EKSODOS 30 - Khasi CL Bible (BSI)

Ka duwan na ka bynta ka jingthang jingiwbih

¹ “Thaw ïa ka duwan da ka dieng akasia, na ka bynta ban thang jingiwbih.

² Ka dei ban long kaba sawdong, sawphew san sentimitar ka jingjrong, bad sawphew san sentimitar ka pyngkiang bad khyndaiphew sentimitar ka kynjang. Ki reng jong ka ha ki saw tylli ki dong ki dei ban ïadait lang kawei bad ka.

³ Suit ïa kaba shalor jong ka, ïa ki krung jong ka baroh sawdong, bad ïa ki reng jong ka, da ka ksiar nylla, bad shna ruh ïa ka jingpynpur ksiar baroh sawdong jong ka.

⁴ Thaw ar tylli ki kyrwoh ksiar bad pyndait ïa ki harum kata ka jingpynpur ha ki ar tylli ki krung kiba marpyrshah, ba kin bat ïa ki dieng jingbah da kiba yn bah ïa ka.

⁵ Shna ïa kine ki dieng jingbah da ka dieng akasia bad suit ïa ki da ka ksiar.

⁶ Buh ïa kane ka duwan shabar ka pyrda kaba la wah ha khmat jong ka Synduk Ka Jutang. Kata ka dei ka jaka ha kaba ngan ïashem bad me.

⁷ Man ka step haba u Aaron u wan ban pynkhreh ïa ki sharak, u dei ban thang ïa ka jingiwbih halor jong ka.

⁸ Un leh kumjuh haba u wan ban pynmeh ïa kita ki sharak ha ka por janmiet. Ïa kane ka jingainguh iwbih dei ban ïai leh khlem sangeh ha ki por baroh.

⁹ Wat thang halor jong ka ïa ka jingiwbih ba lah khang, ne ïa ka jingainguh thang da ki mrad ne ïa ka jingainguh bam, bad wat theh halor jong ka ïa ka jingainguh kaba da ka waiñ.

¹⁰ Shisien shisnem, u Aaron un pyndep ïa ka jinglehniam ban pynkhuid ïa ka duwan da kaba buh ha ki reng jong ka baroh saw tylli ïa ka snam jong ka jingkñia na ka bynta ka pop. Dei ban leh ïa kane man ka snem ha ki por baroh ki ban wan. Kane ka duwan ka dei ban long kaba khuid, kaba la pynkyntang sha nga, U Trai.”

Ka khajna na ka bynta Ka Ïingjaiñ Ka Jingdon Ryngkat U Trai

¹¹ U Trai u ong ha u Moses,

¹² “Haba me shim jingkheiñ ïa ka jingdon ki paid Israel, uwei pa uwei u briew u dei ban siew ïa nga ïa ka dor na ka bynta la ka jingim, khnang ba kano kano kaba sniew kan ym wan ha u katba dang shim jingkheiñ.

¹³ Uwei pa uwei uba la shah kynthup ha ka jingkheiñbriew u dei ban siew ïa ka dor ba la buh, kat kum ka jingthew ha ka jaka kyntang, uwei pa uwei un siew ïa kane kum ka jingainguh sha nga.

¹⁴ Uwei pa uwei uba la shah ñiew ha ka jingkheiñbriew, kata, naduh uba arphew snem shaneng, u dei ban siew sha nga ïa kane ka dor ba la buh.

¹⁵ Haba ki siew ïa kane ka dor na ka bynta la ka jingim, uba riewspah un ym ai tam, bad uba duk un ym ai duna.

¹⁶ Lum ïa kane ka jingainguh na ki Israel, bad pyndonkam ïa ka ha kaba sumar ïa ka Ïingjaiñ ka Jingdon Ryngkat jong nga. Kane ka khajna ka long ka jingsiew na ka bynta la ka jingim, bad ngan kynmaw ban da ban ker ïa ki.”

Ka dabor rnong

¹⁷ U Trai u ong ha u Moses,

¹⁸ “Shna kawei ka dabor rnong, kaba ka jingpynshong jong ka ruh dei da ka rnong. Buh ïa ka hapdeng ka Ïingjaiñ bad kata ka duwan, bad pyndap um ïa ka.

¹⁹ U Aaron bad ki khun shynrang jong u ki dei ban thet ïa la ki kti bad sait ïa la ki kjat

²⁰ ha shuwa ba kin leit rung shapoh ka Ïingjaiñ, lane shuwa ba kin leit hajan ka duwan ban ai ïa ka jingainguh bam khnang ba kin ym ïap.

²¹ Ki dei ban da thet ïa la ki kti bad sait ïa la ki kjat, ba kin ym ïap. Kane ka long ka hukum kaba ma ki bad ki khun ki ksiew jong ki, ki dei ban bud junom la junom.”

Ka umphniang pynsleh

²² U Trai u ong ha u Moses,

²³ “Shim ïa ki jingiwbih musla kiba kynsai tam — hynriew kilo ka mirr ba la pynum, lai kilo ka siasia kaba sma iwbih, lai kilo ka um pai kaba iwbih,

²⁴ hynriew kilo ka kassia, (ïa kiba la thew kat kum ka jingthew jong ka jaka kyntang). Bynrap sa saw litar ka umphniang Olib,

²⁵ bad shna ïa ka umphniang pynsleh kaba kyntang ba la khleh lang kum ka jingiwbih.

²⁶ Pyndonkam ïa ka, ban pynsleh ïa ka Ïingjaiñ ka Jingdon ryngkat jong nga, ïa ka Synduk ka Jutang,

²⁷ ïa ka miej bad ki tiar ki tar jong ka baroh, ïa u diengpynïeng sharak bad ki tiar ki tar jong u baroh, ïa ka duwan ban thang jingiwbih,

²⁸ ïa ka duwan na ka bynta ka jingainguh thang lem bad ïa ki tiar ki tar jong ka baroh, bad ïa ka dabor bad ka jingpynshong jong ka.

²⁹ Pynkyntang ïa ki kumne ba kin dup long kiba khuid janai bad ïa uno uno ne kaei kaei kaba pyndei ïa ki yn pynmynsaw da ka bor ka jingkhuid jong ki.

³⁰ Nangta, pynsleh ïa u Aaron bad ïa ki khun shynrang jong u, bad pynkyntang ïa ki kum ki lyngdoh ha ka jingshakri ïa nga.

³¹ Ong ruh ha ki paid Israel, ‘Kane ka dei ka umphniang pynsleh kaba kyntang ïa kaba dei ban pyndonkam ha kaba shakri ïa nga ha ki por baroh ki ban wan.

³² Wat theh ïa ka ha ka met jong uno uno u riewpaidbah bad wat pyndonkam ïa kajuh ka rukom khleh ban shna ïa kawei pat ka jait umphniang kaba kum kane. Kane ka long kaba kyntang, bad phi dei ban kheiñ kyntang ïa ka.

³³ Uno uno uba khleh ïa kaba kum kane, ne uba pyndonkam ïa ka wat tang khyndiat ruh ha uno uno u briew u bym dei u lyngdoh, yn ym kheiñ shuh ïa u kum uwei na ki briew jong nga!’ ”

Ka jingiwbih

³⁴ U Trai u ong ha u Moses, “Shim mar katjuh na kine ki jingiwbih suhsieng — ka stakte, ka onikha, ka galbanum, bad ka jingiwbih basngur.

³⁵ Pyndonkam ïa ki ban shna jingiwbih, khleh ïa ki kum ka jingpyniwbih. Ber khyndiat ka mluh ban pynlong ïa ka kaba khuid bad kaba kyntang.

³⁶ Tylliat khyndiat ïa ka haduh ba kan da lwet ni bha, rah ïa ka shapoh ka Ïingjaiñ ka Jingdon Ryngkat jong nga bad ber ïa ka ha khmat ka Synduk ka Jutang. Kheiñ ïa kane ka jingiwbih kum kaba da kyntang janai.

³⁷ Wat pyndonkam ïa kajuh ka rukom khleh ban shna kum kane na ka bynta ïa lade. Ñiew ïa ka ba ka long kaba kyntang bad kaba la pynkyntang sha nga.

³⁸ Ïa uno uno uba shna ïa kaba kum kane ka jingiwbih yn ym kheiñ shuh kum uwei na ki briew jong nga.”