EKSODOS 26 - Khasi CL Bible (BSI)

Ka Ïingjaiñ Ka jingdon ryngkat U Trai

¹ “Thaw ïa kaba shapoh jong ka Ïingjaiñ bakyntang, ka Ïingjaiñ jong ka Jingdon Ryngkat jong nga na ki shiphew tylli ki lyngkhot jaiñ kiba da ka linen kaba ni, ba la thain da u 'saiwul uba jngum, uba sawbthuh, bad uba rong saw. Suh pynpur itynnat ha ki ïa ka dur ki kherub.

² Kawei kawei ka lyngkhot jaiñ kan long khat-ar mitar ka lynter bad ar mitar ka kynïan. Baroh kita ki lyngkhot jaiñ ki dei ban long katjuh ka jingheh.

³ Bteng lang san tylli na ki ba kin long kawei ka jingkah, bad leh kumjuh ïa ki san tylli ki lyngkhot jaiñ kiba sah.

⁴ Thaw ïa ki kyrwoh da ka jaiñ kaba jngum ha ka rmiang jong ka lyngkhot jaiñ kaba harud duh na kita ki jingkah baroh ar tylli.

⁵ Buh sanphew tylli ki kyrwoh ha ka jingkah kaba nyngkong, bad sa sanphew tylli pat ha ka rmiang jong ka lyngkhot jaiñ kaba khatduh ba la suh lang ha ka jingkah kaba ar. Pynphai marpyrshah ïa ki.

⁶ Thaw ruh sanphew tylli ki jingpyndait kiba da ka ksiar, bad pynïasoh ïa ki jingkah da kita ki jingpyndait ba kin long tang kawei.

⁷ “Thaw ïa ka jingtap na ka bynta ka Ïingjaiñ na ki khatwei tylli ki lyngkhot jaiñ ba la thain da u shñiuh blang.

⁸ Kawei kawei ka lyngkhot jaiñ ka dei ban long khatlai mitar ka lynter bad ar mitar ka kynïan. Baroh khatwei tylli kita ki lyngkhot jaiñ ki dei ban long katjuh ka jingheh.

⁹ Bteng lang san tylli kita ki lyngkhot jaiñ ba kin long kawei ka jaiñ jingtap, bad leh kumjuh ïa ki hynriew tylli ki lyngkhot jaiñ kiba sah ba kin long kawei pat ka jaiñ jingtap. Khylliap ar syrtap ïa ka lyngkhot jaiñ kaba hynriew kaba ha khmat ka Ïingjaiñ.

¹⁰ Buh sanphew tylli ki kyrwoh ha rmiang jong ka lyngkhot jaiñ kaba harud eh jong kata ka jaiñ jingtap kaba nyngkong, bad sa sanphew tylli ha rmiang jong ka jaiñ jingtap kaba ar.

¹¹ Thaw ruh sanphew tylli ki jingpyndait kiba da ka rnong, pyndait ïa ki ha kita ki kyrwoh, bad suh lang ïa kita ki jaiñ jingtap ar tylli ba kin long kawei ka jingtap.

¹² Wah ïa kata ka lyngkhot jaiñ kaba tam shiteng shadien ka Ïingjaiñ.

¹³ Ïa ka sanphew sentimitar kaba tam na ka lynter jong kata ka jingtap ha baroh arliang dei ban wah ha ki krung jong ka Ïingjaiñ ba kan tap ïa ka.

¹⁴ “Thaw sa ar tylli ki jingkah, kawei kaba da ka snieh jong ki langbrot shynrang ba la wieh rong saw, bad kawei pat kaba da ka snieh bha, ban long ka jingtap na shabar.

¹⁵ “Thaw ïa ki jingker kiba pynïeng ïa ka Ïingjaiñ da ka dieng akasia.

¹⁶ Kawei kawei ka jingker kan long saw mitar ka lynter bad hynriewphew hynriew sentimitar ka pyngkiang,

¹⁷ bad ar tylli ki tnaw kiba ïabiang khnang ba yn lah ban pyndait lang ïa kita ki jingker. Baroh kita ki jingker ki dei ban don ïa kine ki tnaw.

¹⁸ Thaw arphew tylli ki jingker ïa ka liang kaba shaphang shathie,

¹⁹ bad sawphew tylli ki thliew tnaw rupa hapoh jong ki, ar ar tylli ki thliew tnaw hapoh kawei ka jingker ban bat ïa kita ki tnaw jong ka ar tylli.

²⁰ Thaw ruh arphew tylli ki jingker na ka bynta ka liang kaba shaphang shatei ka Ïingjaiñ,

²¹ lem bad sawphew tylli ki thliew tnaw rupa, ar ar tylli hapoh kawei ka jingker.

²² Na ka bynta kaba shadien jong ka Ïingjaiñ ha ka phang sepngi, shna hynriew tylli ki jingker

²³ bad sa ar tylli ki jingker ïa ki dong jong ka.

²⁴ Ïa kine ki jingker kiba ha ki dong dei ban pynïasoh lang naduh trai, baroh shi lynter haduh khlieh. Dei ban thaw ïa kine ki jingker kiba ha dong baroh ar tylli ha kajuh ka rukom.

²⁵ Kumta yn don phra tylli ki jingker bad khathynriew tylli ki thliew tnaw rupa, ar ar tylli hapoh kawei kawei ka jingker.

²⁶ “Thaw ruh ïa ki diengkhap da ka dieng akasia, san tylli ïa ki jingker kiba ha kawei ka liang jong ka Ïingjaiñ,

²⁷ san tylli ïa ki jingker kiba ha kawei pat ka liang, bad san tylli ïa ki jingker kiba shadien, shaphang sepngi.

²⁸ U diengkhap uba hapdeng, ïa uba la pynkhap hamar shiteng kita ki jingker, u dei ban kot na kawei ka tduh jong ka Ïingjaiñ sha kawei pat.

²⁹ Suit ksiar ïa kita ki jingker, bad pyndait ha ki ïa ki kyrwoh ksiar ban bat ïa ki diengkhap. Suit ksiar ruh ïa kita ki diengkhap.

³⁰ Pynïeng ïa kata ka Ïingjaiñ kat kum ka dur ba nga la pyn-i ha me halor u lum.

³¹ “Thaw ïa ka pyrda da ka linen kaba ni, ba la thain da u 'saiwul uba jngum, uba sawbthuh, bad uba rong saw. Suh pynpur itynnat ha ka da ka dur ki kherub.

³² Wah ïa ka halor ki saw tylli ki rishot kiba da ka dieng akasia ba la suit ksiar, ha kiba la buh ïa ki bnoh ksiar, bad ïa kiba la thep ha ki thliew tnaw rupa.

³³ Wah ïa kata ka pyrda na ki jingpyndait kiba don hapoh tnum Ïingjaiñ, bad ïa ka Synduk ka Jutang kaba don ar tylli ki mawlyngkniap buh ïa ka sha lyndet ka pyrda. Kata ka pyrda kan pynïakhlad ïa ka Jaka Kyntang na ka Jaka Kaba Kyntang Tam.

³⁴ Buh ïa ka jingtap halor ka Synduk Ka Jutang.

³⁵ Habar jong ka Jaka kaba Kyntang Tam buh ïa kata ka miej ha ka liang kaba shaphang shatei jong ka Ïingjaiñ, bad ïa u diengpynïeng sharak ha ka liang kaba shaphang shathie.

³⁶ “Ha ka jaka rung jong ka Ïingjaiñ, thaw ïa ka pyrda kaba da ka linen kaba ni, ba la thain da u 'saiwul uba jngum, uba sawbthuh, bad uba rong saw, bad ba la suh pynpur itynnat bha.

³⁷ Na ka bynta kane ka pyrda, thaw san tylli ki rishot da ka dieng akasia ba la suit ksiar. Ki bnoh jong ki ruh ki dei ban long da ka ksiar. Thaw san tylli ki thliew tnaw rnong ha ka bynta kine ki rishot.