EKSODOS 22 - Khasi CL Bible (BSI)

Ki Hukum shaphang kaba hap siew

¹ “Lada u briew u tuh ïa ka masi ne ïa ka langbrot bad u pynïap ïa ka ne u die ïa ka, u dei ban hap siew pat da san tylli ki masi ïa kawei ka masi, bad saw tylli ki langbrot ïa kawei ka langbrot.

^2-4 U hap siew pat ïa kata kaba u la tuh. Lada um don ei ei, dei ban die mraw ïa u ban siew pat na ka bynta ïa kata kaba u la tuh. Lada lap ba kata ka mrad ba u la tuh, la ka dei ka masi, ne ka kada, ne ka langbrot, ka dang im bad ka don bad u, u dei ban siew pat ar tylli na ka bynta kawei. “Lada ïohkem ïa u nongtuh uba prat ïing mynmiet bad u shah shoh haduh ba un da ïap, uta uba pynïap ïa u un ym shah kynnoh ba u pynïap briew. Hynrei lada kata ka jingjia ka long mynsngi, yn ñiew ïa u ba u long u nongpynïap briew.

⁵ “Lada u briew u pynbamphlang ïa la ki jingri ha lyngkha ne ha brisoh, bad u pyllait lan ba kin leit bam sa ïa ki jingthung ha ka lyngkha jong uwei pat, u dei ban pynbiang ïa kata kaba la duh da ki jingmih na ka lyngkha ne ka brisoh jong u.

⁶ “Lada u briew u wiang ding ha lyngkha bad ka ding ka pur sha ka lyngkha jong uwei pat bad ka pynduh ïa u kew uba dang ïeng, ne ïa uba la ot bad la lum thup, uta uba wiang ding un hap siew ïa kaba la duh baroh.

⁷ “Haba u briew u mynjur ban pynbat lem ïa ka tyngka ne ïa ki markordor jong uwei pat u briew, bad ïa kita la tuh noh na ka ïing jong u, ïa u nongtuh, lada lap, un hap siew pat ar shah.

⁸ Hynrei lada ym shem ïa u nongtuh, dei ban ïalam ïa uta u briew uba pynbat lem ïa kita ki mar ki mata sha ka jaka mane Blei, bad hangta u dei ban smai ba um shym la tuh ïa kita ki mar jong uta uwei pat u briew.

⁹ “Ha kano kano ka jingïakajia shaphang ki jingdon jingem, la ka long ïa ka masi, ïa ka kada, ïa ka langbrot, ïa ka jaiñkup jaiñsem, ne ïa kano kano ka mar kaba jah, dei ban ïalam ïa ki arliang mamla sha ka jaka mane Blei. Uta ïa uba U Blei u rai pynrem un hap siew ar shah ïa uta uwei pat u briew.

¹⁰ “Lada u briew u mynjur ban sumar lem ïa ka kada, ïa ka masi, ïa ka langbrot, ne ïa kano kano ka jingri jong uwei pat u briew, bad kata ka jingri ka ïap ne mynsaw, ne shah rong noh ha kano kano ka jinglute, bad lada ym don ba ïohi mano mano,

¹¹ uta u briew un leit sha ka jaka mane Blei bad un smai ba um shym tuh ïa ka jingri uta uwei pat u briew. Lada ym shym la tuh ïa ka, u trai jingri u dei ban pdiang ïa kata, bad uta uba sumar lem um donkam ban hap siew ei ei.

¹² Hynrei lada kata ka jingri ka dei kaba la shu tuh, u dei ban hap siew ïa u trai.

¹³ Lada dei ba la pynïap ïa ka da ki mradkhlaw, uta u briew un wallam ïa ka doh kaba sah ban pynsabut ïa kata; un ym hap siew ïa kata kaba la shah pynïap ha ki mradkhlaw.

¹⁴ “Lada u briew u shim kylliang ïa kano kano ka jingri na uwei pat u briew, bad kata ka jingri ka mynsaw ne ïap haba u trai um don ryngkat, uta u briew u hap siew ïa ka.

¹⁵ Hynrei lada ka jia kumta haba u trai u don ryngkat, uta u briew um donkam siew ei ei. Lada la shu shim wai ïa kata ka jingri, ïa ka jingduh hap siew da ka bai wai jong ka.

Ki Aiñ kiba ïadei ha ka jinglong jingim hok bad ka niam

¹⁶ “Lada u briew u khroh ïa ka theisotti ka bym pat ïatehktien, u dei ban siew ïa ka dor jong ka kum ka nongleitkurim bad shongkurim ïa ka.

¹⁷ Hynrei lada u kpa jong ka um shah ïa u ban shongkurim ïa ka, uta u briew un siew ïa u da ka pisa kaba ïaryngkat ïa ka dor jong ka nongleitkurim kaba sotti.

¹⁸ “Pynïap ïa kano kano ka briew kaba leh byrtong.

¹⁹ “Pynïap ïa uno uno u briew uba ïathiah shongkha bad ka mrad.

²⁰ “Rai pynïap ïa uba kñia ainguh ha uno uno u blei, lait tang ha nga U Trai.

²¹ “Wat lehbeiñ ne pynshitom beiñ ïa u nongwei; kynmaw ba phi ruh phi la long ki nongwei ha Ijipt.

²² Wat lehbeiñ ïa ka riewkynthei ne ïa u khunswet.

²³ Lada phi lehbeiñ ïa ki, nga U Trai ngan jubab ïa ki haba ki kyang sha nga ban ïoh jingïarap,

²⁴ bad ngan bitar lep, bad ngan pynïap ïa phi ha ka thma. Ki tnga jong phi kin kylla riewkynthei, bad ki khun jong phi kin kylla khunswet.

²⁵ “Haba phi ai pisa kylliang ha uba duk na ki briew jong nga, wat leh kum u nongai ram ban dawa bai sut na u.

²⁶ Lada phi shim ïa ka jaiñkup jong uno uno kum ka jingkular ba un sa siew ïa phi, pynphai noh pat ïa ka sha u ha shuwa ba ka sngi kan sep,

²⁷ namar u don tang kata ban kup bad ban pynsyaid ïa lade. Un kup thiah pat da-ei? Haba u khot kyrpad ïa nga ban ïarap ïa u, ngan jubab ïa u, namar nga long uba sngewsynei.

²⁸ “Wat kren sniew ïa U Blei, bad wat tim wat tla ïa u nongïalam jong ki briew jong phi.

²⁹ “Ai ha nga ïa ki jingainguh na u kew jong phi, na ka waiñ jong phi, bad na ka umphniang Olib jong phi, ha ka por kaba biang. “Ai ha nga ïa kiba la kha nyngkong na ki khun shynrang jong phi.

³⁰ Ai ha nga ïa kiba la kha nyngkong na ki masi bad ki langbrot jong phi. Ai ba uba la kha nyngkong un sah hynñiew sngi bad la ka kmie, bad ha ka sngi kaba phra ai ïa u ha nga.

³¹ “Phi, phi long ki briew jong nga, kumta phim bit ban bam ïa ka doh jong kano kano ka mrad kaba la shah pynïap ha ki mradkhlaw; pynban, ai ïa ka ha ki ksew.