EKSODOS 24 - Khasi CL Bible (BSI)

Kaba pynskhem ïa ka Jutang

¹ U Trai u ong ha u Moses, “Wan kiew sha nga shalor lum, ma me, u Aaron, u Nadab, u Abihu, lem bad hynñiewphew ngut ki nongïalam jong ki Israel; bad katba phi dang ïadon kham ha pajih, dem bad mane ïa nga.

² Tang ma me marwei men wan sha jan jong nga; kita kiwei pat kim bit ban wan sha jan. U paidbah lei lei um bit ban wan kiew sha uta u lum.”

³ U Moses u wan ïathuh ha u paidbah ïa ki hukum baroh bad ïa ki aiñ baroh jong U Trai, bad ki briew baroh ki ïajubab lang, “Ïa kita baroh kiba U Trai u ong, ngin leh.”

⁴ U Moses u thoh ïa ki hukum baroh jong U Trai. Dang step phyrngab ha ka sngi kaba bud, u tei ïa ka duwan ha trai jong u lum, bad u pynïeng ruh khat-ar tylli ki maw, uwei u maw na ka bynta kawei kawei ka jait Israel.

⁵ Nangta u la phah ïa ki samla shynrang bad ki la thang ïa ki jingkñia sha U Trai bad ki la kñia katto katne tylli ki jingri kum ki jingainguh jingïasyllok.

⁶ U Moses u shim shiteng na ka snam jong kita ki mrad bad u buh ïa ka ha ki dabor, bad shiteng pat na kata ka snam u synreit ha kata ka duwan.

⁷ Nangta pat u shim ïa ka kitab ka jutang ha kaba la thoh ïa ki hukum U Trai bad u pule jam ïa ka ha uta u paidbah; ki ruh ki ïa-ong, “Ïa kita baroh kiba U Trai u la hukum, ngin leh, bad ngin kohnguh.”

⁸ Kumta u Moses u shim ïa kata ka snam na ki dabor bad u synreit ïa ka ha uta u paidbah. U ong, “Kane ka long ka snam kaba pynskhem ïa ka jutang kaba U Trai u la pynlong bad phi, mynba u ai ïa kine ki hukum baroh.”

⁹ U Moses, u Aaron, u Nadab, u Abihu, bad hynñiewphew ngut ki nongïalam jong ki Israel, ki ïaleit kiew ïa uta u lum,

¹⁰ bad ki ïohi ïa U Blei ki Israel. Hapoh ki sla'jat jong u, la don kaei kaba i kum ka jingsiang da u mawkordor Sapphir, kaba jngum kum ka suiñbneng.

¹¹ U Blei um shym pynmynsaw ïa kine ki rangbah bapawkhmat jong ki Israel; ki la ïohi ïa U Blei, bad hadien kata ki la ïabam bad ïadih.

U Moses ha u Lum Sinai

¹² U Trai u ong ha u Moses, “Wan kiew sha nga ha une u lum, bad katba me dang don hangne, ngan ai ha me ar tylli ki mawlyngkniap kiba don ïa ki hukum baroh kiba nga la thoh na ka bynta ban hikai ïa ki briew.”

¹³ U Moses bad u Joshua u nongïarap jong u ki la khreh, bad u Moses u la leit kiew sha uta u lum uba kyntang.

¹⁴ U Moses u ong ha ki nongïalam, “Ap ïa ngi hangne ha ka jaka sher dara tad ynda ngi wan phai. U Aaron bad u Hur ki don hangne bad phi; bad kumta uno uno uba don kano kano ka jingïakajia ban pynbeit, u lah ban leit sha ki.”

¹⁵ U Moses u la leit kiew ïa u Lum Sinai, bad u lyoh u tap ïa uta u lum.

^16-17 Ka jingshai baphyrnai jong ka jingdon ryngkat jong U Trai ka la wan hiar ha uta u lum. Ïa ki Israel, ka jingshai ka i kum ka ding kaba ing ha kliar jong u lum. U lyoh u la tap ïa u lum hynriew sngi lynter, bad ha ka sngi kaba hynñiew U Trai u la khot ïa u Moses na u lyoh.

¹⁸ U Moses u la kiew ïa uta u lum sha uta u lyoh. U la sah hangta sawphew sngi bad sawphew miet.