot sngewbha ïa phi ban ïasoh bad ki, bad phin shah pynshoi ban bam ïa ka jingbam ba ki ai ïa ki blei jong ki.

¹⁶ Ki khun shynrang jong phi kin lah ban ïashongkurim bad ki khun kynthei jong ki, ki ban ïalam ïa ki ban ym ïaineh shuh ha nga bad ban mane ïa ki blei thala jong ki.

¹⁷ “Wat thaw bad mane ïa kano kano ka durblei ba la saiñ da kano kano ka jait nar.

¹⁸ “Rakhe ïa ka Jingkhawai Niam U Kpu Bakhlem Thiat. Kumba nga la hukum ïa phi, bam ïa u kpu bakhlem thiat hynñiew sngi lynter ha u bnai Abib, namar dei ha uta u bnai ba phi la mihnoh na ka ri Ijipt.

¹⁹ “Man la u khun ba la kha nyngkong, bad man la uba la kha nyngkong na ki jingri, ki dei ki jong nga. Hynrei phi dei ban thied biang ïa u kada,

²⁰ uba la kha nyngkong da kaba phin ai pat da u khunlangbrot ha ka jaka jong u. Lada phim thied biang ïa u, pynkheiñ ïa ka ryndang jong u. Thied biang ïa uwei pa uwei u khun nyngkong jong phi. “Uno uno ruh, um dei ban wan ha khmat jong nga khlem ka jingainguh.

²¹ “Phi ïoh hynriew sngi ban trei jingtrei, hynrei wat trei ei ei ha ka sngi kaba hynñiew, wat la ka long ha ka aïom lur ne ka aïom ot.

²² “Rakhe ïa ka Jingkhawai Niam Ka Jingot haba phi sdang ban ot ïa u soh nyngkong na u kew jong phi; rakhe ruh ïa ka Jingkhawai Niam Ki Ïingtrep ha ka synrai haba phi lum ïa la ki soh.

²³ “Lai sien shisnem, baroh ki shynrang ki dei ban wan mane ïa nga U Trai, U Blei ki Israel.

²⁴ Hadien ba nga la beh noh ïa kita ki jaitbynriew na khmat jong phi, bad pynïar ruh ïa ki pud jong phi, yn ym don mano mano u ban pyrshang ban jop ïa ka ri jong phi haba phi rakhe ïa kita ki lai tylli ki Jingkhawai Niam.

²⁵ “Wat ainguh da u kpu ba la khleh thiat haba phi kñia ïa uno uno u jingri ha nga. Wat pynsah haduh mynstep ïa ka doh kñia ba la pyndonkam ha ka Jingkhawai Niam Ka Jinglait.

²⁶ “Man la ka snem wallam ïa ki soh ba phi la lum nyngkong na ka jingot sha ka ïing U Trai U Blei jong phi. “Wat ju shet ïa u khunlangbrot ne khunblang ha ka dud ka kmie jong u.”

²⁷ U Trai u ong ha u Moses, “Thoh ïa kine ki ktien, namar dei ha ka nongrim jong kine ki ktien ba nga pynlong ka jutang bad me bad ki Israel.”

²⁸ U Moses u la sah hangta bad U Trai sawphew sngi bad sawphew miet, khlem bam khlem dih. U thoh ruh ha kita ki mawlyngkniap ïa ki ktien jong kata ka jutang — ki Shiphew Hukum keiñ.

U Moses u wan hiar na u Lum Sinai

²⁹ Mynba u Moses u wan hiar na u Lum Sinai, u da rah ïa kita ki ar tylli ki mawlyngkniap ha kiba la thoh ïa ki Shiphew Hukum, ka khmat jong u ka tyngshaiñ namar ba u la ïakren bad U Trai; hynrei um tip satia ïa kata.

³⁰ U Aaron bad uta u paidbah ki peit ïa u Moses bad ki ïohi ba ka khmat jong u ka tyngshaiñ, kumta ki ïasheptieng ban leit hajan jong u.

³¹ Hynrei u Moses u khot ïa ki, bad u Aaron lem bad ki nongïalam jong uta u paidlang ki ïaleit sha u, bad u Moses u ïakren bad ki.

³² Hadien kata, ki Israel baroh ki leit hajan jong u, bad u Moses u ai ha ki ïa kita ki hukum baroh kiba U Trai u la ai ha u Lum Sinai.

³³ Ynda u Moses u la lah ïakren bad ki, u tap ïa la ka khmat da ka jaiñtapkhmat.

³⁴ Hynrei haba u Moses u leit rung shapoh ka Ïingjaiñ ban ïakren bad U Trai, u weng noh ïa kata ka jaiñtapkhmat. Ynda u mih biang shabar u ïathuh ha ki Israel ïa kata baroh ïa kaba la hukum ïa u ban kren,

³⁵ bad ki ïohi ba ka khmat jong u ka tyngshaiñ. Kumta u buh biang ïa kata ka jaiñtapkhmat haduh ba un da leit ïakren pat bad U Trai.