EKSODOS 33 - Khasi CL Bible (BSI)

U Trai u hukum ïa ki Israel ban mihnoh na u Lum Sinai

¹ U Trai u la ong ha u Moses, “Khie ïamihnoh nangne, ma me bad ki paidbah kiba me la ïalam na ka ri Ijipt, bad leit sha kata ka ri ïa kaba nga la kular ban ai ha u Abraham, u Isaak, bad u Jakob, bad ha ki khun ki ksiew jong ki.

² Ngan phah ïa u angel jong nga ban ïalam ïa phi, bad ngan beh noh ïa ki Kanaan, ki Amor, ki Hit, ki Peris, ki Hib, bad ki Jebus.

³ Phin ïaleit sha ka ri kaba tuid da ka dud bad ka ngap. Hynrei ngan ym leit ryngkat bad phi, namar phi long ki briew kiba mutlop, ïoh ba ngan pynjot thiaw ïa phi ha lynti.”

⁴ Haba ki paidbah ki la ïohsngew ïa kane, ki la sdang ban ïambriew bad kim shym deng jingdeng shuh.

⁵ Naba U Trai u la hukum ïa u Moses ban ong ha ki, “Phi long u paidlang uba mutlop. Lada ngan leit ryngkat bad phi wat tang shikhyllipmat ruh, ngan jin da la pynjot thiaw ïa phi. Law noh mynta ïa kito ki jingdeng jong phi, bad ngan sa rai ngan leh kumno ïa phi.”

⁶ Kumta hadien ba ki la mihnoh na u Lum Sinai, ki Israel kim deng jingdeng shuh.

Ka Ïingjaiñ Ka Jingdon Ryngkat U Trai

⁷ Man ka por ba ki Israel ki sher dara, u Moses u shim ïa ka Ïingjaiñ bakyntang bad u pynïeng ïa ka kham ha pajih na kata ka jaka sher dara. La khot ïa ka, ka Ïingjaiñ ka Jingdon Ryngkat U Trai, bad uno uno uba kwah ban ïasyllok bad U Trai u ju leit sha ka.

⁸ Man ka por ba u Moses u leit shata, ki paidbah ki ïeng ha ki jingkhang jong ki ïingjaiñ jong ki bad ki ïa-peit ïa u Moses haduh ba un da rung shapoh.

⁹ Ynda u Moses u la rung shapoh jong ka, u rishot lyoh u wan hiar bad u ïeng ha ka jingkhang jong ka Ïingjaiñ, bad U Trai u kren ha u Moses na uta u lyoh.

¹⁰ Ki paidbah ki tang shu ïohi ïa uta u rishot lyoh ba u ïeng ha ka jingkhang jong ka Ïingjaiñ, ki dem khrup.

¹¹ U Trai u ïakren markhmat bad u Moses, kumba u briew u ïakren bad la u paralok. Nangta u Moses u leit phai sha ka jaka sher dara. Hynrei u samla, u Joshua u khun jong u Nun, uba long u nongïarap jong u, u shongsah ha ka Ïingjaiñ.

U Trai u kular ban don ryngkat bad la ki briew

¹² U Moses u la ong ha U Trai, “Ka long kaba shisha ba me la ong ïa nga ban ïalam ïa kine ki briew sha kata ka ri; hynrei mem pat shym ïathuh ha nga ïano men phah ryngkat bad nga. Me la ong ba me tip bha shaphang jong nga, bad me sngewbha eh ruh ïa nga.

¹³ Lada ka long kumta, nga kyrpad ïa me ba men ïathuh ha nga ïa ki jingthmu jong me, khnang ba nga lah ban ïai shakri bad pynsngewbha ïa me. To da kynmaw ruh ba me la jied ïa kane ka jaitbynriew ba kan long u paidlang jong me.”

¹⁴ U Trai u la ong, “Nga hi ngan leit ryngkat bad me, bad ngan ai ha me ka jingjop.”

¹⁵ U Moses u la jubab, “Lada me hi men ym leit ryngkat bad ngi, wat ai ba ngin mihnoh na kane ka jaka.

¹⁶ Naba da kumno ki briew kin tip ba me sngewbha ïa une u paidlang bad ïa nga lada me men ym leit ryngkat bad ngi? Ka jingdon ryngkat jong me bad ngi kan pyn-i ba ngi long kiba pher na kiwei pat ki jaitbynriew ha ka pyrthei.”

¹⁷ Te U Trai u la ong ha u Moses, “Ngan leh thik kumta kumba me la kyrpad, namar nga tip bha ïa me, bad nga sngewbha ïa me.”

¹⁸ Nangta U Moses u kyrpad, “Sngewbha shah ngan ïohi ïa ka jingshai batyngshaiñ jong ka jingdon ryngkat jong me.”

¹⁹ U Trai u la jubab, “Ngan pynïaid ha khmat jong me ïa ka jingitynnat jong nga baroh, bad hangta haba me don, ngan pynbna ïa ka kyrteng kaba kyntang jong nga. Nga long U Trai bad ngan lehsbun bad leh-isynei ïa kito kiba nga jied.

²⁰ Hynrei ngan ym shah ba men ïohi ïa ka khmat jong nga, namar uno uno uba ïohi ïa ka un ym im shuh,

²¹ hynrei don kawei ka jaka hangne hajan jong nga, ha kaba me lah ban ïeng halor u mawsiang.

²² Haba ka jingshai batyngshaiñ jong ka jingdon jong nga ka ïaid najan nangta, ngan buh ïa me ha khmat ka krem jong uta u mawsiang bad ngan tap ïa me da la ka kti haduh ba ngan da ïaid lait nangta.

²³ Nangta ngan sa weng noh ïa ka kti jong nga, bad men sa ïohi ïa ka ingdong jong nga ym ïa ka khmat jong nga.”