EKSODOS 27 - Khasi CL Bible (BSI)

Ka duwan

¹ “Thaw ïa ka duwan da ka dieng akasia. Ka dei ban long kaba sawdong, 2.2 mitar ka lynter bad 2.2 mitar ka pyngkiang bad 1.3 mitar ka jingjrong.

² Thaw ki reng ha khlieh ki saw dong jong ka. Kita ki reng ki dei ban ïadait lang kawei bad kata ka duwan, bad dei ban suit ïa ka da ka rnong.

³ Thaw ïa ki khiew ban pdiang ïa u dpei khleiñ jong ka; nangta shna ruh ïa ki siang, ki dabor, ki proh, bad ki pliang ding. Ïa kine ki tiar baroh dei ban thaw da ka rnong.

⁴ Thaw ïa ka kriah kaba da ka rnong, bad ha ki saw dong jong ka, thaw saw tylli ki tnaw rnong.

⁵ Buh ïa kata ka kriah rnong hapoh ka rmiang jong kata ka duwan ba kan kot haduh pdeng jong ka.

⁶ Thaw ruh ïa ki dieng jingbah ïa kata ka duwan, kiba da ka dieng akasia, bad suit ïa ki da ka rnong.

⁷ Bsuh ïa ki ha kita ki kyrwoh na baroh arliang jong kata ka duwan haba bah ïa ka.

⁸ Thaw ïa kata ka duwan da ki lyntang, bad pynlong thliew ïa ka kat kum ka dur ba nga la pyn-i ïa me ha u lum.

Ka jingker sawdong ïa Ka Ïingjaiñ Ka Jingdon Ryngkat U Trai

⁹ “Thaw ka phyllaw ïa ka Ïingjaiñ ka Jingdon Ryngkat jong nga da ki jaiñ linen bani. Ha ka liang kaba shathie, ki pyrda ki dei ban jrong sawphew saw mitar,

¹⁰ ïa kiba la kyrshan pynskhem ïa ki da ki arphew tylli ki rishot rnong ba la thep ha ki arphew tylli ki thliew tnaw rnong; lem bad ki bnoh bad ki rod ba la shna da ka rupa.

¹¹ Leh kumjuh ïa ki pyrda jong ka phyllaw ha ka liang kaba shaphang shatei.

¹² Ha ka liang kaba shaphang sepngi, ki pyrda ki dei ban jrong arphew ar mitar lem bad shiphew tylli ki rishot bad shiphew tylli ki thliew tnaw.

¹³ Shaphang mihngi haba don ka jaka rung, ka phyllaw kan long ruh arphew ar mitar.

^14-15 Ha baroh arliang jong ka jaka rung dei ban don ki pyrda kiba 6.6 mitar lem bad lai tylli ki rishot bad lai tylli ki thliew tnaw ha kawei kawei ka liang.

¹⁶ Na ka bynta ka jaka rung, dei ban don ka pyrda kaba khyndai mitar ka lynter, ïa kaba la shna da ka jaiñ linen kaba ni, ba la thain da u 'saiwul uba jngum, uba sawbthuh, bad uba rong saw, bad ha kaba la pynitynnat da ki jingsuh pynpur. Kyrshan skhem ïa ka da ki saw tylli ki rishot ba la thep ha ki saw tylli ki thliew tnaw.

¹⁷ Ïa ki rishot baroh sawdong kata ka phyllaw, dei ban pynïasoh lang da ki rod rupa, bad ïa ki bnoh jong ki dei ban thaw da ka rupa bad ïa ki thliew tnaw jong ki pat da ka rnong.

¹⁸ Ka phyllaw ka dei ban long sawphew saw mitar ka lynter, arphew ar mitar ka pyngkiang, bad 2.2 mitar ka jingjrong. Ki pyrda ki dei ban long kiba da ka jaiñ linen bani, bad ki thliew tnaw da ka rnong.

¹⁹ Ki khiew ki pliang baroh ba la pyndonkam ha ka Ïingjaiñ bad ïa ki snar jong ka, bad jong ka phyllaw, ki dei ban long kiba da ka rnong.

Ka jingsumar ïa ka sharak

²⁰ “Hukum ïa ki paid Israel ba kin wanrah ha me ïa ka umphniang Olib kaba bha tam ban thang ïa ka sharak man ka janmiet.

²¹ U Aaron bad ki khun shynrang jong u ki dei ban pynïeng ïa ka sharak hapoh ka Ïingjaiñ ka Jingdon Ryngkat jong nga shabar jong ka pyrda kaba don ha khmat jong ka Synduk ka Jutang. Hangta ha ka jingdon ryngkat jong nga dei ban pynmeh ïa ka naduh janmiet haduh mynstep. Ïa kane ka hukum dei ban sumar junom da ki Israel bad ki khun ki ksiew jong ki.