EKSODOS 29 - Khasi CL Bible (BSI)

Ki jingbthah na ka bynta ka jingpynkyntang lyngdoh ïa u Aaron bad ïa ki khun shynrang jong u

¹ “Kane ka long kaba me dei ban leh ïa u Aaron bad ki khun shynrang jong u ban pynkyntang ïa ki kum ki lyngdoh ki ban shakri ïa nga. Shim uwei u masi lyngraw bad ar tylli ki langbrot shynrang ki bym don jingduna.

² Shim ïa u kew ba la tylliat ni bha, u bym pat khleh thiat, bad shet katto katne ki kpu ba la khleh bad ka umphniang Olib, bad katto katne khlem umphniang bad katto katne ki kpu lyngkniap ba la shu kyllan da ka umphniang.

³ Buh ïa ki ha ka shang, bad wanrah ïa ki sha nga ha ka por ba me kñia ïa uta u masi lyngraw bad ïa ki ar tylli ki langbrot shynrang.

⁴ “Ïalam ïa u Aaron bad ki khun shynrang jong u sha ka jingkhang jong ka Ïingjaiñ ka Jingdon Ryngkat jong nga bad ong ba kin sum kat kum ka jinglehniam.

⁵ Nangta pynriam ïa u Aaron da ki jaiñphong lyngdoh — ka sopti-poh, ka barandi kaba hapoh ka ephod, ka ephod, ka jingdeng shadem bad u panpoh.

⁶ Pynphong ïa ka jaiñspong ha ka khlieh jong u bad teh halor jong ka ïa ka dak bakyntang jong ka jingpynkyntang ba la thoh ‘La Pynkyntang sha U Trai.’

⁷ Nangta, shim ïa ka umphniang pynsleh, theh ïa ka ha ka khlieh jong u, bad pynsleh ïa u.

⁸ “Wan ïalam ïa ki khun shynrang jong u Aaron ban pynphong sopti ïa ki.

⁹ Buh ïa ki panpoh ha ki syngkai jong ki, bad teh ïa ki tupia ha ki khlieh jong ki. Ha kane ka rukom men pynkyntang ïa u Aaron bad ïa ki khun shynrang jong u. Ma ki bad ki khun ki ksiew jong ki kin shakri ïa nga junom kum ki lyngdoh.

¹⁰ “Wallam ïa uta u masi lyngraw ha khmat ka Ïingjaiñ ka Jingdon Ryngkat jong nga, bad ong ïa u Aaron bad ïa ki khun shynrang jong u ba kin buh ïa la ki kti ha ka khlieh jong u.

¹¹ Pynïap ïa uta u masi lyngraw hangta ha ka jingdon ryngkat jong nga ha ka jaka rung jong ka Ïingjaiñ.

¹² Shim khyndiat ka snam jong uta u masi lyngraw, bad tah ïa ka da ka shynriah'ti jong me ha ki reng jong kata ka duwan. Nangta, theh ïa ka snam kaba sah ha trai jong kata ka duwan.

¹³ Nangta pat, weng noh ïa ka khleiñ baroh kaba sop ïa ki snier, ïa u dohnud, bad ïa ki khyllai baroh ar lem bad ka khleiñ kaba sop ïa ki, bad thang ïa ki ha kata ka duwan kum ka jingainguh ïa nga.

¹⁴ Hynrei ïa ka doh jong uta u masi lyngraw, ïa ka snieh jong u, bad ïa ki 'nierlang jong u, dei ban thang ïa ki shabar ka jaka shong dara. Kane ka long ka jingainguh ban sait ïa ki pop jong ki lyngdoh.

¹⁵ “Shim uwei na kita ki langbrot shynrang, bad ong ïa u Aaron bad ïa ki khun shynrang jong u ban buh ïa la ki kti ha ka khlieh jong u.

¹⁶ Pynïap ïa u, shim ïa ka snam jong u, bad synreit ïa ka sawdong kata ka duwan.

¹⁷ Ot lyngkhot lyngkhot ïa uta u langbrot, sait ïa ki snier bad ki kjat-dien jong u, nangta sa buh lang ïa ki halor kita ki lyngkhot doh bad ka khlieh jong u.

¹⁸ Thang ïa uta u langbrot baroh uwei ha kata ka duwan kum ka jingainguh bam. Ka jingiwbih jong kane ka jingainguh ka pynsngewbha ïa nga.

¹⁹ “Shim ïa uta uwei pat u langbrot — u langbrot ban pyndonkam na ka bynta ka jingpynkyntang — bad ong ïa u Aaron bad ïa ki khun shynrang jong u ban buh ïa la ki kti ha ka khlieh jong u.

²⁰ Pynïap ïa u, shim khyndiat ka snam jong u, bad tah ïa ka ha ki shkor kamon jong u Aaron bad ki khun shynrang jong u, ha ki 'tikmie kamon jong ki, bad ha ki 'jatkmie kamon jong ki. Synreit ïa ka snam kaba sah, sawdong kata ka duwan.

²¹ Shim khyndiat ka snam kaba don ha kata ka duwan bad khyndiat ka umphniang pynsleh, bad synreit ha u Aaron bad ha ki jaiñkup jong u, bad ha ki khun shynrang jong u bad ha ki jaiñkup jong ki. Ma ki bad ki jaiñkup jong ki kin long kiba la pynkyntang khuid sha nga.

²² “Ot noh ïa ka khleiñ jong uta u langbrot, ïa u tdong jong u, ïa ka khleiñ kaba sop ïa ki 'nierlang, ïa ka sbiar kaba haneng u dohnud, ïa ki khyllai baroh ar lem bad ïa ka khleiñ kaba sop ïa ki, bad ïa ka lbong kamon.

²³ Shim ruh uwei u kpu, uwei u kpu ba la khleh umphniang, bad uwei u kpu lyngkniap na kata ka shang kpu ba la ainguh sha nga.

²⁴ Buh ïa kine baroh ha ki kti u Aaron bad ha ki kti ki khun shynrang jong u, bad ong ba kin pynkyntang ïa ki kum ka jingainguh kyrpang sha nga.

²⁵ Nangta, shim ïa ki na ki kti jong ki bad thang ïa ki ha kata ka duwan, halor kata ka jingainguh thang, kum ka jingainguh bam sha nga. Ka jingiwbih kaba suhsieng na kane ka jingainguh ka pynsngewbha ïa nga.

²⁶ “Shim ïa ka shadem jong uta u langbrot bad pynkyntang ïa ka kum ka jingainguh bakyrpang sha nga. Kane ka bynta jong u mrad ba la kñia ka dei ka jong me.

²⁷ “Haba la pynsleh ïa u lyngdoh, ïa ka shadem bad ka lbong jong uta u langbrot ïa uba la pyndonkam na ka bynta ka jingpynsleh dei ban pynkyntang sha nga kum ka jingai sngewbha bakyrpang bad kaba la buh kyrpang na ka bynta ki lyngdoh.

²⁸ Kane ka long ka rai jong nga ka ban ym kylla ba haba ki briew jong nga ki pynlong ïa ka jingkñia ïasyllok, ka shadem bad ka lbong jong u mrad ki long ka bynta jong ki lyngdoh. Kane ka long ka jingai sngewbha jong ki briew sha nga, U Trai.

²⁹ “Ynda la ïap u Aaron, ïa ki jaiñphong lyngdoh jong u dei ban aiti ha ki khun shynrang jong u ba kin phong ha ka por ba pynkyntang ïa ki.

³⁰ U khun jong u Aaron u ban mih pli ïa u kum u lyngdoh bad uba leit sha ka Ïingjaiñ ka Jingdon Ryngkat jong nga ban shakri ha ka Jaka kaba Kyntang u dei ban phong ïa kine ki jaiñ hynñiew sngi lynter.

³¹ “Shim ïa ka doh jong uta u langbrot ba la pyndonkam ha ka por ba pynsleh ïa u Aaron bad ki khun shynrang jong u, bad phon ïa ka ha kata ka jaka kaba kyntang.

³² Ha ka jingkhang jong ka Ïingjaiñ ka Jingdon Ryngkat jong nga ki dei ban bam ïa ka lem bad u kpu uba dang sah ha kata ka shang.

³³ Kin bam tang ïa kata ïa kaba la pyndonkam ha ka jinglehniam ka jingmap ha ka por ka jingpynkyntang ïa ki. Tang ki lyngdoh ki lah ban bam ïa kane ka jingbam, namar ka long kaba kyntang.

³⁴ Lada don kaba tam na ka doh ne na u kpu kiba ym shym la lah bam lut haduh mynstep, dei ban thang noh ïa ki. Ym dei ban bam ïa ka, naba ka long kaba kyntang.

³⁵ “Leh ïa ki jinglehniam ka jingpynkyntang ïa u Aaron bad ki khun shynrang jong u hynñiew sngi lynter kumba nga la hukum ïa me.

³⁶ Man la ka sngi me dei ban kñia uwei u masi lyngraw kum ka jingkñia, khnang ba yn map ïa ka pop. Kane kan pynkhuid ruh ïa kata ka duwan. Nangta kyllan ïa ka da ka umphniang Olib ban pynkyntang ïa ka.

³⁷ Hynñiew sngi lynter men leh ïa kane man la ka sngi. Te ka duwan kan sa long kaba khuid phar; bad ka bor jong ka jingkhuid jong ka kan pynmynsaw kat ïa uba ktah ïa ka.

Ki jingainguh kiba man la ka sngi

³⁸ “Man la ka sngi ha ki por ban wan, kñia ha kata ka duwan ar tylli ki khunlangbrot kiba shisnem.

³⁹ Kñia uwei u khunlangbrot mynstep bad uwei pat ynda janmiet.

⁴⁰ Ryngkat bad uta u khunlangbrot uba nyngkong, ainguh kumba shi kilo u kew ba la tylliat ni bha ba la khleh lang bad shi litar ka umphniang Olib kaba bha. Theh ruh shi litar ka waiñ kum ka jingainguh.

⁴¹ Kñia ïa u khunlangbrot uba ar ynda janmiet, bad ainguh lang bad u katjuh u kew ba la tylliat ni bha, ka umphniang Olib, bad ka waiñ kumba leh mynstep. Kane ka long ka jingainguh bam sha nga U Trai, bad ka jingiwbih jong ka, ka pynsngewbha ïa nga.

⁴² Ha ki por baroh ki ban wan, dei ban ai ïa kane ka jingainguh thang ha khmat jong nga ha ka jingkhang jong ka Ïingjaiñ ka Jingdon Ryngkat jong nga. Kata ka long ka jaka ha kaba ngan ïashem bad ki briew jong nga bad ngan ïakren bad me.

⁴³ Hangta keiñ ngan ïakynduh bad ki Israel, bad ka jingshai baphyrnai jong ka jingdon ryngkat jong nga kan pynlong ïa kata ka jaka kaba khuid.

⁴⁴ Ngan pynlong khuid ïa ka Ïingjaiñ bad ïa kata ka duwan, bad ngan pynkyrpang ïa u Aaron bad ïa ki khun shynrang jong u ba kin shakri ïa nga kum ki lyngdoh.

⁴⁵ Te ngan shongduh hapdeng ki Israel bad ngan long U Blei jong ki.

⁴⁶ Kin sa tip ruh ba nga long U Trai U Blei jong ki, uba la ïalam noh ïa ki na ka ri Ijipt khnang ba ngan ïoh shongduh hapdeng jong ki. Nga long U Trai U Blei jong ki.