EKSODOS 23 - Khasi CL Bible (BSI)

Ki Aiñ shaphang ka jingbishar hok bad ka jinglehhok

¹ “Wat ju pynphriang ïa ki khubor lamler, bad wat ïarap ïa u nongleh bymman da kaba sakhi lamler.

² Wat ïabud lang bad kiba bun paid haba ki leh ïa ka bymdei, ne haba ki ai sakhi ban pynkylla khongpong ïa ka jingbishar hok.

³ Wat leh shiliang khmat ïa uba duk haba bishar ïa u.

⁴ “Lada phi ïohi ïa ka masi ne ïa ka kada u nongshun jong phi ba ka ïaid sakma, leit ïalam pat ïa ka sha u.

⁵ Lada phi ïohi ba ka kada jong u ka kyllon namar ba ban ka jingkit, ïarap ban pynïeng pat ïa ka; wat shu ïaid lait.

⁶ “Wat pynduh ïa ka jingbishar hok ïa uba duk haba u wan ha ka ïingbishar.

⁷ Wat ai ki jingkynnoh kiba lamler, bad wat pynïap ïa uba lui lui, namar ngan pynrem ïa uno uno uba leh kum kata ka kam bymman.

⁸ Wat bamsap, naba kaba bamsap ka pynmatlah ïa ki briew ban ym ïohi shuh ïa kata kaba dei, bad ka pynduh ïa ka nia jong kiba lui lui.

⁹ “Wat lehbeiñ ïa u nongwei; phi tip kumno phi sngew ban long u nongwei, naba phi la ju long ki nongwei ha ka ri Ijipt.

Shaphang ka snem kaba hynñiew bad ka sngi kaba hynñiew

¹⁰ “Ha ki hynriew snem to thung to tep ha la ka lyngkha, bad lumlang ïa ki jingmih jong ka.

¹¹ Hynrei ha ka snem kaba hynñiew ai jingjahthait ïa ka, bad wat ot ïa kaei kaei kaba mih ha ka. Kiba duk ki lah ban bam ïa kaei kaba mih hangta, bad ba ki mradkhlaw ruh kin ïoh bam ïa kaba la iehnoh. Leh kumjuh ïa ki bri sohwaiñ, bad ïa ki brisoh Olib jong phi.

¹² “Trei hynriew sngi shi taïew, hynrei wat trei ha ka sngi kaba hynñiew, khnang ba ki mraw jong phi bad ki nongwei kiba trei bad phi, bad wat ki jingri jong phi hi, kin ïoh shongthait.

¹³ “Shahshkor ïa kaei kaei baroh kaba nga U Trai nga la kren ha phi. Wat duwai ha kiwei pat ki blei; bad tang ïa ka kyrteng jong ki ruh wat ïalap.

Ki lai tylli ki Jingkhawai Niam kiba khraw

¹⁴ “Rakhe ïa ki lai tylli ki Jingkhawai Niam ha ka shisnem ban pyndonburom ïa nga.

¹⁵ Ha u bnai Abib, u bnai ha uba phi la mihnoh na ka ri Ijipt, rakhe ïa Ka Jingkhawai Niam U Kpu Bakhlem Thiat ha ka rukom kaba nga la hukum ïa phi. Ha ki hynñiew sngi jong kane ka Jingkhawai Niam, wat bam ïa uno uno u kpu ba la khleh thiat. Wat ju wan mane ïa nga khlem da wallam kano kano ka jingainguh.

¹⁶ “Rakhe ïa ka Jingkhawai Niam Ka Jingot haba phi sdang ban ot. “Rakhe ïa ka Jingkhawai Niam Ki Ïingtrep ha ka por synrai, haba phi kheit ïa u soh na ki brisoh jong phi.

¹⁷ Man ka snem ha kine ki lai tylli ki Jingkhawai Niam, ki shynrang baroh ki dei ban wan mane ïa nga, U Trai U Blei jong phi.

¹⁸ “Wat ainguh ha nga da u kpu ba la khleh thiat haba phi kñia ïa ka mrad ha nga. Ym bit ban ieh haduh mynstep ïa ka khleiñ jong ki mrad ba la kñia ha nga ha kine ki Jingkhawai Niam.

¹⁹ “Wallam man ka snem sha ka ïing U Trai U Blei jong phi ïa u soh nyngkong uba phi ot. “Wat shet ïa u khunblang ne khunlangbrot ha ka dud ka kmie jong u.

Ki jingkular bad ki jingbthah

²⁰ “Ngan phah ïa u angel ha shuwa jong phi ban ïada ïa phi haba phi leit jingleit bad ban ïalam ïa phi sha kata ka jaka kaba nga la pynkhreh.

²¹ Shahshkor bad kohnguh ïa u. Wat ïaleh pyrshah ïa u, naba nga la phah ïa u, bad un ym map ïa ka jingïaleh pyrshah kaba kum kata.

²² Hynrei lada phi kohnguh ïa u, bad leh kat ïa kaba nga hukum, ngan ïaleh pyrshah ïa ki nongshun jong phi baroh.

²³ U angel jong nga un leit ha shuwa jong phi bad un ïalam ïa phi sha ka ri jong ki Amor, ki Hit, ki Peris, ki Kanaan, ki Hib, bad ki Jebus; bad ngan pynjot ïa ki.

²⁴ Wat nguh wat dem ha ki blei jong ki, lane mane ïa ki, bad wat bud ïa ki rukom lehniam jong ki. Pynjot ïa ki blei jong ki, bad pynpra lyngkhot lyngkhai ïa ki païa mawkyntang jong ki.

²⁵ Lada phi mane ïa nga U Trai U Blei jong phi, te ngan kyrkhu ïa phi da ka bam bad ka um, bad ngan weng noh ruh ïa ki jingpang jong phi baroh.

²⁶ Yn ym don kawei ruh ka kynthei ha ka ri jong phi kaba hap khun lane kaba lyngki. Ngan pynjlan ïa ka rta jong phi.

²⁷ “Ngan pynlong ïa ki briew kiba ïeng pyrshah ïa phi ban sheptieng ïa nga; ngan pynkulmar thlim ïa kito kiba phi ïaleh pyrshah, bad ngan pynher krad ïa ki nongshun jong phi.

²⁸ Ngan pyntieng kulmar ïa ki nongshun jong phi. Ngan beh noh ïa ki Hib, ki Kanaan, bad ki Hit katba phi nang tur sha khmat.

²⁹ Ngan ym beh noh ïa ki hapoh shisnem, lada nga leh kumta, ka ri kan long kaba kynjah, bad ki mradkhlaw kin bun palat ïa phi.

³⁰ Pynban, ngan beh noh ïa ki khyndiat pa khyndiat, tad haduh ba phin da ïabun paid ban ïohkynti ïa kata ka ri.

³¹ Ngan pynïar ïa ki pud jong ka ri jong phi naduh ka khmut duriaw Akaba haduh ka duriaw Mediterranian bad naduh ka ri shyiap haduh ka wah Ïuphratis. Ngan ai ha phi ka bor halor ki nongshong shnong jong kata ka ri, bad phin beh noh ïa ki katba phi nang tur sha khmat.

³² Wat ïateh kano kano ka jutang bad ki lane bad ki blei jong ki.

³³ Wat shah ba kita ki briew kin shong kin sah ha ka ri jong phi; lada phi leh kumta, kin pynlong ïa phi ban leh pop pyrshah ïa nga. Lada phi mane ïa ki blei jong ki, kan long ka jingriam ka ban pynïap duh ïa phi.”