EKSODOS 32 - Khasi CL Bible (BSI)

U khun masi ksiar

¹ Haba ki paidbah ki la ïohi ba u Moses um pat shym wan hiar na u lum hynrei u la sah slem hangta, ki la ïalumlang sawdong ïa u Aaron, bad ki la ong ha u, “Ngim tip satia ka la jia aïu ïa une u Moses, uba la ïalam ïa ngi ban mihnoh na ka ri Ijipt; kumta to thaw ïa ngi u blei u ban ïalam ïa ngi.”

² U Aaron u ong ha ki, “Law noh ïa ki sohshkor ksiar ba ki tnga jong phi, ki khun shynrang bad ki khun kynthei jong phi ki deng, bad wallam ïa ki sha nga.”

³ Kumta ki paidbah baroh ki ïalaw noh ïa la ki sohshkor ksiar bad ki wallam ïa ki ha u Aaron.

⁴ U la shim ïa kita ki sohshkor, u thang pynum ïa ki, u theh ïa ka ksiar ha ka tiar saiñdur, bad u thaw ïa ka dur u khun masi. Ki paidbah ki ïa-ong, “Ko Israel, une u long u blei jong ngi, uba la ïalam noh ïa ngi na ka ri Ijipt!”

⁵ Nangta u Aaron u tei ïa ka duwan ha khmat jong uta u khun masi ksiar, bad u la pynbna, “Lashai kan don ka jingkhawai niam ban pyndonburom ïa U Trai.”

⁶ Dang step phyrngab ha ka sngi kaba bud, ki la wallam katto katne ki mrad ba yn thang kum ki jingkñia bad ïa kiwei pat ban ïabam kum ki jingainguh ïasyllok. Ki briew ki la ïashong ban ïakhawai, kaba la kylla long ka jingïaleh shongshit ha ka ïadih ïabam bad ïaleh awria.

⁷ Te U Trai u ong ha u Moses, “Khie, leit hiar noh shisyndon, naba ki briew jong me kiba me la ïalam na ka ri Ijipt, ki la ïaleh pop bad ki la kyntait ïa nga.

⁸ Ki la da ïaid sakma noh na kata ka lynti ha kaba nga la hukum ïa ki ban ïaid; ki la thaw ïa lade u khun masi ba la saiñ da ka ksiar bad ki la ïamane ïa u, bad ki la ai jingkñia ha u. Ki ïa-ong ba une u long u blei jong ki, uba la ïalam noh ïa ki na ka ri Ijipt!

⁹ Nga tip haduh katno kine ki briew ki long kiba mutlop.

¹⁰ Mynta, wat pyrshang ban pynsangeh ïa nga. Nga bitar ïa ki, bad ngan pynjot thiaw ïa ki. Nangta ngan pynlong ïa me bad ïa ki khun ki ksiew jong me ka jaitbynriew kaba khraw.”

¹¹ Hynrei u Moses u la ïasaid bad U Trai U Blei jong u, bad u la ong, “Ko Trai, balei ba men bitar haduh katne ïa la ki jong ki briew, kiba me la pyllait na ka ri Ijipt da ka jingkhlaiñ bakhraw bad da ka bor?

¹² Balei ba ki nong Ijipt kin ïoh ong ba me la ïalam ïa la ki briew na ka ri Ijipt, da kaba me thmu ban pynïap ïa ki ha ki lum, bad ban pynjot thiaw ïa ki? Sangeh ban bitar; pynkylla noh ïa ka jingmut jong me, bad wat ai ba kane ka jingpynjot kan ngat ha ki briew jong me.

¹³ Kynmaw ïa u Abraham, u Isaak, bad u Jakob, ki shakri jong me. Kynmaw ïa ka jingkular bakyntang kaba me la pynlong bad ki ban ai ha ki ïa ki khun ki ksiew kiba bun kat ki khlur ha sahit bneng, bad ban ai ha ki khun ki ksiew jong ki ïa kata ka ri baroh kaba me la kular ba kan long ka jingïohkynti jong ki junom.”

¹⁴ Kumta U Trai u la kylla noh ïa la ka jingmut bad um shym wallam ha ki briew jong u ïa ka jingpynjot kaba u la byrngem.

¹⁵ U Moses u la leit hiar na uta u lum, u da rah ïa kita ki ar tylli ki mawlyngkniap ha kiba la thoh ïa ki hukum ha baroh arliang.

¹⁶ U Blei hi u la thaw ïa kita ki mawlyngkniap, bad u la thoh ruh ïa kita ki hukum ha kita ki maw.

¹⁷ U Joshua u la ïohsngew ïa ki paidbah ba ki ïarisa bad u la ong ha u Moses, “Nga ïohsngew ïa ka jingsawa kumba ïaleh thma ha ka jaka sher dara.”

¹⁸ U Moses u ong, “Kata kam shym sawa kum ka jingrisa jop thma, lane kum ka jinglynñiar kiba shahjop; hynrei ka dei ka jingsawa jong ka jingïarwai.”

¹⁹ Haba u Moses u la poi hajan kata ka jaka sher dara na kaba u ïohi ïa uta u khun masi bad ïa ka jingïashad jong kita ki paidbah, u Moses u bitar lep. Hangta ha trai u lum, u lynthaw ïa kita ki mawlyngkniap kiba u rah haduh ba ki da pait.

²⁰ U shim ïa uta u khun masi uba ki la thaw, u pynum ïa u ha ka ding, bad u tylliat pynlwet jin ïa u, bad u la khleh ïa kata ha ka um. Nangta u la pynlong ïa ki paid Israel ban dih ïa ka.

²¹ U ong ruh ha u Aaron, “Aïu kine ki briew ki la leh ïa phi, haduh ba phi la pynlong ïa ki ban leh ïa ka pop kaba ishyrkhei kat kane?”

²² U Aaron u jubab, “Wat bitar ïa nga. Phi tip ba kine ki briew ki long kiba im sngi tang ban leh ïa kaba sniew.

²³ Ki ong ïa nga, ‘Ngim tip ka la jia aïu ïa une u Moses, u briew uba la ïalam ïa ngi na ka ri Ijipt; kumta, thaw noh ïa ngi u blei u ban ïalam ïa ngi.’

²⁴ Nga la ong ïa ki ba kin wallam ha nga ïa la ki jingdeng ksiar, bad kito kiba don ki law ïa ki bad ki ai ïa ki ha nga. Nga bret ïa ki ha ka ding, bad wan mih da une u khun masi.”

²⁵ U Moses u ïohi ba u Aaron u la pyllait lan ïa kita ki paidbah kat haduh ba ki la pynkhlemrain ïa lade ha khmat ki nongshun jong ki.

²⁶ Kumta u ïeng ha ka khyrdop jong ka jaka sher dara, bad u la pyrta, “Kat uba don ha ka liang jong U Trai, wan shane!” Kumta baroh kiba na ka jait Lebi ki ïalumlang ha u,

²⁷ bad u la ong ha ki, “U Trai U Blei ki Israel u hukum ïa uwei pa uwei na phi ban kieng ïa la ka waitlam, bad ïaid lyngba ïa ka jaka sher dara baroh na kane ka khyrdop sha kawei pat bad pynïap ïa uwei pa uwei u rangbah uba long u hynmen u para jong u, ïa ki paralok jong u, bad ïa ki paramarjan jong u.”

²⁸ Ki Lebi ki la kohnguh, bad ki la pynïap kumba lai hajar ngut ki rangbah ha kata ka sngi.

²⁹ U Moses u la ong ha ki Lebi, “Mynta ka sngi phi la pynkyntang ïa lade kum ki lyngdoh ha ka jingshakri ïa U Trai da kaba pynïap ïa la ki khun shynrang bad ïa ki hynmen ki para shynrang, kumta U Trai u la ai ha phi ïa ki jingkyrkhu jong u.”

³⁰ Ha ka sngi kaba bud u Moses u ong ha ki paidbah, “Phi la leh ïa ka pop kaba shyrkhei eh. Mynta ngan leit kiew biang sha U Trai; lehse nga lah ban pynïoh ïa ka jingmap ïa ka pop jong phi.”

³¹ Kumta u Moses u leit phai sha U Trai, bad u ong, “Kine ki briew ki la leh ïa ka pop kaba shyrkhei eh. Ki la thaw ïa u blei uba da ka ksiar bad ki la ïamane ïa u.

³² To map ïa ka pop jong ki; hynrei lada men ym map, nga kyrpad ba men weng noh ïa ka kyrteng jong nga na kata ka kitab ha kaba me la thoh ïa ki kyrteng jong u paidlang jong me.”

³³ U Trai u la jubab, “Dei ïa kito kiba la leh pop pyrshah ïa nga kiba ngan weng noh ïa ki kyrteng jong ki na ka kitab jong nga.

³⁴ Mynta khie leit, ïalam ïa u paidbah sha kata ka jaka kaba nga la ïathuh ïa me. Kynmaw ba u angel jong nga un ïalam ïa phi, hynrei ka por kan poi ha kaba ngan pynshitom ïa kine ki briew namar ka pop jong ki.”

³⁵ Kumta U Trai u la phah ïa ka jingpang ha kita ki briew, namar ba ki la pynlong ïa u Aaron ban thaw ïa u khun masi ksiar.