EKSODOS 28 - Khasi CL Bible (BSI)

Ki jaiñphong na ka bynta ki lyngdoh

¹ “Khot ïa u Aaron u hynmen jong me bad ïa ki khun shynrang jong u, u Nadab, u Abihu, u Eleasar, bad u Ithamar. Pynkyrpang ïa ki na ki Israel khnang ba kin shakri ïa nga kum ki lyngdoh.

² Suh ki jaiñphong lyngdoh ïa u Aaron u hynmen jong me khnang ba un ishongkun shongkhia bad idonburom.

³ Khot ïa ki nongsuhjaiñ batbit kiba nga la ai ha ki ka sap bad ong ïa ki ba kin suh ïa ki jaiñkup u Aaron khnang ba yn ïoh pynkyntang ïa u kum u lyngdoh ban shakri ïa nga.

⁴ Ong ïa ki ba kin suh ïa kine ki jaiñphong lyngdoh: ka jingdeng shadem, ka ephod, ka barandi, ka sopti ba la suh pynpur itynnat, ka jaiñspong, bad ka jaiñ panpoh. Kin suh ïa kine ki jaiñphong lyngdoh ïa u Aaron bad ki khun shynrang jong u khnang ba kin shakri ïa nga kum ki lyngdoh.

⁵ Ki nongsuhjaiñ batbit ki dei ban pyndonkam da u 'saiwul uba jngum, uba sawbthuh, bad uba rong saw, u 'sai ksiar, bad da ka jaiñ linen bani.

⁶ “Kin suh ïa ka ephod da u 'saiwul uba jngum, uba sawbthuh, bad uba rong saw, u 'sai ksiar, bad da ka jaiñ linen bani.

⁷ Ïa ki ar tylli ki tyllai tawah tyrpeng, da kiba lah ban pynskhem ïa ka, dei ban pyndait na ki rmiang jong ka baroh arliang.

⁸ Ïa u panpoh ba la thain itynnat bha da kijuh ki tiar dei ban pyndait ha ka ephod khnang ba kan ïalong kawei ka lyngkhot bad ka.

⁹ Shim ar tylli ki mawkordor Karnelian, bad thoh ha ki ïa ki kyrteng jong ki khat-ar ngut ki khun shynrang jong u Jakob,

¹⁰ katba kum ka jinglong hynmen para jong ki, hynriew na ki kyrteng jong ki ha uwei u mawkordor bad hynriew ha uwei pat u mawkordor.

¹¹ Wad ïa u bania uba tbit ba un ohdur ha kita ki ar tylli ki mawkordor ïa ki kyrteng jong ki khun shynrang jong u Jakob bad pynshong ïa ki ha ki jingoh-shrong kiba da ka ksiar.

¹² Buh ïa ki ha ki tyllai tawah tyrpeng jong ka ephod ba kin ïeng na ka bynta ki khat-ar jait Israel. Ha kane ka rukom u Aaron un kit ïa ki kyrteng jong ki ha la ka tyrpeng khnang ba ma nga, U Trai, ngan ïai kynmaw ïa ki briew jong nga.

¹³ Thaw ruh ar tylli ïa ki shrong ksiar,

¹⁴ bad ar tylli ki kynjri kiba da ka ksiar nylla kiba la jyrthiaw kum ki tyllai bad pyndait ïa ki ha kita ki shrong.

Ka jingdeng shadem

¹⁵ “Shna ïa ka jingdeng shadem na ka bynta u Rangbah Lyngdoh ban pyndonkam ha kaba sngewthuh ïa ka mon jong U Blei. Shna ïa ka da kijuh ki tiar kiba la pyndonkam ha kaba suh ïa ka ephod, bad da kijuh ki jingsuh pynpur itynnat.

¹⁶ Ka dei ban long kaba sawdong, bad kaba la khylliap ar syrtap, kaba jrong arphew ar sentimitar bad kaba ïar arphew ar sentimitar.

¹⁷ Pyndait ha ka, saw kyrdon ki mawkordor, u Rubi, u Topas, bad u Garnet ha ka kyrdon kaba nyngkong;

¹⁸ u Emerald, u Sapphir, bad u Diamond ha ka kyrdon kaba ar;

¹⁹ u Turkwois, u Agate, bad u Amethyst ha ka kyrdon kaba lai;

²⁰ bad u Beryl, u Karnelian, bad u Jasper ha ka kyrdon kaba saw. Pyndait ïa ki baroh ha ki jingoh-shrong kiba da ka ksiar.

²¹ Ha uwei uwei na ki, thoh ïa ka kyrteng jong uwei na ki khun shynrang jong u Jakob, ba kin ïeng na ka bynta ki khat-ar jait Israel.

²² Thaw ïa ki kynjri kiba da ka ksiar nylla ba la jyrthiaw kum u tyllai na ka bynta kata ka jingdeng shadem.

²³ Thaw ar tylli ki kyrwoh ksiar bad pyndait ïa ki ha ki ar tylli ki dong kiba shaneng jong ka jingdeng shadem,

²⁴ bad teh ïa kita ki kynjri ksiar ha kita ki kyrwoh.

²⁵ Teh ïa kiwei pat ki tduh jong kita ki kynjri ha ki ar tylli ki shrong, bad ha kane ka rukom pynsnoh ïa ki sha khmat ha ki tyllai tawah tyrpeng jong ka ephod.

²⁶ Nangta, thaw ar tylli ki kyrwoh ksiar bad buh ïa ki ha ka bynta ba sha trai jong ka jingdeng shadem ha ka tduh bashapoh hajan ka ephod.

²⁷ Thaw shuh sa ar tylli ki kyrwoh ksiar bad pyndait ïa ki ha ka bynta kaba sha trai jong ka bynta kaba ha khmat jong ki ar tylli ki tyllai tawah tyrpeng hajan ka jaka ba la suh pyndait bad haneng jong u panpoh ba la thain itynnat bha.

²⁸ Teh ïa kita ki kyrwoh jong ka jingdeng shadem bad ki kyrwoh jong ka ephod da u ksai uba jngum, khnang ba ka jingdeng shadem kan shong halor u panpoh bad ba kan ym lait na ka ephod.

²⁹ “Haba u Aaron u rung sha ka Jaka Kyntang, un phong ïa kane ka jingdeng shadem ha kaba la thoh ïa ki kyrteng jong ki khat-ar jait Israel, khnang ba ma nga, U Trai, ngan ïai kynmaw ïa la ki briew.

³⁰ Buh ïa u Urim bad u Thummim hapoh ka jingdeng shadem, khnang ba u Aaron un rah ïa ki haba u wan ha khmat ka jingdon kaba kyntang jong nga. Kum ha kata ka por, u dei ban phong ïa kane ka jingdeng shadem, khnang ba u lah ban tip bad sngewthuh ïa ka mon jong nga na ka bynta ki Israel.

Kiwei kiwei ki jaiñphong lyngdoh

³¹ “Ka barandi kaba dei ban kup hapoh ka ephod, ka dei ban long kaba da u 'saiwul uba jngum.

³² Ka dei ban don ka thliew ha ka jaka ban phrung ïa ka khlieh, bad suh khylliap ïa ka baroh sawdong kumba leh ïa ka jymphong, khnang ba kan ym kad.

^33-34 Ha ka rmiang ba sha trai jong ka, buh ïa ki dur soh Pomkranet ba la shna da u 'saiwul uba jngum, uba sawbthuh, bad uba rong saw, bad hapdeng hapdeng suh ïa ki shakuriaw ksiar.

³⁵ U Aaron u dei ban phong ïa kane ka barandi haba u shakri kum u lyngdoh. Haba u wan ha khmat jong nga ha ka Jaka kaba Kyntang, lane haba u mih nangta, yn ïohsngew ïa ka jingriew ki shakuriaw, bad un ym shah pynïap.

³⁶ “Thaw ruh ïa ka jingdeng da ka ksiar nylla bad thoh ha ka, ‘La Pynkyntang sha U Trai.’

³⁷ Teh ïa ka ha khmat ka jaiñspong da u ksai bajngum.

³⁸ U Aaron u dei ban teh ïa u ha ka shyllangmat jong u, khnang ba ma nga, U Trai, ngan pdiang ïa ki jingainguh ba ki Israel ki pynkyntang sha nga, wat la ki briew ki bakla haba ki ai ïa ki.

³⁹ “Suh ïa ka sopti u Aaron da ka linen bani, bad ïa ka jaiñspong ruh da ka linen bani; bad ïa u panpoh ruh uba la suh pynpur itynnat.

⁴⁰ “Suh ki sopti, ki panpoh, bad ki tupia na ka bynta ki khun shynrang jong u Aaron ba kin ishongkun shongkhia bad itynnat.

⁴¹ Pynphong ïa kine ki jaiñ ha u Aaron u hynmen jong me bad ha ki khun shynrang jong u. Nangta pynkupbor ïa ki bad pynkyntang da kaba pynsleh ïa ki da ka umphniang Olib, khnang ba ki lah ban shakri ïa nga kum ki lyngdoh.

⁴² Suh ki patlun lyngkot kiba da ka jaiñ linen, kiba kot naduh syngkai haduh lbong, khnang ba kin ym thad burom ïa lade.

⁴³ U Aaron bad ki khun shynrang jong u ki dei ban phong ïa ki man ka por ba ki leit rung shapoh ka Ïingjaiñ ka Jingdon Ryngkat jong nga ne haba ki leit sha jan ka duwan ban shakri kum ki lyngdoh ha ka Jaka kaba Kyntang, khnang ba kin ym shah pynïap ba ki thad burom ïa lade. Kane ka long ka aiñ kaba neh shi rta ïa u Aaron bad ki khun ki ksiew jong u.